Jaunūs stuostnīku škola Rēzeknē aicynoj bārnus i jaunīšus iz nūdarbeibom rodūšuma i uzastuošonys prasmu atteisteišonai
Ar mierki atteisteit bārnu i jaunīšu rodūšumu, izapausšonu i uzastuošonys prasmis, latgalīšu kulturys kusteiba “Volūda” i Rēzeknis Bārnu biblioteka ituo gods novembrī aicynoj Rēzeknis piļsātys i nūvoda bārnus i jaunīšus iz Jaunūs stuostnīku školys nūdarbeibom Rēzeknē, kuruos varēs paraudzeit spākus stuostnīceibā i īpasazeit ar latvīšu i latgalīšu folklorys boguoteibom.
Pyrmajā Jaunūs stuostnīku školys nūtikšonys reizē paradzātys divejis praktiskuos nūdarbeibys – 14. novembrī 11.30 stuņdēs Rēzeknis Bārnu bibliotekā ar stuostnīceibu īpazeistynuos Latgolys stuostneicys Vilhelmīne Jakimova i Meldra Gailāne, bet 21. novembrī 13 stuņdēs nūdarbeibu “Kā stāstu iznest uz skatuves” vadeis teatra i kusteibu pedagoge, režisore Marika Čerņavska. Īcarāts, ka nūdarbeibys paleidzēs atrast i izaraudzeit pīmāruotu folklorys materialu bibliotekys i digitalajūs resursūs, puorvērst puosoku sovā stuostā, pylnveiduot publiskuos runys i uzsastuošonuos prasmis, kai i īsavuiceit paruodeit stuostu iz skotivis.
Nūdarbeibuos aicynuoti pīsadaleit folklorys kūpu daleibnīki i Rēzeknis vaļstspiļsātys i nūvoda školāni nu 7 da 16 godu vacuma. Piečuok, 24. novembrī, nūdarbeibu dalinīki aicynuoti pīsadaleit stuostnīku konkursa “Teci, teci, valodiņa” catūrtdaļfinala nūtikšonā Rēzeknis Bārnu bibliotekā, piec kura veiksmeiguokajim stuostnīkim byus vareiba turpynuot ceļu iz Zīmeļlatgolys pusfinalu Ūzulainis tautys nomā i konkursa finalu Reigā. Rēzeknis Bārnu bibliotekā nūteikūšū konkursa catūrtdaļfinalu vērtēs Jaunūs stuostnīku školys nūdarbeibu vadeituojis Vilhelmīne Jakimova i Marika Čerņavska, kai i žurnaliste, literate, gruomotu blogere skaiteišonys viestneica Latgolā Inga Kaļva-Minina.
Jaunūs stuostnīku školys idejis autore i projekta vadeituoja ir stuostneica, “Volūdys” kustynuotuoja i Rēzeknis Bārnu bibliotekys vacuokuo bibliotekare Meldra Gailāne. Ideja par jaunūs stuostnīku školu rodusēs, da ituo organizejūt stuostnīku konkursus Rēzeknis Bārnu bibliotekā i runojūt ar folklorys kūpu školuotuojom. “Pīredze ruoda, ka bārnim i jaunīšim vajadzeigi praktiski padūmi i vīta, kur i kai meklēt stuostus, raudzeit jūs stuosteit i sajimt lobvieleigu atbolstu nu pīredzejušu stuostnīku. Ar Jaunūs stuostnīku školu raudzeisim aizpiļdeit itū vajadzeibu. Bārni īsavuiceis sameklēt stuostus, padareit jūs par sovim i pastuosteit cytim, kai ari ir nūceja, ka ar laiku izaveiduos jaunūs stuostnīku teiklys,” ideju raksturoj Meldra Gailāne.
Dasasaceit nūdarbeibom var da 11. novembra, sasazynojūt ar Meldru Gailāni [email protected] voi 26363361. Vysys Jaunūs stuostnīku školys nūtikšonys interesentim ir bezmoksys.
Jaunūs stuostnīku školys nūtikšonys organizej latgalīšu kulturys kusteiba “Volūda” i Rēzeknis Bārnu biblioteka, aktivitati atbolsta Vaļsts kulturkapitala fonds, Rēzeknis Centraluo biblioteka i Latvejis Stuostnīku asociaceja.
