Piec dorbu iz večerinku! Rogovkā nūtiks večerinka ar folklorys kūpu “Grodi”
Sastdiņ, 22. novembrī, 20 stuņdēs iz prīceigu večerinku ar folklorys kūpu “Grodi” (Reiga) aicynoj Nautrānu kulturys centrys i latgalīšu kulturys kusteiba “Volūda”. Večerinka ar muzyku i daņčim plānuota kai svātki vītejim ļaudim i gostim, reizē svietejūt Nautrānu kulturtelpys īkļaušonu Nacionalajā namaterialuos kulturys montuojuma sarokstā.
Večerinka Latgolā ir īprīškejūs godu symtūs sovpateiga, moz pieteita namaterialuo kulturys montuojuma sastuovdaļa, kas saisteita ar Latgolys tradicejom, daņčim, rūtaļom, muzykys instrumentu spēli, jaunu i na tik jaunu ļaužu sadzeivi i attīceibom Latgolys soluos, cīmūs i sādžuos. Kab styprynuotu večerinkys tradiceju i ar jū īpazeistynuotu ari reidzinīkus, folklorys kūpa “Grodi” 2024. godā aicynuoja iz večerinkom Reigā, Gertrudis īlys teatrī i Āgenskolna tiergā, bet ituo gods vosorā večerinka beja ari Kalncīma kvartalā. Niu folklorys kūpa ar večerinku gasteis ari Nautrānu kulturys centrā Rogovkā.
“Kai raksteits sovulaik bīdreibys “Rogovkīši” sagataveitajā izdavumā “Večerinka nautranīšūs” (2017), večerinkys nūtyka i vosorā, i zīmā sastdīnem vokorūs, kam svātdīnis beja breivys dīnys, tod guoja iz bazneicu, bet sastdiņ varēja izaklaidēt. Saguoja tauta, saguoja muzykanti i beja doncuošona! Aicynojūt iz večerinkom Reigā, folklorys kūpa “Grodi” dalejuos ari taišni ar Nautrānu apleicīnis večerinku stuostim, deļtuo sasprīdem, ka laiks i pi myusu pošu kūpā ar “Grodim” sataiseit večerinku ar doncuošonu i muzyku kai senejuokūs laikūs. Sovulaik ļauds stuosteja – večerinkys nūtyka, lai atsapyustu i jautri pavadeitu laiku piec dorbu pylnys dīnys, tolku. Tai i mums saīt – reizē gribim pasaceit paļdis i nūsvieteit Nautrānu kulturtelpys īraksteišonu Nacionalajā kulturys montuojuma sarokstā. Pi juo struoduoja i īsaisteiti cīši daudzi Nautrānu i Iļžukolna ļauds, deļtuo vajag pošim daleit itū prīcu!” soka Nautrānu pogosta kulturys pasuokumu organizatore i vīna nu namaterialuos kulturys montuojuma saroksta dasacejuma autoru Inga Vigule.
Folklorys kūpa “Grodi”, kas byus Nautrānu kulturys centrā gaidomuos večerinkys muzykanti, dybynuota 1987. godā i niu ir vīna nu lobuokuos folklorys kūpu Latvejā. Juos darbeibys pamatā ir tautys tradiceju izzynuošona, vuiceišonuos i tuoluoka populariziešona. Eipašu daļu sastota dzīsmis nu daleibnīku seņču dzymtuo nūvoda – Latgolys. Kūpys daleibnīki vuoc folklorys materialus ekspedicejuos pi tautys teicieju, kur ari vuicuos tradicionalū dzīduošonys i muziciešonys manīri. Folklorys kūpa itymā rudinī izdavuse ari Latgolys dzīšmu i muzykys montuojumam veļteitu albumu “Sudrabu smeldama”. Folklorys kūpys vadeituojis ir Aīda Rancāne i Aurēlija Rancāne.
Večerinka sastdīnē, 22. novembrī, 20 stuņdēs Nautrānu kulturys centrā byus bez īīšonys moksys, piec dorbu voi cytu pasuokumu pīsavīnuot aicynuots kotrys doncuot grybātuojs. Reizē ar večerinku nūsaslēgs Nautrānu kulturtelpys izzynuošonai veļteitūs lekceju cyklys, kurā oktobrī i novembrī kulturys darbinīka, gida Voldemāra Ivdra, kartografis i nūvodpietneicys Andrys Zubko-Melnis i folklorys pietnīka Sanda Laimis lekcejuos vītejī ļauds i cyti interesenti tyka īpazeistynuot ar Nautrānu kulturtelpys vierteibom i viesturi, veicynojūt kūpīnys izgleituošonu, kai ari izpratni par namaterialuos kulturys vierteibu styprynuošonu.
Lekceju cyklu i večerinku projektā “Nautrānu kulturtelpys styprynuošona” eistynoj latgalīšu kulturys kusteiba “Volūda”, kas ir vīna nu Nautrānu kulturtelpys dasacejuma autoru. Nūtikšonys atbolsta Latvejis Nacionalais kulturys centrys konkursā “Latgolys namaterialuo kulturys montuojuma styprynuošonys i populariziešonys pasuokumu nūdrūšynuošona 2025. godā”, Rēzeknis nūvoda Kulturys i turysma puorvaļde, Nautrānu apvīneibys puorvaļde i Nautrānu kulturys centrys.