Vaļsts svātkūs, 18. novembrī, Rēzeknis nūvoda Nautrānu pogosta Rogovkā nūtyka svineigs vaļsts svātku pasuokums, kurā Nautrānu pogosta Atzineibys rokstu sajēme ari latgalīšu kulturys kusteiba “Volūda”.

Leidza ar Nautrānu pogosta Dzeivuotuoju konsultativuos padūmis lāmumu Nautrānu pogosta Atzineibys rokstus sajēme vairuoki pogosta dzeivuotuoji, uzjāmumi i aktivisti, kurūs vydā ari latgalīšu kulturys kusteiba “Volūda”, kas atzineibu sajēme par atbolstu Nautrānu kulturtelpys statusa sajimšonā, aktivu īstaisti pogosta kulturys dzeivis organiziešonā i latgaliskuos identitatis styprynuošonā.

Kai pīzeist “Volūdys” kustynuotuoja, bīdreibys projektu vadeituoja Edeite Laime, Nautrānu pogosts ir naviņ “Volūdys” juridiskuo sāta, bet vīta, kurā gribīs dareit, kustynuot i īt tolkā turēt jau asūšūs styprūs latgaliskūs pamatus. “Taišni pyrma 25 godu Rogovkā aizasuoce “Vosoruošonys” stuosts, bet vēļ aktivuok ar “Volūdu” asam pogosta dzeivē īsasaistejuši pādejūs godu laikā. Itūgod pīdzeivuojom “Vosoruošonu”, kūpā aicynuojom literatus kai iz latgaliskū dzejis slamu “Rogovkys dzejis voga”, tai Pīteram Jurciņam veļteitū literatu konkursu. Eipaši svareigs saguoja dorbs pi Nautrānu kulturtelpys dasacejuma gataveišonys, kai dokumentejūt vītejūs ļauds, tradicejis, nūtikšonys, tai aicynojūt pietnīkus sagataveit plotuokus rokstus par kulturtelpys vierteibom. Prīca par vītejuos kūpīnys aktivitati i īsaisti niu ari lekceju kursā, kurū Nautrānu kulturtelpys vierteibu izpratnei i styprynuošonai eistynojam kūpā ar Nautrānu kulturys centru. Ka verās ari “Volūdys” godu, tod Nautrānu puse ir vīns nu lelūs dorbu vierzīņu i nūtikšonu vītu!” soka Edeite.

Svineigajā ceremonejā kluotyn beja i pogosta Atzineibys rokstu sajēme “Volūdys” vadeituoja Amanda Anusāne i kustynuotuoja Laura Spundere, kai ari placu pi placa sūpluok beja bīdreibys vaļdis lūcekle i kustynuotuoja Inga Vigule.

Lels i meils paļdis Nautrānu pogostam par nūviertiejumu i kūpā dareišonu!

Golvonajā biļdē: Laura Spundere (nu kairuos), Amanda Anusāne i Inga Vigule, foto Arvīds Gļauda.