Pīsapylda tys, par kū nikod nabyutu variejuse pat īsadūmuot sapynuot | Īpasazeistam ar “Volūdys” kustynuotuojim
Pārņ nūsvietejūt “Volūdys” juridiskūs 20 godu jubileju i atguodojūt itūs godu laikā pīdzeivuotū, turpynojam īpazeistynuot ar bīdreibys kustynuotuojim. Itys stuosts byus par Lauru Melni, kas “Volūdā” (voi tūlaik “Latgolys Studentu centrā”) īsasaisteja, aizsuocūt studejis Reigā. Bez Laurys dareituo i ryupeiguo kasdīnys dorba nav īsadūmojams latgalīšu kulturys ziņu portala lakuga.lv stuosts, taipat Laura, rokstūt literarūs dorbus jaunuokim skaiteituojim i braucūt iz školom i bibliotekom, paleidz mozim i lelim izzynuot, ka gruomotys var skaiteit ari latgaliski.
Atsokūt iz vaicuojumu, kai jai ruodīs, kū “Volūdys” darbeiba ir mainejuse Latgolys kulturtelpā, Laura soka, ka jai pat vaira grybātūs saceit, ka “Volūda” ir mainejuse skotu i izpratni par latgalīšu kulturu kūpejā Latvejis kulturtelpā. “Daudzys lītys, kas par mani jaunuokim cylvākim Latgolā voi sabīdreibai Latvejā kūpumā niu ruodīs pošsaprūtamys, patīseibā ir lels “LgSC”, vāluok “Volūdys” nūpalns. Portals lakuga.lv, latgalīšu jaunuokuos literaturys izdavumi, literarī konkursi ir tik daļa nu, pa munam, svareiguokūs nūtikšonu, bez kurūs Latvejis kulturu niu gryuts īsadūmuot,” tai Laura, kura poša bīdreibā īsasaisteja par reizi piec vydsškolys, aizsuocūt studejis Reigā i dreiži palīkūt par portala lakuga.lv redaktori, kai jei poša tū sauc par pyrmū darbeibys laiku portalā.
Karteņā: portala lakuga.lv tuo laika komanda, svietejūt portala 16 godu dzimšonys dīnu. Nu lobuos: Edeite Laime, Laura Spundere, Laura Melne, Marta Puzāke i Amanda Anusāne.
Kai dorbuošonuos organizacejā ir ītekmiejuse tovu dzeivi?
Es jau ite naseņ Storptautyskajā NVO dīnā raksteju (rokstu var puorskaiteit ITE), ka “Volūda” mani ir izgluobuse nu skumeigys dzeivis Reigā i dorba bez prīcys kaidā tuos birojā. Ilze Sperga nazkod saceja, ka “LgSC” asūt “savuokuši mani jau mozeņu”, kas tai eistyn ir. Suocūt studēt Reigā, kaidā rudiņa pīvakarē aizguoju iz tūreizejū “LgSC” Tonis biroju, kab nūpierktu jaunuokū žurnala “A12” numeri, bet tī nūtyka sprīsšona par portala lakuga.lv byušonu iz prīšku. Pieški maņ pīduovuoja byut par tuo redaktori. Suokumā pasabeidu, bet tod saprotu, ka taidu vareibu laist garum navar. I tei eistyn beja vīna nu munu nūzeimeiguokūs profesionalūs “školu”. Suocūt ar tū, ka itymā pūsmā ari tai pa eistam nūstyprynuoju sovys latgalīšu volūdys raksteibys prasmis (tuos, zynoms, turpynoju sleipēt ari niu, piec padsmit godu, deļtuo ka tys ir nabeidzams process), kas laika gaitā ir izaruodejuse vīna nu munu “superspieju”, kas dzeivē pīduovoj vysaiduokys vareibys.
Karteņā – Laura Melne (nu lobuos), Muora Mortuzāne-Muravska i Vineta Vilcāne (sovulaik portala lakuga.lv komanda)
Piec muna pyrmuo darbeibys laika Lakugā sekuoja puora godu, kod beju mozuok īsaisteita "LgSC" aktivajūs procesūs. Pandemejis laikā pamozam atsagrīžu, bet beiguos gribiešona nazkū profesionalajā dzeivē pamaneit nūvede da tuo, ka nu jau pīktū godu latgaliskuos lītys ir muns pamatdorbs. Ka dūmoju par ituo pūsma leluokajom ītekmem iz munu dzeivi, sacynoju, ka tuos varātu byut divejis. Pyrmais ir “Sunāna breiveibā” fenomens, kas maņ lyka nūticēt, ka varbyut eistyn es varu raudzeit raksteit i literaturu. Ūtrais ir stuosts par runuošonu. Maņ vydsškolys laikā beja blogs ar nūsaukumu “Daudzi rokstu, moz runoju”. Sātā, ar draugim i zynomim cylvākim es runuoju gona daudzi, bet ļaudīs puorsvorā klusieju i atsaceju tik, ka maņ taišni kaids kū pavaicuoja. Pošreizejī dorba pīnuokumi i ari pošys inicitativa atsasaukt vysim aicynuojumim braukt iz školom i bibliotekom i stuosteit bārnim par latgaliskū ir lykuši maņ suokt daudzi runuot. I, koč i maņ pošai ruodīs, ka publiska runuošona maņ vēļ daudzi juosavuica, cyti soka, ka īmūt teiri labi. :)
Karteņā: Laura Melne (nu lobuos) i Inese Ruka, tiergojūt "Volūdys" gruomotys 2026. gods latgalīšu kulturys goda bolvys "Boņuks" ceremonejā.
Kas nu “Volūdys” dareituo tev ruodīs vysusvareiguokais?
Maņ ruodīs, ka vyss, kū dora “Volūda”, ir svareigs. Ka i varbyut kaidu reizi ruodīs, ka koč kam nav jāgys, vāluok izaruoda, ka vystik ir. Tu nikod navari zynuot, kas kaidam cylvākam var pasaruodeit svareigai i maineit juo dzeivi. Kluotyn vēļ – niu latgalīšu volūda ir taidā situacejā, ka kotram pasaceitajam i pīraksteitajam vuordam latgaliski ir nūzeime. Vysusvareiguokais ir tys, ka “Volūda” ci “LgSC” laika gaitā ir vysaiži puorsamejuse, tok vys vēļ ir i turpynoj augt i dareit.
Karteņā: asūšī i bejušī portala lakuga.lv redaktori 2016. godā, Jurs Viļums (nu lobuos), Edeite Laime, Vineta Vilcāne-Toca i Laura Melne
Kaids ir tovs meiluokais voi svareiguokais pīdzeivuojums, nūtikšona, dareitais bīdreibā?
Laikam jau tys ir stuosts par “Sunānu breiveibā”. Pandemejis laikā beju škūrstejuse kaidu cytu maņ jau pazeistamuos muokslineicys Viviannys Mariis Stanislavskys ilustrātu gruomotu i īsadūmuojuse, ka nazkū taidu – myusdīneigu izdavumu bārnim – vajadzātu ari latgaliski. Kod tyku “LgSC” vaļdē, vajadzēja dūmuot idejis, i pastuosteju itū. Edeite i Kristīne, ar kū kūpā bejom vaļdē, pīduovuoja, ka es tod poša varbyut varātu raudzeit byut gruomotys teksta autore. Dorbs pi gruomotys beja breineigs, bet maņ nabeja nikaidu lelu dūmu i cereibu, ka gruomota tiks cīši īvāruota. Pyrmais publicitatis viļņs beja nagaideits, piečuok sekuoja Baltvilka bolva, tod “Boņuks”. Niu piec gruomotys motivu ir radeita Leļu teatra izruode. Voi es par koč kū taidu īsadūmuoju tūreiz, kod Zoom formata sēdē pyrmūreiz treisūšom rūkom stuosteju itū ideju Edeitei i Kristīnei? Nūteikti nā. I niu ir sajiuta, ka gruomota i maņ tik personeigi meilais Sunāna vuords dzeivoj sovu dzeivi. Itys eistyn ir gadīņs, kod pīsapylda na sapyni, tok tys, par kū nikod nabyutu variejuse pat īsadūmuot sapynuot.
Karteņā: Vivianna Maria Stanislavska (nu lobuos), Laura Melne i Edeite Laime Baltvilka bolvys ceremonejā 2024. godā.
Tovs vielejumus “Volūdai” kustynuošonai iz prīšku!
Vydsškolys laikā maņ ruodejuos, ka “Latgolys Studentu centrs” ir breineiga organizaceja, kurā sovūs studeju godūs nūteikti gribiešu dorbuotīs. Jau tūlaik pamozam īpazynu tuo bīdrus, kas izaruodeja cīši jauki i atsauceigi cylvāki. Iz reizis sasajutu pījimta i sovejūs vydā, lai ari, kai jau pīminieju, tūreiz beju cīši kautreiga. Grybātūs vielēt, lai “Volūda” vysod cylvākim ruodeitūs kai organizaceja, kurā gribīs byut, i, teikūt tamā, iz reizis byutu sajiuta, ka esi sovejūs vydā. Deļtuo ka taišni tys maņ ruodīs vīns nu golvonūs “Volūdys” spāka punktu – atvierteiba jaunim ļaudim, jaunom idejom, vysaiduokim redzīnim i vierzīnim.
Biļdis nu Laurys Melnis personeiguo arhiva.
____________________________
Latgalīšu kulturys kusteibys “Volūda” aktivitatis 2025. i 2026. godā finansiali pabolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.
