Svareigi naviņ tys, kū dora bīdreiba, bet i kai poši jiutamīs | Īpasazeistam ar “Volūdys” kustynuotuojim
Dūmojūt par “Volūdys” juridiskū 20 godu jubileju i itūs godu laikā pīdzeivuotū, turpynojam īpazeistynuot ar bīdreibys kustynuotuojim. Itys stuosts byus par Guntu Ločmeli, kurai, kai jei poša nūsmej, nav breivuo laika, kam vysa kur aktivi vajag pīsadaleit.
Gunta īt nu Ludzys nūvoda Saļņovys, kur beiguse Saļņovys pamatškolu, piečuok vuicejusēs Rēzeknis Vaļsts gimnazejā, bet ar bīdreibu, kū tūlaik sauce “Latgolys Studentu centrs” (LgSC), īpasazynuse viesturis studeju laikā Rēzeknis Augstškolā. Gunta sovulaik bejuse ari bīdreibys vadeituoja i cīši aktivi kustynuojuse Daugovpiļs biroja nūtikšonys. Daugovpilī jei dzeivoj vēļ arviņ, deļtuo, kod bīdreibai ir kaidi pasuokumi voi aktivitatis tamā piļsātā, vysod var pasaļaut iz Guntys atbolstu i kluotyn byušonu.
"LgSC" puiši īt tolkā folklorys kūpys "Dyrbyni" videoklipa fiļmiešonā 2017. godā
Kū tu niu dori?
Niu es struodoju Daugovpiļs vaļstspiļsātys pošvaļdeibā, asu sabīdriskūs attīceibu specialiste. Breivuo laika maņ nav, partū ka navaru nūsēdēt mīrā – asu zemissorgs, reizi nu reizis muziceju ar folklorys kūpu “Dyrbyni”, raugu byut nūdereiga ari “Volūdai” i bīdreibai “Cita Daugavpils”. Mani ir īsaukuši ari par Ruskulovys Lurdys Dīvamuotis Romys katuoļu draudzis presis sekretaru, partū ka administreju draudzis Facebook lopu. Turpynoju raksteit dzejūļus, stuosteit lobys lītys par dzeivi Saļņovā, ceptīs par vītejuos kūpīnys izaicynojumim i stuostu vysim par tū, cik gorda ir Ludzys maizneicys soldoniskuobuo maize ar captim seipulim, kab jī padareitu plotuoku sovu tierdznīceibys teiklu i tū maizi varātu dabuot ari Daugovpilī!
Kūpsapuļce Štabikā Daugovpilī 2016. godā
Kai suocēs tova īsasaisteišona bīdreibā?
Vyss suocēs ar studeju laiku Rēzeknis Augstškolā. Humanitarūs i juridiskūs zynuotņu fakultatis studentu pašpuorvaļde tūlaik daleja kabinetu ar “LgSC” i tai saguoja, ka sasadraudziejom i suoču īt iz bīdreibys pasuokumim. Tod Dagneja (Dagneja Dudarjonoka – red.) pasauce iz vīnu kūpsapuļci i atguoja apskaidreiba, ka itei bīdreiba nav viņ breivuo laika pasuokumi, bet ari nūpītnuokys lītys. Piečuok, kod jau studēju Daugovpiļs Universitatē, beja pošsaprūtami, ka juovaicoj sovejī. “LgSC” guoju praksē, tod kaidu laiku beju ari Daugovpiļs biroja vadeituoja i vaļdis prīšksādātuoja. Ruodīs, ka asu vīneiguo nu vaļdis prīkšsādātuoju, kas reali ari kaidu laiku dzeivuoja birojā. Tys beja eipašs laiks ar vysaidim pīdzeivuojumim, interesantim pasuokumim, braucīnim i sirsneigom draudzeibom, kas turpynojās ari niu.
"LgSC" Daugovpiļs kompaneja 2015. gods Zīmyssvātkūs
Tovs meiluokais voi svareiguokais pīdzeivuojums, nūtikšona, bīdreibā dareitais ir...
Tys Štabika laiks, kod “LgSC” Daugovpiļs birojs beja dzeivūklī Reigys īlā beja eistyn cīši eipašs – cylvāki, nūtikšonys, gosti, puordūmys i dzejūli. Tys laiks paruodeja, ka bīdreiba nav viņ kaids breivuo laika pavadeišonys veids, interešu aizstuoviešonys instruments, bet ari saime, kas ir sūpluok, atbolsta i verās vīnā vierzīnī.
Kai tev ruodīs – kū “Volūdys” (Latgolys Studentu centra, LgSC) darbeiba ir mainejuse Latgolys kulturtelpā?
Gryuts aptvert eisuos frāzēs. Ir bejs daudzi vysaidu projektu i pasuokumu, kas aktivizieja latgalīšus i mainieja sabīdreibys attīksmi pret latgaliskū. Bīdreiba ir mainejuse latgalīšu pošapziņu! Nu bīdreibys dareituo ruodīs, ka vyss ir svareigs. Vysys nūtikšonys, projekti – tys vyss ir bejs cīši svareigs, lai bīdreiba atsateisteitu i latgaliskais atsateisteitu leidza. Par sevi gon saceišu pīticeigai, ka es vaira asu bejuse sūpluok, nakai iniciators lelom lītom. Smejūs, ka mums paroksts stuov iz dokumenta, kod latgalīšu kulturys ziņu portalu lakuga.lv registiejom kai medeju, bet tys nav muns nūpalns, tys ir portala komandys garu godu dorbs. Raksteju stendapa tekstu, kū “Volūdys” jubilejā Latgolys viestnīceibā “Gors” skaiteja Jurs Kučinskis, i tei beja taida loba sajiuta, ka ir kū raksteit, partū ka bīdreibā vysu laiku koč kas nūteik.
Jaunīšu seminarā "Atzolys 2016" atpyutys bazē "Viškezers"
Vieliejums “Volūdys” dorbim iz prīšku!
Kusteitīs i naapsastuot! Volūda ir spāks! Bet vēļ maņ ruodīs, ka ituos jubilejis kontekstā ir daudzi runuots par dorbim ar taustomu rezultatu, tok eistineibā ir cīši daudzi personeigūs stuostu i emoceju, kas palīk ūtrajā plānā. Ir svareigi naviņ tys, kū dora bīdreiba, tok ari tys, kai mes poši jiutamīs. I itei ir vīta, cylvāki i laiks, kas vysod ir bejs pīpiļdeits ar cīši lobom sajiutom.
Kartenis – nu personeiguo arhiva.
____________________________
Latgalīšu kulturys kusteibys “Volūda” aktivitatis 2025. i 2026. godā finansiali pabolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.
