Tūp jauna Laurys Melnis gruomota – stuosts “Babys duorzā (kā es negāju bērnudārzā)”
Latgalīšu kulturys kusteiba “Volūda” i rodūšuo komanda itūšaļt struodoj pi Laurys Melnis jaunuos gruomotys bārnim i jūs vacuokim – stuosta “Babys duorzā (kā es negāju bērnudārzā)” maketa, kura izdūšona gruomotys veidā teik carāta ituo gods golā.
Laura Melne kai literate sevi spūdri dasaceja sadarbeibā ar muokslineicu Viviannu Mariu Stanislavsku topušajā komiksā latgaliski “Sunāns breiveibā” (2023), kas veicynuoja kai bārnu, tai juos vacuoku interesi par myusu dīnu dorbim bārnim latgaliski. Jaunais stuosts – “Babys duorzā (kā es negāju bērnudārzā)” viestej par bārnuduorza vacuma meitini Aiju, kurai vīnu breivu vosorys mienesi daīt pavadeit laukūs pi babys. Suokuos jau ir gryuts pījimt pasauli, kurā ir moz monta i dzeivis ritmys atsaškir nu piļsātā īrostuo, bet baba spiej jai parauodeit, ka ar īsadūmuošonys paleidzeibu var izburt pošai sovu pasauli i tikt sevkurā vītā, kur viņ gribīs. Kai soka stuosta autore, vīns nu gruomotys mierku ir paruodeit cīšū saiti, kas spiej izaveiduot bārnu i senioru vydā, akcentēt lelū beznūsacejumu mīleibu, kū tei var dūt. Jaunuos gruomotys mierkauditoreja ir bārni nu četru da ostoņu godu vacuma, kai i saimis ar jaunuokim bārnim, kurim prīškā varātu skaiteit jūs vacuoki.
Komikss “Sunāns breiveibā” dabuoja latgalīšu kulturys goda bolvu “Boņuks 2023”, bet stuosta autore Laura Melne 2024. godā Storptautyskajā J. Baltvilka bolvā sajēme Latvejis Vaļsts mežu bolvu “Jaunaudze” par debeju bārnu literaturā. Laura papyldynuojuse zynuošonys par kulturys satura taiseišonu bārnim Valmīrys vosorys teatra festivala organizātajā Bārnu i jaunīšu teatra instituta apvuiceibu programā, taipat daudzi gastejuse pi bārnu vysā Latvejā, stuostūt par latgalīšu volūdu. Taišni regularuos sasatikšonys davušys sajiutu, ka itūreiz, paleidzūt vīgluok saprast latgaliskū, stuostam paraleli vajadzātu ari verseju standarta latvīšu volūdā.
Gruomotys ilustratore ir Latvejis Muokslys akademejis scenografejis nūdalis absolvente i grafikys magistrantura programys studente Dana Deineko, kurai itei ir debeja bārnu gruomotu ilustriešonā, bet Dana taipat kai Laura zynuošonys papyldynuojuse Bārnu i jaunīšu teatra instituta apvuiceibu programā. Kai soka Dana, tod juos ideja, zeimejūt ilustracejis Laurys gruomotai, ir dabuot sajiutu, kod nu vīnkuoršu lītu, gondreiž na nu kuo, var radeit i atkluot jaunus pasauļus – nazkas, kam suokuos nav tykuse dagrīzta viereiba, bet piečuok jis palīk par vīneigū elementu, ar kurū pasaspēlēt. “Itymā gadīnī tei ir napuortraukta lineja, kurei izavej cauri vysom puslopom nu vuoka da vuoka. Jei pastreipoj, nūrūbežoj, aplīk par golvonū varūni i pīpuļdej vysu atvārumu, palīk par škiersli, īsasprauc tekstā, rozapleš, taisa situletus i tai tuoļuok. Skaitu, ka muns aizdavums ir radeit ilustracejis, kas narunoj ni latvyski, ni latgaliski, bet pošys sovā vizualajā volūdā,” stuosta gruomotys “Babys duorzā (kā es negāju bērnudārzā)” ilustratore Dana Deineko. Latgalīšu kulturys kusteibai "Volūda", atteistūt latgalīšu literaturys nūzari, vysod ir bejs svareigi dūt vuordi debitantim kai literaturā, tai gruomotu muokslā, deļtuo prīca par vēļ vīnu sadarbeibu, kas boguotynoj pīredzi itamā sferā.
Karteņā: tūpūšuo izdavuma ilustraceju fragmenti, autore Dana Deineko
Pi gruomuotys dizaina i maketa versejis struodoj ari profesionala dizainere Liāna Merņaka, kura ir “Volūdys” jau izdūtūs izdavumu – Anitys Mileikys dzejis kruojums “ziņas par gadalaikiem”, Evijis Piebalgys “Brīnumdārzs” – maketātuoja.
Jaunuo izdavuma redaktore ir literate Ilze Sperga, bet korektore – Muora Mortuzāne-Muravska, projekta vadeituoja – Edeite Laime. Itūšaļt teik eistynuots stuosta izdūšonys projekta pyrmais pūsmys pi gruomotys maketa sagataveišonys – Laurys teksta redigātuos i korekturys versejis sagataveišona, ilustraceju radeišona i maketa izstruode. Manuskripta i maketa sagataveišonys dorbus atbaļstejs Vaļsts kulturkapitala fonds, bet pošys gruomotys izdūšonai finansiejumu vēļ vajadzēs meklēt. Gruomotys komanda tur nūceju, ka pi skaiteituoju izdavums varātu tikt da ituo gods gola.
Ka kaids grib atbaļsteit “Volūdys” dorbu, izdūdūt Laurys Melnis jaunū stuostu, tū var izdareit tepat “Volūdys” sātyslopys pyrmajā sadaļā “Atbaļsteit”, izalosūt konkretu mierki atbaļsteišonai (pi kategoreju “Izdevnīceiba” voi “Augšona”).
Golvonajā biļdē – gruomotys maketa plānuošona, foto Liāna Merņaka