Vuiceitīs latgalīšu volūdu i izzynuot latgaliskū – jaunīši sasatiks seminarā “Atzolys” Ludzys nūvoda Kuorsovā
Jaunnedeļ, nu 3. da 7. augusta, Ludzys nūvoda Kuorsovā nūtiks latgaliskais seminars jaunīšim “Atzolys”, kurā 20 jaunīši nu Latgolys i cytom Latvejis vītom lekcejuos, rodūšajuos nūdarbeibuos i ekskursejuos izzynuos latgalīšu volūdu i kulturu, jaunīšu īspiejis, sasatiks ar vysaidom latgaliskuos kulturvidis personeibom, kai i poši praktiski dorbuosīs, kab radeitu jaunys latgaliskys kaitys jaunīšim i saimem.
Jaunīšu seminars “Atzolys” (standarta latvīšu volūdā – atvases, jaunie dzinumi) pyrmū reizi nūtyka 2004. godā taišni Kuorsovā, i itūgod itei byus kai simboliska atsagrīzšona pyrmajā nūtikšonys vītā. Ituo gods seminarā pīsadaleis jaunīši nu Ludzys, Kruoslovys, Preiļu, Rēzeknis, Leivuona nūvodu, Reigys i cytu vītu ar gribiešonu vuiceitīs latgalīšu rokstu volūdu, runuot latgaliski, īpazeit latgaliskū kulturu i vierteibys, lai styprynuotu sovu identitati, byutu zynūši par procesim, nūtikšonom i personeibom Latgolā i latgaliskajā kulturā, izzynuotu plotuok mozuok lītuotuos volūdys pasaulī, iz prīšku poši vaira īsasaisteitu piļsūniskuos sabīdreibys veiduošonā, kai i socializātūs, dabuotu jaunus kontaktus, satureigi pavadeitu laiku, īsadvesmuotunu Latgolā aktivūs cylvāku i vaira izzynuotu Kuorsovu, juos apleicīni i dareituojus.
Seminara mierkis ir veicynuot saprasšonu par kulturys byušonu vysaidai kai globalu vierteibu i styprynuot jaunīšu leidza atbiļdeibu ilgtspiejeigys regionaluos atteisteibys veiduošonā i kulturys montuojuma saglobuošonā caur latgalīšu volūdys i identitatis prizmu. Latgaliskais seminars “Atzolys” nūteik reizi divejūs godūs, i jis ir bejs kai atspierīņa punkts ari daudzim itūšaļt latgaliskajā kulturtelpā zynomim aktivistim vaira izzynuot i īsasaisteit kulturys i sabīdryskajūs procesūs. Īprīškejā reizē seminars nūtyka Kruoslovys nūvoda Dagdā, bet vēļ pyrma tuo jaunīši gasteja Bolvu nūvoda Rekovā. Ari ituo gods seminara veidtuoja, tūpūšuo dizainere Agnese Skangale ir īprīškejūs seminaru dalineica, kura turpynoj aktivi īsasaisteit kai “Volūdys”, tai cytuos Latgolys kulturys nūtikšonuos.
Ar jaunīšim seminarā “Atzolys 2026” Kuorsovā struoduos: mūdis dizainere, kuorsavīte Laima Jurča, improvizators Kozmens (Mārtiņš Kozlovskis), pasuokumu vadeituojs i muzikis, pyrmūs “Atzolu” dalinīks Kristaps Rasims, Leivuona nūvoda pošvaļdeibys vadeituojs Dāvids Rubens, bīdreibys “Nezināmā Rēzekne” aktiviste Regita Zeiļa, tulkuotuojs, “Volūdu sātys” vadeituojs Snorre Karkonens-Svensons, Latgolā dzeivojūšuo portugalīte, muokslys pasnīdzieja Mafalda Garsija, taipat seminarā gasteis cyti lektori, aktivisti i latgalīšu kulturys personeibys. Kūpā ar pyrmuo plānuotuoja latgaliski “Giut breidi” i kaitys “A kas ite?” idejis autori Līgu Springu, golda kaitys “Čipierkstneits” idejis autori i dizaineri Jolantu Keišu i cytu latgaliskūs kaidu idejis autorem i dizainerem, jaunīši dorbuosīs meistarklasēs i poši radeis sovys jaunys kaitys latgaliski, kū piečuok ar latgalīšu kulturys kusteibu “Volūda” raudzeis puorvērst eistynūs i plotuok lītojamūs produktūs. Itaids seminara fokuss izalaseits, kam “Volūda” regulari sajam jaunīšu centru, školu, biblioteku i cytu interesentu vaicuojumus par golda i cyta veida kaitom, ar kū papyldynuot nūdarbeibys i pasuokumus, kas veļteiti latgalīšu volūdai.
“Atzolu” nūtikšonu finansiali pabolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu, LAPAS (Latvejis Platforma atteisteibys sadarbeibai) projekts “GearUp!”, kū eistynoj ar Eiropys Savīneibys finansialu atbolstu, i Latgolys kulturys programa, kurū organizej Latgolys regiona atteisteibys agentura ar Vaļsts kulturkapitala fonda mierkprogramys “Latviešu vēsturisko zemju attīstības programma” atbolstu. Seminara reikuotuojs – latgalīšu kulturys kusteiba “Volūda”.
Seminarā Dagdā 2024. godā jaunīši kūpā ar raidejuma
“Pīci breinumi” komandu taiseja raidīrokstu, jū var nūsaklauseit ite https://ej.uz/raidīroksts, bet 2022. godā
kūpā ar reperi Ūgu i īrokstu studeju “Bigmaar’s Records” topa apvīneibys
“Atzolīši” skaņdorbs “Zalts sudobra vītā” https://www.youtube.com/watch?v=KmHCtHra9uc.
