Dzeja, proza i latgalīšu literaturys populariziešona uorzemēs – ituo gods plāni rodūšūs rezidenču programā Lūznovys muižā
Nūsaslāguse dasasaceišona Lūznovys muižys i latgalīšu kulturys kusteibys “Volūda” eistynuotuos rodūšūs rezidenču programys literaturā, volūdnīceibā i Latgolys pietnīceibā 2026. gods rezidencem. Ītūgod rezidencēs tiks raksteita dzeja pīaugušajim i bārnim, struoduots pi prozys dorbu, kai i byus dorbs pi kataloga ar tulkuojumim latgalīšu literaturys populariziešonai uorzemēs.
Ūtrajā rezidenču programys godā četrom rezidentu vītom sajimti 15 interesentu dasacejumi, kurūs izviertejūt, pīsadaleišona rezidencēs apstyprynuota literatim mygluojam, Annelei Slišānei i Inetai Atpilei-Juganei, kai ari tulkuotuojam Džeidam Vilam, kas pīsavīnuos īprīšk zynomajom ituo gods programys dalineicom — Ligijai Purinašai i Valijai Platacei.
Rezidenču programa, kurei itūgod ir vīna nu Latgalīšu kulturys goda bolvys “Boņuks 2025” nominantu i nūtiks ūtrū reizi, paradzāta latgaliski rokstūšajim literatim, tulkuotuojim, žurnalistim, scenaristim, latgalīšu volūdys, literaturys i Latgolys kulturys pietnīkim, jūs vydā ari uorzemu literatim, kas roksta latgaliski, voi uorzemu literatim i pietnīkim, kas roksta ap Latgolu voi pietej Latgolys kulturu i tulkoj nu/iz latgalīšu volūdu. Programys mierkis ir veicynuot latgalīšu volūdys, literaturys i latgalistikys atteisteibu i populariziešonu, nūdrūsynojūt platformu augstvierteigu daildorbu latgalīšu volūdā i Latgolai veļteitu pietejumu pīaugumam.
Itūgod, pasakūt Vaļsts kulturkapitala fonda i Rēzeknis nūvoda pošvaļdeibys atbolstam, ir vareiba programā uzjimt sešus rezidentus. Divejis rezidentis ir pārnejuo gods literarūs konkursu – dzejis slama “Rogovkys dzejis voga” i “Latgolys prozys skaitejumi” – uzvarātuojis Valija Platace i Ligija Purinaša. Iz puorejom četrom rezidentu vītom atkluotajā konkursā sajimti 15 dasacejumi, kurūs izviertejūt, sasprīsts, ka rodūšuo dorba laiku rezidencēs Lūznovys muižā byus vareiba izmontuot mygluojam, struodojūt pi pyrmuo dzejis kruojuma, Annelei Slišānei, aizsuocūt leluoka apjūma prozys dorba raksteišonu, Inetai Atpilei-Juganei, pīsavieršūt dzejis gruomotys bārnim radeišonai, kai i tulkuotuojam i literarajam agentam Džeidam Vilam (Jayde Will), gatavejūt katalogu latgalīšu literatu dorbu populariziešonai uorzemēs. Ar rezidenču programys dalinīku dorbim piečuok byus vareiba īpasazeit kotram interesentam – jūs fragmenti atkareibā nu autora sagataveituos publikacejis byus puorskaitomi latgalīšu kulturys ziņu portalā lakuga.lv.
Pārņ, aizsuocūt rezidenču programu, jamā pīsadaleja pīci rezidenti, nu kurūs diveji beja literarūs konkursu uzvarātuoji, bet treis pīsasaceja atkluotajā uzsaukumā i muiža deve vareibu rezidencis izmontuot vysim grybātuojim. 2025. gods rezidencēs literate Dagneja struoduoja pi ūtruo dzejūļu kruojuma “Mīleibys volūdā”, konkursa “Latgolys prozys skaitejumi 2024” uzvarātuoja Inga Kaļva-Minina rezidencis laikā pabeiguse garstuostu bārnim latgaliski “Sirdsbolss” i pīrakstejuse apceri, latgaliskuo dzejis slama “Rogovkys dzejis voga” uzvarātuojs Silvestrs struoduojs pi debejis dzejis kruojuma “Lāčus plēst un velnus kaut”, tulkuotuojs Laurs Magazeiņs rezidencis laikā gatavejs myusu dīnu ukraiņu literaturys autora Artema Čeha dorba “D rajons” fragmentu tulkuojumu latgaliski, bet muzikis Ingars Gusāns (Sovvaļnīks) dorbuojīs ar muzykys materialu jaunajam albumam “Cārtumi”.
Itūgod sajimtī 15 dasacejumi aplīcynoj augūšū autoru interesi par jaunū vareibu rodūšajam dorbam i līk ticēt, ka rodūšūs rezidenču programa paliks par nūzeimeigu atbolsta punktu latgalīšu literaturys i volūdys styprynuošonā. Lūznovys muižys kulturys projektu vadeituoja Inga Žirgule prīcojās, ka rezidenču programys potencialu i nūzeimi aplīcynoj kai Vaļsts kulturkapitala fonda daškiertais finansiejums, tai leluo autoru interese. “Dasacejumu skaits skaidri paruoda, cik cīši rodūšajim cylvākim ir vajadzeiga telpa i laiks natraucātam, koncentrātam dorbam. Cīši žāļ, ka navarim dūt vareibu kotram grybātuojam – dasacejumūs beja tik daudzi breineigu plānu! Kai rodūšs cylvāks poša cīši nūvierteju laiku, kū var veļteit natraucātom dūmom i dorbam. Nu sarunu ar pārnejuo gods rezidentim dabuojom aplīcynuojumu, cik vajadzeigs autorim ir itaids formats. Eipaši tys svareigs jaunim autorim i tim, kurim īsastuojs “klusuma periods” i mierktīceiga koncentriešonuos dorbam i tam pīmāruota vide, kaida ir Lūznovā, dūd jaunu spāku. Tycam, ka rezidenču programa styprynuos naviņ pošys muižys, bet i vysa regiona kulturys identitati, kam rezidencis paliks par eipaši spāku dūdūšu telpu latgalīšu volūdys lītuojumam i literarajai jaunradei,” soka Inga Žirgule.
Latgalīšu kulturys kusteibai “Volūda” īsasaisteišona rezidenču programys eistynuošonā ir daļa nu latgaliski radeitys literaturys veicynuošonys dorba, kas teik eistynuots kai ar jaundorbu publiciejumim portalā lakuga.lv, vairuokim literarajim konkursim, tai i ar prozys i dzejis dorbu izdūšonu, eipaši atbolstūt jaunu literatu debejis dorbu tapšonu.
Rezidenču programa juos dalinīkim Lūznovys muižā nūdrūsynoj uzaturiešonu, ādynuošonu, kai i rodūšuo dorba stipendeju. Programys byušonu finansiali atbolsta Vaļsts kulturkapitala fonds, Rēzeknis nūvoda pošvaļdeiba i latgalīšu kulturys kusteiba “Volūda”. Taipat kotram interesentam ar zīduojumu platformā http://voluda.lv ir vareiba atbaļsteit Lūznovys muižys i “Volūdys” rezidenču programu, paleidzūt idejai i vēļ kaidai rodūšai personeibai pīdzeivuot rezidencis laiku muižā.