Pāriet uz galveno saturu
  • ATBAĻSTEIT
  • NŪPIERKT
  • NŪSACEJUMI
  • BYUT
  • PADAREIT
  • VIESTS
  • FOTO
  • KUSTYNUOT
  • PAĻDIS
  • SASAZYNUOT

Jaunākie ieraksti

  • Izdūta Miglinīku dzymtai i reizē Latgolys viesturei veļteita gruomota “Miglinīki laiku lūkūs”
    18. nov. 2026
  • Jaunūs stuostnīku školā bārni i jaunīšu īpasazeist ar stuostnīceibys pasauli
    16. nov. 2026
  • Vierteiguokuos seminaru cykla "Spāka LAB 2026" atzinis apsaveramys ari video īrokstūs
    13. nov. 2026
  • Daīmami saimem veļteituo pasuokuma "Vierzeiba. Saimu dīna" lektoru stuostu video īroksti
    31. okt. 2026
  • Jaunūs stuostnīku škola Rēzeknē aicynoj bārnus i jaunīšus iz nūdarbeibom rodūšuma i uzastuošonys prašmu atteisteišonai
    29. okt. 2026
  • Izdavums bārnim, prozys skaitejumi i jaunūs stuostnīku škola – ar VKKF paleigu “Volūda” eistynuos vairuokys idejis
    27. okt. 2026
  • Dasmytais diktats latgalīšu rokstu volūdā. Klausīs i pīroksti!
    17. okt. 2026

Vacuos viests

Vysys bīdreibys īprīškejuos viests var puorskaiteit lgsc.lv

Vierteiguokuos seminaru cykla "Spāka LAB 2026" atzinis apsaveramys ari video īrokstūs

13. novembris, 2026 pl. 19:34, Nav komentāru

Vierteiguokuos seminaru cykla "Spāka LAB 2026" atzinis apsaveramys ari video īrokstūs

1. oktobrī Varakļuonu muižā i 29. oktobrī Kruoslovys piļs kompleksa restoranā i kulturtelpā “Fon Bubert” nūtyka rodūšūs seminaru cykla “Spāka LAB” pasuokumi. Varakļuonu seminarā tyka runuots par nūtureigom i drūsom kūpīnom i kulturys darbinīkim kai kūpīnu liderim, cikom Kruoslovā raudzeja saprast, kai pastuosteit par sovys pusis nūtikšonom, kab par tom zynuotu nu Kūrzemis da Latgolai, kai ari – kas eistyn ir i kaidu lobumu dūd geografiskuos nūruodis amatnīceibai. Tim, kurī natyka iz pasuokumu kluotīnē, pīduovojam vareibu lektoru uzastuošonys nūsavērt video formatā.

1. oktobrī nu 10 da 16 stuņžu Varakļuonu muižys pilī nūtyka “Spāka LAB” seminars “Byut liderim: kai styprynuot kūpīnu, kab byutu nūtureigi i drūsi”. Seminara mierkis – snēgt īrūsmis idejom kai vītejom kulturys īstuodem i pasuokumu organizatorim sasadorbuot ar kūpīnom, tai ļaunūt veiduot daudzveideiguoku i plotuokai sabīdreibai interesejūšu nūtikšonu kluostu. Īkļaunūt kūpīnys dalinīkus aktivitašu eistynuošonā i uzklausūt vysaidus redzīņus, veidojās drūsuokys i nūtureiguokys sabīdreibys grupys, kurys cyta cytu pazeist i uzatyc. 

Vaļsts Guņsdzieseibys i gluobšonys dīnasta civiluos aizsardzeibys puorvaļdis vacuokuo inspektore Agrita Vītuola (Vītola) īskicej civiluos aizsardzeibys (CA) sistemys pamatpraseibys i vajadzeigū sadarbeibu kulturys montuojuma saglobuošonā. 

Augšdaugovys nūvoda bīdreibys “Mūsu Līksnai” vadeituoja Ieva Kudiņa stuosta par ceļu iz bīdreibys dybynuošonu, bīdreibys kūpradis sātys izveidi i tuos pīpiļdeišonu ar saturu. Bīdreiba na tik organizej pasuokumus, tok ar sovom aktivitatem puļcej dzeivuotuojus, veicynoj leidzdaleibu i paleidz kūpīnys idejom puortapt kūpeigūs dorbūs.

Nūdybynuojuma “Liepāja 2027” sabīdreibys leidzdaleibys projektu vadeituoja Justīne Rusakova pasadola ar sovu sakruotū naformaluos izgleiteibys pīredzi, pastuosta par pošvaļdeibys atbolstu kūpīnom i praktiskā darbneicā īskicej mīra kulturys ideju kai veidu sadarbeibys veicynuošonai.


29. oktobrī nu 10 da 16 stuņžu Kruoslovys piļs kompleksa restoranā i kulturtelpā “Fon Bubert” nūtyka “Spāka LAB” seminars “Byut radzamim: kai pastuosteit par sovu nūtikšonu, kab par tū zynuotu nu Latgolys da Kūrzemei”. Seminara mierkis – aktualizēt vajadzeibu komunicēt myusdīneigai i radzamai, kab ari regionalys kulturys nūtikšonys i pasuokumi byutu atpazeistami i zynomi uorpus vīnys piļsātys ci nūvoda tvāruma. Taipoš tyka runuots par kūpīnys styprynuošonu, vysaiduoku aktivitašu veiduošonu, rodūšai izmontojūt iz vītys daīmamūs resursus.


Restorana i kulturtelpys “Fon Bubert” saiminīku pīredzis stuosts.

Patentu vaļdis preču zeimu i dizainparaugu departamenta direktoris vītneica Ieva Paula Drekslere īdūd padzilinuotuoku prīškstotu par amatnīceibys i ryupnīceibys ražuojumu geografiskuos izceļsmis nūruožu aizsardzeibys prīšknūsacejumim, registracejis procesu i īsacejumim dasacejumu sagataveišonys procesā.


Ceļuojumu i pasuokumu organizatore Sindija Vilde stuosta par sova uzjāmuma “Spalva Latvia” plotū pīredzi autentisku i cīši personeigu pīdzeivuojumu izveidē. Jei pastreipoj, ka Latgolys regions nav “pa ceļam”, vys Latgola dreižuok ir īmeslis ceļam. 

Sovā pīredzē dolās Mārcis Rubenis, kurs ir vīns nu kusteibys “Free Riga” dybynuotuoju i piļsātvidis aktivistu. Jis ir paleidziejs atdzeivynuot tukšys i naizmontuotys Reigys ākys, puorvieršūt tuos par vītom kulturai, rodūšom iniciativom i kūpīnom.

Par “Spāka LAB”

Pyrmī “Spāka LAB” rodūšī seminari, kas veļteiti Latgolys kulturys dzeivis organizātuoju i navaļdeibys organizaceju puorstuovu kapacitatis styprynuošonai i ideju apmaiņai, nūtyka 2023. goda suokumā. Da šam seminari, kurūs runuots par komunikacejis prašmu styprynuošonu, vītu stuostu veiduošonu, jaunīšu īsaisti tradicionalajā kulturā i jaunu pasuokumu ideju radeišonu, nūtykuši Kuorsovā, Daugovpilī, Preiļūs, Leivuonā, Bolvūs, Rēzeknē i Rēzeknis nūvodā. Rodūšūs seminaru cyklys teik organizāts, pasasokūt Kulturys ministrejis i Latvejis Nacionaluo kulturys centra atbolstam. Ituo gods seminara organizatori ir bīdreiba “Nezināmā Rēzekne” cīšā sadarbeibā ar latgalīšu kulturys kusteibu “Volūda”. Seminaru cykla nūsaukumā ar latgaliskū vuordu “spāks” (latv. lit. – spēks) īkodāta kapacitatis ceļšona, sovpus “lab” ir saeisynuojums nu vuorda “laboratoreja” – vīta, kur ar idejom, eksperimentim i procesim rūnās nazkas jauns, itymā gadīnī – kulturys nūtikšonys i nūzaris atteisteiba Latgolys regionā.

Nav komentāru

Komentēt







Pirkumu grozs

Pirkumu grozs ir tukšs.


Atbolsti myusu kusteibu ar vīnys reizis voi kotra mieneša zīduojumu lītuotnē "Mobilly".