Aicynoj iz seminaru cykla "Spāka LAB" nūtikšonu Lūznovys muižā
Catūrtdiņ, 13. novembrī, Rēzeknis nūvoda Lūznovys muižā byus rodūšuo seminaru cykla “Spāka LAB” seminars, kurā byus vareiba izzynuot plotuok par vītu i kulturtelpu zeimynu radeišonu, pošvaļdeibu vareibu latgalīšu volūdys populariziešonā i kūpīnu īsasaisteišonu vysaida leimiņa kulturvidis pasuokumu eistynuošonā. Seminaru reikoj latgalīšu kulturys kusteiba “Volūda”, sasadorbojūt ar Latvejis Nacionalū kulturys centru.
13. novembrī nu 10 da 15 stuņžu Rēzeknis nūvoda Lūznovys muižā nūtiks seminars “Spāka LAB”, kura tema itūgod byus veļteita vairuokim Latgolys kulturtelpā aktualim vaicuojumim. Zeimynu vadeibys eksperte i pietneica, kai ari “Vydzemis lībiskuos kulturtelpys” vadeituoja Lolita Uozuoliņa (Ozoliņa) stuostā “Kulturtelpys zeimynu veiduošona praksē: kai atrast i stuosteit sovys vītys stuostu” daleisīs ar pīmārim nu vysaidu kulturtelpu, kurūs vydā byus lībīšu i sieļu, kai i Upeitis pīmāri, kai i pastuosteis, deļkuo zeimynu vadeiba ir dereigs instruments dorbā ar kulturys i kulturys montuojuma saturu. Rēzeknis nūvoda Kulturys i turysma puorvaļdis vadeituoja Daiga Miščenko stuosteis Rēzeknis nūvoda pīredzi latgalīšu volūdys populariziešonā, kas ir vīns nu pošvaļdeibu aizdavumu Latvīšu viesturyskūs zemu lykuma kontekstā. Taipat režisore Marika Čerņavska nu Ludzys pasadaleis ar pīredzis stuostu ap kūpīnys īsasaisteišonu vysaida leluma projektūs, veidojūt kruosainuoku Ludzys kulturvidi. Seminara mierkis ir rūsynuot Latgolys kulturys dzeivis organizātuoju i navaļstiskūs organizaceju izpratni par zeimynu i jūs veiduošonys nūzeimi, pošvaļdeibu aizdavumim i vareibom latgaliskuos identitatis saglobuošonā, kai i rodūšim veidim kūpīnys īsaistei kulturvidis veiduošonā. Dasasaceišona seminaram ir da ūtardīnis, 11. novembra. Dasacejuma anketa i pylna seminara programa ite: https://ej.uz/spākalab2025 https://ej.uz/spākalab2025 .
Pyrmū “Spāka LAB” rodūšī seminari, kas veļteiti Latgolys kulturys dzeivis organizātuoju i navaļstiskūs organizaceju puorstuovu kapacitatis styprynuošonai i apsameišonai ar idejom, nūtyka 2023. gods suokumā. Da ituo seminari, kurūs runuots par komunikacejis prasmu styprynuošonu, jaunīšu īsasaisteišonu tradicionalajā kulturā, jaunu pasuokumu ideju radeišonu, sadarbeibu ar medejim, latgalīšu volūdys lītuošonu publiskajā vidē i cytim tematim, nūtykuši Kuorsovā, Daugovpilī, Preiļūs, Leivuonā, Bolvūs i Rēzeknē, bet itūgod seminara nūtikšona paradzāta Rēzeknis nūvodā – Lūznovys muižā. Rodūšūs seminaru cyklys teik reikuos sadarbeibā ar Latvejis Nacionalū kulturys centru, bet jū atbolsta Latvejis Republikys Kulturys ministreja. Seminaru cykla nūsaukumā, kas sovulaik rodīs latgalīšu kulturys kusteibys “Volūda” i kulturys instituta “New East” sadarbeibā, ar latgaliskū vuordu “spāks” īlykta spieju ceļšona, bet “lab” ir saeisynuojums nu vuorda “laboratoreja” – vīta, kura ar idejom, eksperimentim i procesim rūnās kas jauns, itymā gadīnī – kulturys nūzarē regionā.
Seminars “Spāka LAB” Lūznovys muižā nūtiks kluotīnē i interesentim jis ir daīmams bez kaidys moksys. Grybātuoji, atzeimejūt dasasaceišonys anketā, varēs sajimt Latvejis Nacionaluo kulturys centra aplīcynuojumu par pīsadaleišonu seminarā.
