Bīdreibys dybynuošona aiz speita | Īpasazeistam ar “Volūdys” kustynuotuojim
Nūsvietejūt “Volūdys” juridiskūs 20 godu jubileju i atguodojūt itūs godu laikā pīdzeivuotū, turpynojam īpazeistynuot ar bīdreibys kustynuotuojim. 13. apreļa stuosts byus par taišni ituos dīnys jubilaru – Juri Viļumu (voi plotuok pazeistamu kai Jureiti), kurs ir pats pyrmais bīdreibys vaļdis prīšksādātuojs i vyspuor “vaineigs” pi oficialys bīdreibys dybynuošonys.
Vaicojūt, kai roduos ideja par bīdreibys dybynuošonu, Jureits stuosta, ka vajag par reizi nūdaleit bīdreibys dorbuošonuos pyrma oficialuos nūsadybynuošonys i piec tuos. Jau nu 80. godu beigu latgalīšu studenti guoja kūpā i meklieja veidus, kai latgaliskumu izviļkt nu dziļūs koktu – lai nav tikai “parunuosim sātā, nu, varbyut ari bazneicā”. Taiseja aptaujis, sadūmuoja reikuot nūmetni školuotuojim “Vosoruošona”, vēļ pyrma oficialuos 2005. goda nūsadybynuošonys īspiejom īrunuot bazneicys puorstuovus i volūdnīkus atsasēst pi vīna golda i salikt gramatiku tai, kab volūda varātu aktivuok dzeivuot ari rokstūs. Kluotyn nūtyka čyguonūs īšonys i cytys jaunīšu kūpā saīšonys, kas pīsadar jaunim ļaudim. Tok vysys ituos darbeibys beja ar puortraukumim, da jauna entuziasta, kurs uzajēme kū naviņ sareikuot i tod varēja byut garuoks klusums. Tai suoktuos “vacuo” bīdreibys turpynova sovys tradicejis, tok jaunu iniciativu praktiski nabeja. Deļtam 2005. godā kūpā ar Arvi Soldānu Daugovpilī izdūmovam, ka vajag vystik izveiduot oficialu bīdreibu, kab byutu regulara darbeiba, koč kaids sistematiskums i, kū tī slēpt, ari kaidys īspiejis pretendēt iz projektu konkursu finansejumu. Paļdis vajag saceit Ilzei Mežinīcei (ilggadejai “Vosoruošonys” reikuotuojai), kas pasaceja – “Nikas tī jums nasaīs!” Deļ tam, ka da tuo “Latgolys Studentu centrs” (LgSC) beja eistyn taida naformala dūmubīdru kūpa, kas nūsaturēja iz sovstarpejuos uzaticiešonys placu i iz plyka entuziasma. Ilzis saceitais laikam dzili īknībe i gribiejuos pīruodeit, ka saīs gon!
Latgolys Studentu centra aktivitatēs ("Vosoruošonā")
Kai tev ruodīs – kū “Volūdys” (Latgolys Studentu centra, LgSC) darbeiba ir mainejuse Latgolys kulturtelpā?
Da tuo latgalīšim nabeja vīnuota informacejis olūta škārsteiklā – niu ir lakuga.lv. Bīdreiba dalykuse rūku daudzu jaunu ideju eistynuošonai, kurom taišni organizacejis īkruotuo projektu pīredze deve lobu reputaceju, kab tyktu pi nuokušuo atbolsta. Na izreiz, bet pakuopeniski, it seviški, ar Edeitis īīšonu bīdreibā iniciativys palyka stypruokys i pamateiguokys, kas kūpumā nūstyprynova latgalīšu byušonu iz NVO sektora skatuvis.
Bīdreibys pyrmsuokumūs mes raudzejom ari savest kūpā vysys latgalīšu bīdreibys i kūpā aktivuok sasadorbuot, kūpā apsavērt, kurys jūmys varam lobuok nūsegt i padareit vairuok lobūs dorbu. Ka nasamoldu, jau 2007. godā beja sareikuots kūpeigs Latgalīšu navaļdeibys organizaceju kongress Leiksnā – tūlaik beja lela puorstuovnīceiba nu bīdreibu – sapazynom, apsamainejom ar kontaktim, pījēmem kūpeigus lāmumus, tok juopīzeist – kotram sovu dorbu daudz i pi kūpejūs na vysod pītyka spāka pīsagiut. Ari maņ tryuka zynuošonu i prasmju, kai vysus saturēt vīnuotā mehanismā. Tok bīdreibu sadarbeiba turpynojās vysmoz tod, kod ir vajadzeiba paust kaidu skaļuoku vuordu nu Latgolys pusis i tod kūpā līkam parokstu iz kūpeigom viestulem vaļsts īstuodem ci paziņuojumim presei.
Jau nu bīdreibys izveiduošonys, maņ svareigi beja dareit, kab nuokamajim jaunīšim, kam byus interese i gribiešona koč kū dareit latgaliskajā sabīdryskajā laukā, nabyutu otkon vyss juosuoc nu jauna. Niu ir tradicejis, ir pīredze, ir cīši loba reputaceja, ir dareit gribūši ļauds i ir redzīņs iz prīšku – tys pats golvonais!
Festivala "Muzykys Skrytuļs" pyrmsuokumūs
Kai dorbuošonuos “Volūdā” ir ītekmiejuse tovu dzeivi?
2003. godā puorskaiteju kaidu nu Ontona Slišāna rokstu i tys maņ golvā lyka aizdūt tik daudz vaicuojumu, deļkam latgaliskajā sabīdryskajā dzeivē (kai maņ tūreiz izavēre) praktiski nikas nanūteik? Tai pa druskai atrodu dūmubīdrus nu tūreizejuo “LgSC” i es aizviņ vairuok izzynovu i vairuok īsasaisteju latgaliskajā. Kūpumā tys vyss gona pamateigi sagrīze ari munu dzeivi – praktiski leluokuo daļa munys dzeivis niu jau vairuok nakai 20 godu ir tīši voi pastarpynuoti saisteiti ar latgaliskū i ar Latgolu. Juosoka – tei jau da šam beja breineiga pīredze i byus vēļ! Vyspuor izpratne par sovom latgaliskajom saknem deve papyldu pošapziņu i puorlīceibu par vajadzeibu īsastuot par taisneibu. Pījemu, ka taišni muna dorbuošonuos latgaliskajā vidē deve pyrmū uzaticiešonu nu cylvāku, lai 2011. godā palyktu ari par Saeimys deputatu. Niu ir tai, ka saprūtu ari lelū atbiļdeibu vacūs latgalīšu i nuokūtnis latgalīšu prīškā i deļ tam ir svareigi salikt golvonuos doromuos lītys, lai mes naizškeistu mozūs lītu dareišonā, bet ar kotru nuokamū sūli tyktu pi lobuoku rezultatu kai latgaliskumam, tai Latgolai kūpumā.
Bīdreibys kūpsapuļce 2009. godā
Kas nu “Volūdys” dareituo tev ruodīs vysusvareiguokais?
Eisuo atbiļde – vyss ir svareigs. Vosorys nūmetnis školuotjim i jaunīšim, skaistu gruomotu izdūšona, portala lakuga.lv napuortraukts dorbs jau nu 2007. goda, paleidzeiga rūka pi ortografejis vaicuojumu sakuortuošonys, vysaidys muzykalys i literarys nūtikšonys, daleiba storptautyskūs projektūs, sovulaik pīsadalejom ari latgalīšu volūdys atbolsta piketūs Reigā, vysaidys troki lobys lītys nūtykušys. Ka ir diveji latgalīši, kurim ir kūpeiga ideja, jī var īt i tū eistynuot ar “Volūdys” paleidzeibu.
Čyguonūs īšona
Tovs meiluokais voi svareiguokais pīdzeivuojums, nūtikšona, dareitais “Volūdā”...
Aktivuokais beju bīdreibys pyrmsuokumūs. Tūlaik kūpā ar leiksnīšim reikovam festivalu “Muzykys Skrytuļs”, kas īnese jaunu atspaidu latgaliskuos muzykys radeituojim, jau izreiz izveidovam portalu lakuga.lv (piec Valentina Lukaševiča pīspēlis) – lai ari suokumā nabeja tī daudz rokstu, tok uzturiejom regularitati. Pīmiņu, ka pats deļ seve pījiemu lāmumu, ka juoteik skaidreibā, kurs tod vaļstī eisti atbiļd par tuo Vaļsts volūdys lykuma pantu, ka “vaļsts nūdrūsynoj latgalīšu rokstu volūdys (..) aizsardzeibu, saglobuošonu i atteisteibu”? Tūlaik suocēs gona aizraujūša vairuoku mienešu sarakste ar ministrejom, īstuodem, ari vaļsts prezidenta kancelelu, kas, prūtams, tikai pīruodeja, ka tī nūteik tikai sovstarpejs “futbols” i nivīns par tū atbiļdeibu uzajimt nagrib, tok tuo rezultatā delfi.lv nūpublicēja munu rokstu, kuram pīmiņu beja cīši daudz komentaru – vairuok par 500. Tys beja “komentaru karu” zalta laikmets. Piec tam muns aizdavums beja paleidzēt i, cik varu, atbaļsteit nuokamūs. Prīcojūs, ka piec tam leluokū dali dorba jau uzajēme citi – Edeite Husare, Ilze Sperga, Vineta Vilcāne, Laura Melne i vysi citi aktivī latgalīši! Svareigi, ka ir piecteceiba i dorbu turpynuojums, kas niu jau ir vainagovīs ari jaunā bīdreibys nūsaukumā i plotuokā bīdreibys identitatē. Ka pošā suokumā muns leluokais pīdzeivuojums varēja byut čyguonūs īšona pa Viļānu sātom, tod niu, kai redzit, bīdreiba “Volūda” ir vīns nu leluokūs, ka na pats leluokais latgaliskūs procesu kustynuotuojs Latgolā, Latvejā i iz pasauļa.
Kaidus spāka vuordus, vielejumus tu varātu īdūt “Volūdai” dorbim iz prīšku?
Naatsastuot! Myusu kūpejuo miseja ir seneja, gaiša i cīš svareiga nuokūtnis Latgolai – es saceitu vysai latvīšu nacejai! Tys tai skaļūs vuordūs. A deļ kotra cylvāka, deļ kotra latgalīša tei ir cīši lela boguoteiba – apjaust sovu identitati, apjaust sovus spākus i saprast, ku tu naesi vīns “taids troks” iz ituo pasauļa. Vēļ daudz lobu dorbu prīškā! Kaids byus tovs nuokamais latgaliskais pasuokums?
Golvonuo biļde – Dagneja Bernāne ("Volūdys" 20 godu jubilejs), puorejuos biļdis – nu bīdreibys arhiva.
____________________________
Latgalīšu kulturys kusteibys “Volūda” aktivitatis 2025. i 2026. godā finansiali pabolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.
