Vīna nu Latgolys kulturviesturē zynomuokūs personeibu ir dzīsminīks i zemnīku tīseibu aizstuovs Pīters Miglinīks (1850–1883). Juo dzymtai pīdareigys ir daudzys Latvejis i Latgolys viesturē nūzeimeigys personeibys. Kab izstuosteitu ituos dzymtys stuostu, bīdreiba “Volūda” sagatavejuse izdūšonai Antys Bušys gruomotu "Miglinīki laiku lūkūs".

Pītera Miglinīka personeiba ir fasciniejuse laikabīdrus i īdvasmuojuse vāluokūs Latgolys kulturys darbinīkus. Palīkūšus pādus Latvejis viesturē ir pamets na tikai P. Miglinīks, bet ari cyti juo dzymtys lūcekli, kai, par pīmāru, bazneickungs i vīna nu Latgolys Atmūdys kusteibys radzamuokūs personeibu Nikodems Rancāns, publicists i politikis Fraņcs Kemps.

Kab izstuosteitu Pītera Miglinīka dzeivis stuostu i atkluotu cytu juo dzymtys lūcekļu liktiņus i davumu na tikai Latgolai, bet vysai Latvejai, bīdreiba “Volūda” sagatavejuse izdūšonai Antys Bušys gruomotu "Miglinīki laiku lūkūs". Autore stuostu par Miglinīku dzymtu suoc ar Pītera Miglinīka seņču izpieti, izmontojūt arhivu materialus, i nūslādz ar myusu dīnu Miglinīku atmiņom, taidā veidā izstuostūt dzymtys stuostu daudzu desmitgažu garumā.

Izdavuma projekta vadeituoja ir Vineta Vilcāne-Toca, bet pi juo sagataveišonys struodoja redaktore Anna Stafecka, korektore Laura Melne i maketātuoja Daina Salmiņa.

Gruomota izdūšonai sagataveita ar Vaļsts kulturkapitala fonda, Vaļsts kulturkapitala fonda mierkprogramys “Latviešu vēsturisko zemju attīstības programma” i bīdreibys “Latgales reģiona attīstības aģentūra”, kai ari Pītera Aloiza Ragauša finansialu atspaidu. Gruomotu nūdrukuot i padareit daīmamu sevkuram interesentam plānuots 2026. godā.