Forumā “Vierzeiba” skanēs latgalīšu volūdys i kulturys pīredzis stuosti
Sastdiņ, 1. novembrī, latgalīšu kulturys kusteiba “Volūda” aicynoj iz latgalīšu volūdys i kulturys forumu "Vierzeiba", kurā ar pīredzis stuostim par latgalīšu volūdu i kulturu pīsadaleis latgalīšu volūdys specialisti, Latgolys kulturys dzeivis profesionali i sabīdreibā zynomi latgalīši.
Foruma pyrmajā daļā skanēs vaira nakai desmit pīredzis stuostu, kurūs ar sovim sacynuojumim, pīdzeivuotū, sapynim dzeivē i dorbūs, kas dasadur latgaliskajai kulturai, latgalīšu volūdys lītuošonai kasdīnā i raudzeišonai byut pīdareigim latgalīšu kulturai pasadaleis kai sabīdreibā zynomi latgalīši, tai latgalīšu volūdys specialisti i Latgolys kulturys dzeivē īstaisteitī profesionali. Nūtikšonys ūtrajā daļā gaidoma diskuseja, raugūt saprast, kaidūs vierzīņūs iz prīšku aktivuok vajag struoduot, lai sabīdreibā augtu motivaceja runuot latgaliski i kasdīnā tyktu veicynuota izpratne par latgalīšu kulturu i juos vītu kai Latgolā, tai vyspuor Latvejā.
Ar sovim stuostim forumā “Vierzeiba” pīsadaleis radejis personeiba i socialūs medeju influensers Lauris Zalāns, grupys “Borowa Mc” liders Aigars Runčis, Latgolys viestnīceibys “Gors” vadeituoja Diāna Zirniņa, tekstu autore i redaktore Inka, namaterialuos kulturys montuojuma centra “Upīte” direktors Andris Slišāns, literate i volūdys pietneica Ilze Sperga, latgalīšu kulturys kusteibys “Volūda” vadeituoja Amanda Anusāne i cyti. Sovs stuosts byus ari foruma vadeituojam – sabīdryski aktivajam akteram Juoņam Krūņam.
Gaidomī stuosti, kurūs pamatā byus runuotuoju personeiguo i profesionaluo pīredze, byus vysaidi: kai byušona nu Latgolys i latgalīšu volūda var paleidzēt karjerā, kaida ir izalaseišona par runuošonu saimē latgaliski, sabīdreibys gaidys nu kulturys īstuodis, jaunīšu īsaiste latgaliskajuos aktivitatēs i procesūs, latgalīšu volūdys i literaturys vaicuojumi, puornūvodnīku pīdareibys vaicuojums i īsajusšona latgaliskajā vidē i cyti.
“Vierzeiba” simboliski īzeimēs ari latgalīšu kulturys kusteibys “Volūda” (kas īprīšk beja zynoma kai “Latgolys Studentu centrs”) jubileju, svietejūt taišni 20 godu nu šaļts, kod bīdreiba registrāta Latvejis Republikys Uzjāmumu registrā. “Volūda” ir vīna nu aktivuokūs i radzamuokūs latgaliskuos kulturys organizaceju – uztur vīneigū piļneibā latgaliskū medeju “Latgalīšu kulturys ziņu portals lakuga.lv”, reikoj kursus, seminarus i cytys nūtikšonys jaunīšim i pīaugušajim, veicynojūt latgalīšu volūdys vuiceišonūs i latgalīšu kulturys populariziešonu, gatavej kai dailliteraturys, tai cyta tipa izdavumus i audio dorbus latgaliski bārnim i pīaugušajim, reikoj latgalīšu literaturys konkursus, kurūs vydā ari “Latgolys prozys skaitejumi”, puorstuov latgalīšu volūdu ar mozuoklītuotajom volūdom saisteituos storptautyskuos nūtikšonuos. “Volūda” itūgod beja ari Storptautyskuo folklorys festivala “Baltica 2025” leidzreikuotuojs i temys autors, taipat kusteiba eistynoj cytys nūtikšonys, popularizejūt i aktualizejūt latgalīšu volūdys vaicuojumus.
“Bīdreibys dybynuotuoji sovulaik beja jaunīši, studenti – kaidi niu nūsadorboj ar cytom lītom, cyti turpynoj īsasaisteit latgalīšu kulturys procesūs. Nu vīnys pusis organizaceja nu dybynuošonys laika ir pasamainejuse – palykuse profesionaluoka, ar plotuoku darbeibys vierzīni, bet nu ūtrys – juos pamatu motivaceja ir namaineiga: gribēt i dareit, lai latgaliskajam ir vīta myusu dīnu sabīdreibā vysaidūs leimiņūs taišni aiz tuo, ka tys ir svareigs kotra poša dzeivē. Itūs godu laikā asam paruodejuši, ka latgaliski runuot, dareit i byut ir normali i forši! Ari vaļstī kūpumā situaceja ar latgalīšu volūdu itūs pādejūs vaira nakai 20 godu laikā ir pasamejuse – pīauguse apziņa, ka latvīšu volūdai ir divejis rokstu tradicejis, latgalīšu volūdys statuss publiski palics prestižuoks i ari vaira nūstyprynuots lykumūs, bet nu ūtrys pusis cīši sasamazynoj kasdīnys lītuotuoju skaits eipaši jaunīšu i bārnu vydā, saimēs vaira cik daudzi narunoj latgaliski. Deļtuo, dūmojūt par latgalīšu volūdu i kulturu iz prīšku kai Latgolys, Latvejis i pasauļa kulturys daļu, gribīs itaidu sasatikšonu, dūmu apmaiņu, kas reizē īdūtu kai zynuošonys, tai vēļ leluoku motivaceju i pošim, i cytom organizacejom, īstuodem, kurūs dorbūs pasaruoda latgalīšu i Latgolys kulturys vaicuojumi,” soka vīna nu “Volūdys” aktivuokūs kustynuotuoju, ilggadeja bīdreibys vadeituoja, niu projektu vadeituoja Edeite Laime.
Latgalīšu volūdys i kulturys forums “Vierzeiba” nūtiks 1. novembrī nu 14 da 17 stuņžu Latgolys viestnīceibys “Gors” Mozajā zālē. Īīšona pasuokumā ir bezmoksys i pīsadaleit var kotrys grybātuojs. Diskusejā, aizdūdūt vaicuojumus voi komentejūt sovu pīredzi, īsasaisteit byus aicynuoti ari foruma apmaklātuoji.
Nūtikšonu reikoj latgalīšu kulturys kusteiba “Volūda”, bet ar atbaļsteišonu tolkā īt Latvejis Nacionalais kulturys centrs i Sabīdreibys integracejis fonds nu Latvejis Republikys Kulturys ministrejis daškiertūs Latvejis vaļsts budžeta leidzekļu.