Latgolys prozys skaitejumu finalā sasatiks kai pīredziejuši prozys latgaliski raksteituoji, tai suocieji
Nu 29. novembra da 7. decembra Reigā i Rēzeknis nūvodā byus literaturys festivala “Prozas lasījumi” nūtikšonys. Festivala daļa jau vairuokus godus ir ari konkurss “Latgolys prozys skaitejumi”. Catūrtdiņ, 4. decembrī, Lūznovys muižā jaunuokuos latgalīšu literaturys interesenti aicynuoti iz konkursa nūslāguma pasuokumu, kurā byus vareiba dzierdēt ituo gods lobuokūs dorbu skaitejumus.
Konkurss “Latgolys prozys skaitejumi” nūteik sastū reizi, juo reikuotuojs ir latgalīšu kulturys kusteiba “Volūda”, nūtikšonu eistynojūt kai daļu nu literaruos jaunradis latgaliski veicynuošonys programys. Ituo gods konkursam ar moto “Kai tev dzelys?”, kas sasasauc ar vysa festivala temu, dorbus kai latvīšu literarajā, tai latgalīšu rokstu volūdā īsnēdze 15 autoru. Īsyuteitūs dorbus viertēja žureja, kurā beja konkursa “Latgolys prozys skaitejumi” pārnejuo gods uzvarātuoja, žurnaliste i gruomotu blogere Inga Kaļva-Minina, tulkuotuoja Māra Poļakova, tulkuotuojs i gruomotu izdeviejs Snorre Karkonens-Svensons, redaktore i žurnaliste Maruta Latkovska, taipat literaturzynuotneica i literate Ilze Sperga.
Ituo gods konkursā lobuokūs dorbu autori ir kai pīredziejuši prozys latgaliski raksteituoji, tai suocieji – Annele Slišāne, Ivo Gilučs, Laura Strode, Ligija Purinaša, Lilija Limane i Valija Platace. Konkursa uzvarātuojs tiks paziņuots 4. decembrī 18 stuņdēs konkursa nūslāguma pasuokumā, kas pyrmū reizi nūtiks Rēzeknis nūvoda Lūznovys muižā, simboliski atzeimejūt veiksmeigū ituo gods sadarbeibu latgalīšu literaturys, volūdys i Latgolys pietnīceibys rezidenču programys eistynuošonā. Konkursu varēs vērtīs ari tīšraidē, kas byus daīmama latgalīšu kulturys ziņu portalā lakuga.lv i kusteibys “Volūda” profilā socialajā teiklā “Facebook” ite: http://facebook.com/voluuda.
“Latgolys prozys skaitejumu” nūslāguma pasuokumā Lūznovys muižā interesentim byus vareiba dzierdēt vairuoku finalistu dorbus. Nūtikšonu vadeis Latgolys viestnīceibys “Gors” pasuokumu producente, Latgalīšu kulturys goda bolvys “Boņuks” koordinatore Daira Lāce, bet muzykali ar skaņdorbim, kurūs pamatā ir latgalīšu autoru dzeja, kluotyn byus muziki Dana Vasiļjeva i Mārcis Lipskis. Īīšona pasuokumā byus bez moksys. Vysus lobuokūs konkursa dorbus piečuok varēs puorskaiteit portalā lakuga.lv, bet konkursa uzvarātuojs svātdiņ, 7. decembrī, 18 stuņdēs pīsadaleis literaturys festivala “Prozas lasījumi” nūslāguma pasuokumā Reigā, teatrī-klubā “Hamlets”. Vaira par festivala “Prozas lasījumi” nūtikšonom var izzynuot ite: prozaslasijumi.lv/programma2025.
Kai pīzeist konkursa žurejis lūcekle Inga Kaļva-Minina, iz vīnu vaicuojumu “Kai tev dzelys” konkursa dorbu formā sajimtys žanru ziņā atškireigys atbiļdis. “Daudzūs dorbūs jiutoma smeļdze, varbyut byutu gribiejīs vaira gaišuma i dzeivisprīcys kruosu, bet laikam taida ir tei dzeive. Tys beja lobs ceļuojums – apsavērt Latgolys rokstūšū cylvāku rodūšajā pasaulī i izzynuot, kai jim (jūs varūnim) īt,” tai Inga Kaļva-Minina. Tulkuotuoja Māra Poļakova pīzeimej, ka konkursa prozys teksti īzeimej latgalīšu literaturys ainovys konturu: nu senejiskuma da laikmeteiguo, nu sirdī dzymušys gribiešonys izstuosteit sevi – da profesionali preciza rakstnīka dorba. Žurejis lūcekle soka: “Apbreinoju volūdys daudzveideibu itūs tekstu kūpā: latgalīšu volūda jamā izplaiksnej i rūtojās cīši spūdri, kai latvīšu literarajā volūdā myusu laikūs nimoz cik cieški nasagoda redzēt; prīcynoj dzeiveigums, registru maiņa, breivuo i skaistuo dūmuošonys volūda. Otkon i otkon puorsalīcynoju, ka latgalīšu literatura “kai ēst” ir vajadzeiga vysai latvīšu literaturai.” Bet literaturzynuotneica i literate Ilze Sperga soka, ka itymā godā dominej sīvīšu proza. “Nu sirrealu sasatikšonu ar spūkim, valnu, gorim i myrušajim, a varbyut ar sovu vydyskū pasauli i juos tymsajim styurim leidz realuos dzeivis i myusu dīnu cylvāku attīceibu tāluojumam – tai varbyut var definēt ituo goda konkursa dorbus,” komeņtej Ilze Sperga. Žurejis lūcekli prīcojās puorskaiteit dorbus boguotā volūdā, kurā ir monomys i izlūkšņu sovpateibys, vystik reizē pīzeist, ka leluokajai daļai raksteituoju byutu juoceļ latgalīšu rokstu volūdys kvalitate, bet par lobuokajim dorbim skaita, ka jūs vajadzātu publicēt plotuokā mārūgā i napamest tik regionā.
Konkursu “Latgolys prozys skaitejumi 2025” organizej latgalīšu kulturys kusteiba “Volūda”, jū atbolsta literaturys festivals “Prozas lasījumi 2025” (Latvejis Rakstnīku savīneiba), Vaļsts kulturkapitala fonds, latgalīšu kulturys ziņu portals lakuga.lv, žurnals “Domuzīme”, izdevnīceiba “Zvaigzne ABC” i Rēzeknis nūvoda Lūznovys muiža.
Festivals “Prozas lasījumi” nūteik nu 1995. goda, jū organizej Latvejis Rakstnīku savīneiba. Laika gaitā “Prozas lasījumi” nu nalela pasuocīņa izauguši vairuoku dīnu prozys festivalā, kura programā ar sovu jaunuokūs dorbu voi jūs fragmentu skaitejumim pīsadola vysaidu paaudžu Latvejis i cytu vaļstu rakstnīki. Pīktū reizi sadarbeibā ar festivalu tymā byus nūtikšonys ar Latgolys kulturtelpys autorim.
Video atsavieršona iz pārnejuo gods konkursa nūslāgumu: