Bārni Ludzā, Ruguojūs i Rēzeknē niu lobuok pazeist Sunānu i latgalīšu volūdu
2026. gods suokuos latgalīšu bārnu literaturys autore Laura Melne sasatyka ar vairuoku Latgolys vuiceibu īstuožu bārnim, kab īpazeistynuotu jūs ar latgalīšu volūdu, latvīšu volūdys daudzveideibu, kai ari apsprīstu komiksu “Sunāns breiveibā” i atsaceitu iz vysim bārnu vaicuojumim par tū, kai tūp gruomotys, i cytom temom.
Janvarī Laura Melne gasteja Ludzys Muzykys pamatškolā, kur jau vairuokus godus školuotuojis Dacis Tihovskys vadeibā aktivai dorbojās latgalīšu rokstu volūdys puļceņš. Bārni varēja paruodeit sovys lobuos skaiteišonys latgaliski prasmis, īsajiutūt Sunāna i kača Toma lūmuos i skaitūt fragmentus nu Laurys Meļnis i Viviannys Mariis Stanislavskys komiksa “Sunāns breiveibā”, taipat tyka aizdūti vysaiduoki vaicuojumi par tū, kai tūp gruomotys i vālāts, kab jaunys gruomotys bārnim latgaliski byutu vēļ.
Februarī Laura laidēs iz Ruguojim, kur sasatyka ar Ruguoju vydsškolys i Eglainis pamatškolys bārnim. Ruguoju vydsškolys pyrmsškolys vacuma bārnim nu ituo vuiceibu goda suoku školuotuojis Sanitys Anckinys vadeibā teik pīduovuotys latgalīšu volūdys nūdarbeibys – jī kūpā dzīd i ari skaita gruomotys, vuicuos vuordus latgaliski. Vīna nu ruguojīšu kūpā puorskaiteitūs gruomotu latgaliski beja ari “Sunāns breiveibā”, deļtuo drūsmeiguokī bārni latgaliski pastuosteja ari par sovim sunim i kačim, taipat beja ari muzykali prīšknasumi latgaliski, sovpus Eglainis pamatškolys puorstuovs nūskaiteja dzejūli latgaliski. Ari ite bārni varēja izzynuot na tik kū jaunu i aizdūt vysus interesejūšūs vaicuojumus, tok paraudzeit bez sasagataveišonys lūmuos paskaiteit komiksa fragmentus, kas jim ari labi izadeve.
Aprelī Laura sadarbeibā ar Rēzeknis piļsātys Bārnu biblioteku sasatyka ar pyrmsškolānim Rēzeknis pyrmsškolys izgleiteibys īstuodē “Auseklītis” i 3. klasis školānim nu Rēzeknis suokumškolys. “Auseklīša” audziekni beja eipaši sasagatavejuši – vysi kūpā beja puorskaitejuši komiksu “Sunāns breiveibā” i vīna grupeņa pat sareikuojuse sovu zeimiejumu izstuodi, kas radeiti, īsadvasmojūt nu komiksa. Ar Rēzeknis bārnim nūtyka na tik saruna par latgalīšu volūdu i komiksu “Sunāns breiveibā”, bet jim ari kai vīnim nu pyrmūs beja vareiba dzierdēt fragmentu nu Laurys Meļnis tūpūšuo garstuosta bārnim “Babys duorzā. Kā es negāju bērnudārzā”.
Fotogalereja nu gasteišonys školuos i bibliotekuos ITE.
_________________
Latgalīšu kulturys kusteibys "Volūda" darbeibu latgalīšu literaturys populariziešonai i atteisteišonai 2026. godā atbolsta Vaļsts kulturkapitala fonds projektā "Atbalsts "Volūdas" darbam latgaliešu literatūras attīstības nodrošināšanā 2026".