Daīmami saimem veļteituo pasuokuma "Vierzeiba. Saimu dīna" lektoru stuostu video īroksti
Oktobra vydā Reigā pyrmū reizi nūtyka saimem, kas ar bārnim runoj voi grybātu runuot latgaliski, veļteits pasuokums “Vierzeiba. Saimu dīna”. Tamā, lai izzynuotu vaira ap latgalīšu volūdys lītuošonu saimē i atsaceitu iz vacuoku vaicuojumim, pīredzē i zynuošonuos pasadaleja volūdneica Sanita Martena, logopede Inese Smirnova i muziks Kristaps Rasims. Niu kotram interesentam ir vareiba nūsavērt stuostu video īrokstus.
Ideja par viereibys dagrīzšonu vaicuojumim, kas dasadur latgalīšu volūdai saimēs i seviški juos nūdūšonai tuoļuok bārnim, roduos piec pārnejuo gods novembrī Rēzeknē nūtykušuo latgalīšu kulturys kusteibys “Volūda” reikuotuo latgalīšu volūdys i kulturys foruma “Vierzeiba”. Kai pīredzis stuostūs, tai diskusejā tyka pastreipuots, ka vīns nu svareiguokūs aspektu latgalīšu volūdys byušonā ir juos nūdūšona cytom paaudzem, kai ari, apsazynojūt, cik latgalīšu saimu nadzeivoj Latgolā, byutu svareigi napagaisynuot ari latgalīšu volūdys vaicuojumu.
Saimu dīnys “Vierzeiba. Saimu dīna” idejis iniciatore, latgalīšu kulturys kusteibys “Volūda” projektu vadeituoja i latgaliskuos kulturvidis aktiviste Vineta Vilcāne-Toca soka: “Latgaliski runojūšūs skaits burtiski saryuk ar kotru dīnu. Partū iz latgalīšu, kuri niu palīk par vacuokim, placu gulstuos cīši lela atbiļdeiba latgalīšu volūdys saglobuošonā. Runuošona ar bārnim latgaliski var praseit izadreikstiešonu, eipaši, ka saime dzeivoj uorpus Latgolys, stuošonūs preteimā stereotipim i lelu pacīteibu. Ar itū pasuokumu gribim īdvasmuot latgalīšus ar sovim bārnim runuot latgaliski, dūt īspieju satikt leidzeigi dūmojūšūs i atguodynuot, ka latgalīšu volūda ir tikpat pylnvierteiga kai sevkura cyta volūda, kas skaņ Latvejis saimēs.”
Pasuokumā "Vierzeiba. Saimu dīna" pīredzē i zynuošonuos pasadaleja volūdneica Sanita Martena, logopede Inese Smirnova i muziks Kristaps Rasims. Niu kotram interesentam ir vareiba nūsavērt stuostu video īrokstus. Paļdis "FT Production" par tehniskū atbolstu i video sagataveišonu!
"Re:TV" stuosts i sižets par pasuokumu daīmams ITE.
Logopede Inese Smirnova "Bērna runa daudzvalodīgā ģimenē"
Volūdneica Sanita Martena "Voi saimē var byut par daudz volūdu i kai augt vaira nakai vīnys volūdys vidē?"
Pasuokumu vadeituojs i muziks Kristaps Rasims "Lai runuotu ar bārnim latgaliski, vajadzeiga tikai mēle"
____________________________
Latgalīšu kulturys kusteibys “Volūda” aktivitatis 2025. i 2026. godā finansiali pabolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.
