Socialūs medeju teiklā Facebook vyspopularuokais īroksts beja biļžu galereja nu grupys “Dricānu dominante” 20 godu jubileja koncerta. Tok Instagram vysuvaira cylvāku sasnēdze karteņu karuseļs nu prezidenta Edgara Rinkēviča gasteišonys reizis Viļānūs.

Portala apmaklātuoju skaits 2025. godā

Aizvadeitajā godā portalā gastejuši i myusu saturu skaitejušys 42 000 cylvāku.

Publicātais saturs

2025. godā portalā publicāti 437 roksti, nu kurūs 26 literaruos pyrmpublikacejis. Taipat portalā publiciejušīs ari 34 uorštata autori. Vysus rokstus bez moksys vari atrast lakuga.lv arhivā ITE.

Myusu skaiteituoji cīši īmeiļuojuši ari portala kalenderi, kurā itūgod īvītuotys 1040 latgaliskuos nūtikšonys.

Portala redakceja

Aizvadeitajā godā portala redakceja drupeit pasameja. Štatā pīsavīnuoja žurnaliste Anželika Litvinoviča, ar kurū portals sadarbeibu aizsuoce jau 2024. godā. Taipat pusgodu žurnalistis pīnuokumus piļdeja ari Kristīne Pokratniece. Kaidu šaļti portala komandā dorbuojuos ari Inta Marija Savicka. Tok goda golā praksi portalā lakuga.lv suoce Latvejis Universitatis latvistikys studente Indra Koroļonoka.

Sajimta atzineiba Latvejis medeju volūdys bolvā

Pavasarī nūtyka akcejis “Latvejis medeju volūdys bolva 2024” apbolvuošonys ceremoneja, kurā laureatu vydā par latgalīšu volūdys lītuošonu medejūs gūdynuoti latgalīšu kulturys ziņu portals lakuga.lv i Latgolys regionaluos televizejis žurnaliste Ausma Sprukte-Kozule. Vaira par bolvu ITE.

Sadarbeibys

Ari 2025. gods naizpalyka bez sadarbeibu. Jau deveitū godu kūpā ar latgalīšu kulturys kusteibu “Volūda” i Latvejis Radejis Latgolys studeju asam organiziejuši diktatu latgaliski. Diktatu pīraksteit vēļ arviņ var ITE.

Nūorganizāta ari jau septeituo Latgalīšu kulturys goda bolvys “Boņuks” publikys simpatejis bolsuojuma bolva “Žyks” kūpā ar kasgadejim partnerim LSM. Itymā godā tū dabuoja projekts “Pazudušū pādu retrospekceja”. Interveju ar projekta idejis autorim var puorskaiteit ITE.

Jau vairuokus godus portala lakuga.lv puorstuovis Edeite Laime i Laura Melne žurnalam “A12” gatavej jaunuokū latgalīšu gruomotu i muzykys izdavumu rubriku. Taipat cīša sadarbeiba izaveiduojuse ar Latgolys regionalū televizeju, kurī portalu lakuga.lv izavielej kai platformu sova radeituo satura atspīgeļuošonai.

Veiduots saturs ari audio formatā

2025. godā portals lakuga.lv suoce viesteit ari audio formatā. Goda suokumā izguoja raidīroksts “Mīti”, kurā pīcuos serejuos tyka runuots par temom ap muzyku, medejim, volūdu, teatri i latgaliskū. Vysys epizodis daīmamys Spotify, Youtube i Apple Podcasts. Pasasokūt Medeju atbolsta fonda daškiertajam finansiejumam, 2026. godā izīs ari raidīroksta ūtrei sezona.

Tok goda ūtrajā pusē izguoja Latvejā pyrmais raīdīroksts, kas piļneibā veļteits kulturys i vaļsts aizsardzeibys mejīdarbeibai. Vysus raidejumus var klauseitīs taiduos straumiešonys platformuos kai Youtube, Spotify i Apple Podcasts. Raidīroksts taiseits ar Latvejis Republikys Aizsardzeibys ministrejis finansialū atbolstu. Projektu realizēja latgalīšu kulturys ziņu portals lakuga.lv, raidīroksta informativais atbaļsteituojs – Latvejis Sabīdryskuo medeja portals lsm.lv.

Sabīdryskuo īsaiste

Portals ari 2025. godā breivpruoteigi īsasaisteja vairuokuos nūtikšonuos. Asam pīsadalejuši projekta “Daudzvalodība Eiropas mainīgajā mediju sfērā” seminarā RTU Rēzeknis akademejā, bīdreibys “Cita Daugavpils” organizātajā pasuokumā “Mediju brančs. Jauniešu balsis reģiona noturībai”. Taipat jau ūtrū godu asam puorstuoviejuši žureju Latvejis kulturys kanona konkursā. Asam ari izsacejuši sovu redzīni Latvejis Radejis Latgolys studejis veiduotajā raidejumā “Latgolys stuņde”, kai ari ar latgalīšu rokstu volūdys darbneicom pīsadalejuši vysaidūs pasuokumūs.

Pīsaisteitais finansiejums

Latgalīšu kulturys ziņu portalu lakuga.lv jau septeņpadsmit godu uztur latgalīšu kulturys kusteiba “Volūda”. Paļdis Sabīdreibys integracejis fondam, Vaļsts kulturkapitala fondam i Aizsardzeibys ministrejai par projektu konkursim, lai latgaliski varim dareit na tik šudiņ, tok ari reitu!

Lels paļdis ari vysim individualajim zīduotuojim i reklamys deviejim, kurūs atbolsts paleidzējs nūdrūsynuot portala darbeibu!