Jaunūs stuostnīku školā bārni i jaunīšu īpasazeist ar stuostnīceibys pasauli
Sastdiņ, 14. novembrī, Rēzeknē, Rēzeknis Bārnu bibliotekā, nūtyka pyrmuo Jaunūs stuostnīku školys nūdarbeiba, kurā sasatyka bārni i jaunīši nu folklorys kūpu “Sienāži”, “Vīteri”, “Rāznaviņa”, kai i cytii interesenti, kab stuostneiču Meldrys Gailānis i Vilhelmīnis Jakimovys vadeibā īpasazeitu ar stuostnīceibys tradicejom i pylnveiduotu stuostu radeišonys i stuosteišonys prasmis.
Nūdarbeibys soukumā dalinīki, kas puorstuovēja kai Rēzeknis vaļstspiļsātys, tai Rēzeknis nūvoda folklorys kūpys “Sienāži”, “Vīteri” i “Rāznaviņa”, minēja meiklis, kam tys labi atraisa rodūšū dūmuošonu. Piec tam stuostneica i bibliotekare Meldra Gailāne izstuosteja, kaidūs bibliotekys i digitalajūs resursūs vaicuot stuosteišonys materialu, eipaši dagrīžūt viereibys puorsokom latgaliski. Latgolys stuosteica Vilhelmīne Jakimova izsuosteja jaunūs stuostnīku konkursu viesturi, nūtykšonys parādu, nūsacejumus i viertiešonys kriterejus. Kai ari bārni i jaunīši rodūši darbuojās, paraudzeja vysaiidus stuosteišonys veidus i pylnveiduoja sovys stuosteišonys prasmis.
Jaunūs stuostnīku školys mierkis ir paleidzēt bārnim i jaunīšim atrast sev pīmāruotu folklorys materialu, puorvērst jū personiskūs stuostūs i ar puorlīceibu daleitīs stuostūs ar klauseituojim. Nūdarbeibys ir vareiba vuiceitīs nu pīredzejušu stuostnīku, rodūši dorbuotīs i sasagataveit stuostnīku konkursam “Teci, teci, valodiņa”.
Ūtrei Jaunūs stuostnīku školys nūdarbeiba nūtiks sastdiņ, 21. novembrī, 13 stuņdēs Rēzeknis Bārnu bibliotekā. Jū vadeis teatra i kusteibu pedagoge, režisore Marika Čerņavska, raugūt paleidzēt dalinīkim stuostu paruodeit iz skotivis. Nūdarbeibai aicynuoti pīsasaceit bārni i jaunīši vacumā nu 7 da 16 godu. Ūtrajai nūdarbeibai pīsasaceit var, sasazynojūt ar Meldru Gailāni pa teleponu 26363361 voi e-postā [email protected].
Ūtardiņ, 24. novembrī, 13.15 stuņdēs nūdarbeibu dalinīki aicynuoti pīsadaleit stuostnīku konkursa “Teci, teci, valodiņa” catūrtdaļfinala nūtikšonā Rēzeknis Bārnu bibliotekā, piec kura veiksmeiguokajim stuostnīkim byus vareiba turpynuot ceļu iz Zīmeļlatgolys pusfinalu Ūzulainis tautys nomā i konkursa finalu Reigā. Rēzeknis Bārnu bibliotekā nūteikūšū konkursa catūrtdaļfinalu vērtēs Jaunūs stuostnīku školys nūdarbeibu vadeituojis Vilhelmīne Jakimova i Marika Čerņavska, kai i žurnaliste, literate, gruomotu blogere skaiteišonys viestneica Latgolā Inga Kaļva-Minina.
Jaunū stuostnīku školu itymā rudinī organizei latgalīšu kulturys kusteiba “Volūda”, sasadorbojūt ar Rēzeknis Bārnu biblioteku. Aktivitati atbolsta Valsts kulturkapitala fons, Rēzeknis Centraluo biblioteka i Latvejis Stuostnīku asociaceja. Pīsadaleišona nūdarbeibuos ir bezmoksys.
Golvonajā biļdē – šaļts nu Jaunūs stuostnīku školys pyrmuos nūdarbeibys. Foto Inga Kaļva-Minima. Vaira karteņu galerejā ITE.

