Daīmami Lūznovys muižā nūtykušuo seminara "Spāka LAB" video īroksti
Catūrtdiņ, 13. novembrī, Rēzeknis nūvoda Lūznovys muižā nūtyka rodūšuo seminaru cykla “Spāka LAB” seminars, kurā beja vareiba izzynuot plotuok par vītu i kulturtelpu zeimynu radeišonu, pošvaļdeibu vareibu latgalīšu volūdys populariziešonā i kūpīnu īsasaisteišonu vysaida leimiņa kulturvidis pasuokumu eistynuošonā. Seminaru reikuoja latgalīšu kulturys kusteiba “Volūda”, sasadorbojūt ar Latvejis Nacionalū kulturys centru.
13. novembrī nu 10 da 15 stuņžu Rēzeknis nūvoda Lūznovys muižā nūtiks seminars “Spāka LAB”, kura tema itūgod beja veļteita vairuokim Latgolys kulturtelpā aktualim vaicuojumim. Niu pīduovojam kotram interesentam īpasazeit ar stuosteituoju prezentacejom ari video formatā.
Rēzeknis nūvoda Kulturys i turysma puorvaļdis vadeituoja Daiga Miščenko stuosteis Rēzeknis nūvoda pīredzi latgalīšu volūdys populariziešonā, kas ir vīns nu aicynuojumu pošvaļdeibom Latvīšu viesturyskūs zemu lykuma kontekstā.
Režisore Marika Čerņavska nu Ludzys pasadaleis ar pīredzis stuostu ap kūpīnys īsasaisteišonu vysaida leluma projektūs, veidojūt kruosainuoku Ludzys kulturvidi.
Zeimynu vadeibys eksperte i pietneica, kai ari “Vydzemis lībiskuos kulturtelpys” vadeituoja Lolita Uozuoliņa (Ozoliņa) stuostā “Kulturtelpys zeimynu veiduošona praksē: kai atrast i stuosteit sovys vītys stuostu” pasadaleja ar pīmārim nu vysaidu kulturtelpu, kurūs vydā byus lībīšu i sieļu, kai i Upeitis pīmāri, kai i pastuosteja, deļkuo zeimynu vadeiba ir dereigs instruments dorbā ar kulturys i kulturys montuojuma saturu.
Seminara mierkis beja rūsynuot Latgolys kulturys dzeivis organizātuoju i navaļstiskūs organizaceju izpratni par zeimynu i jūs veiduošonys nūzeimi, pošvaļdeibu aizdavumim i vareibom latgaliskuos identitatis saglobuošonā, kai i rodūšim veidim kūpīnys īsaistei kulturvidis veiduošonā.
Seminarā pīsadaleja ap 30 kulturys īstuožu darbinīku i navaļstiskūs organizaceju puorstuovu nu Rēzeknis, Preiļu, Kruoslovys, Ludzys i Bolvu nūvodu, kai i Daugovpiļs i Rēzeknis vaļstspiļsātom. "Spāka LAB" Lūznovys muižā moderēja Ilze Piskunova.
Pyrmū “Spāka LAB” rodūšī seminari, kas veļteiti Latgolys kulturys dzeivis organizātuoju i navaļstiskūs organizaceju puorstuovu kapacitatis styprynuošonai i apsameišonai ar idejom, nūtyka 2023. gods suokumā. Da ituo seminari, kurūs runuots par komunikacejis prasmu styprynuošonu, jaunīšu īsasaisteišonu tradicionalajā kulturā, jaunu pasuokumu ideju radeišonu, sadarbeibu ar medejim, latgalīšu volūdys lītuošonu publiskajā vidē i cytim tematim, nūtykuši Kuorsovā, Daugovpilī, Preiļūs, Leivuonā, Bolvūs i Rēzeknē, bet itūgod seminara nūtikšona paradzāta Rēzeknis nūvodā – Lūznovys muižā. Rodūšūs seminaru cyklys teik reikuos sadarbeibā ar Latvejis Nacionalū kulturys centru, bet jū atbolsta Latvejis Republikys Kulturys ministreja.
Seminaru cykla nūsaukumā, kas sovulaik rodīs latgalīšu kulturys kusteibys “Volūda” i kulturys instituta “New East” sadarbeibā, ar latgaliskū vuordu “spāks” īlykta spieju ceļšona, bet “lab” ir saeisynuojums nu vuorda “laboratoreja” – vīta, kura ar idejom, eksperimentim i procesim rūnās kas jauns, itymā gadīnī – kulturys nūzarē regionā.
Karteņā: seminars "Spāka LAB" Lūznovys muižā, foto Sintija Sandore. Vaira biļžu nu pasuokuma galerejā ITE.