Jurciņa pīmiņai veļteitajā literatu konkursā uzvar Rasma Svikle, Elizabete i Aija Mikele
Juņa golā, 29. junī, Rēzeknis nūvoda Rogovkā nūtyka kasgadejuo Pīterdīnys svieteišona i reizē ari Pīteram Jurciņam veļteituo literatu konkursa 2025. gods nūslāgums. Konkursā itūgod autori tyka aicynuoti īsyuteit dorbus treis kategorejuos. Par lobuokuo dorba autori dzejis kategorejā tyka atzeita Rasma Svikle, humoreskā – Aija Mikele, bet bārnu literaturā vysa augstuokuo žurejis viertejumu sajēme Elizabetis dorbs.
Literarais konkurss, kab gūdynuotu dzejnīka Pītera Jurciņa pīmiņu, aizasuoce 2005. godā i niu ir palics par īrostu kulturys nūtikšonu goda daļu, “Pīterdīnā Rogovkā” gūdynojūt Nautrānu pusis izcylūs Pīterus, kai ari izceļūt myusu dīnu literatu dorbus. Vīns nu īvārojamuokūs itūs pusis Pīteru – Pīters Jurciņš (1932–2004) – beja labi pazeistams i kai dzejnīks, i kai jaunūs literatu atbaļsteituojs.
Pārnejuo gods konkursā daleibnīki tyka aicynuoti pīsadaleit ar dramaturgejis dorbim, bet itūgod leidza ar dzeju i bārnu literaturu konkursa daleibnīkus reikuotuoji aicynuoja paraudzeit spākus humoreskys žanrā latgaliski. Konkursa dorbim nabeja vīna temata, bet jamūs dreikstēja īsadvesmuot nu Jurciņa dzejūļa “Sirds i aste” fragmenta i ituo gods konkursa moto: “Dzeive vysim suoteiga, bet nav vysim pruoteiga”.
Ituo gods konkursā pīsadaleja 15 autori, treis kategorejuos – humoreska, dzeja i bārnu literatura – īsnādzūt 21 dorbu (dzejā desmit dorbi, humoreskā pīci, bet bārnu literaturā seši). Konkursa dorbus vērtēja četru pīaicynuotūs ekspertu žureja, kurā beja literats i literaturzynuotnīks Valentins Lukaševičs, literate i latgalīšu kulturys ziņu portala lakuga.lv redaktore Laura Melne, gruomotu autors i volūdnīks Jurs Cybuļs, kai i Latgalīšu volūdys, literaturys i kulturviesturis školuotuoju asociacejis vadeituoja Veronika Dundure. Žurejis daškiertūs punktu kūpviertiejumā par lobuokajim dorbim tyka pīzeita Rasmys Sviklis dzejūļu kūpa, Elizabetis dorbs “Jūku puorsokys par karali Kuopustu i juo pavaļstnīkim”, bet humoreskys žanrā lobuokuo dorba titulu dabuoja Aijis Mikelis humoreska “Pogosta lapnums”. Pītera Jurciņa pīmiņai veļteituo literatu konkursa lobuokūs dorbus varēs puorskaiteit latgalīšu kulturys ziņu portalā lakuga.lv.
Dzejis kategorejis uzvarātuoja Rasma Svikle dzeju obejuos latvīšu volūdys rokstu tradicejuos roksta nu 2006. gods, bet debejis dzejis kruojumu izdavuse 2019. godā. Pīsadalejuse Latgolā zynomajuos dzejis nūtikšonuos “Rogovkys dzejis voga” i “Upītes uobeļduorzs”. Par uzvaru P. Jurciņam veļteituo literatu konkursa dzejis kategorejā Rasma soka, ka tei bejuse vysā lels puorsteigums, kam suokuos nav saprotuse, deļkuo konkursa nūslāguma pasuokumā natyka izsaukta kūpā ar puorejim. “Tod pasaceja, ka niu paziņuos pyrmuos vītys... Bet, saprūtams, beja lela prīca par atzineigū nūviertiejumu eipaši deļ tuo, ka konkurence itamā kategorejā nabeja moza,” sovys sajiutys piec konkursa nūslāguma komentej Rasma.
Kategorejā “Bārnu literatura” uzvarēja Elizabete (eistajā vuordā Ilze Vovka) ar dorbu “Jūku puorsokys par karali Kuopustu i juo pavaļstnīkim”. Elizabete pamatā roksta dzeju pīaugušajim, ir dzejis kruojuma “Agape” (2023) autore, bet pārņ izdavuse ari dzejūļu kruojumu bārnim “Dzejūleiši”. Humoresku kategorejā pīcu dorbu vydā par lobuokū tyka pīzeits Aijis Mikelis dorbs “Pogosta lapnums”. Aija Mikele roksta dzeju, prozu, ir vairuoku detektivromanu autore i ari žurnaliste. Aija soka, ka sekmeiguo pīsadaleišona literatu konkursā ir motivaceja vaira raksteit ari latgaliski.
Konkursa žureja, puorsaverūt ituo gods konkursā īsnāgtūs dorbus, viertej, ka aug dorbu kvalitate, temuos jī ir kai laikmateigi, tai i tradicionali, bet reizē žureja tur nūceju, ka iz prīšku varātu uzalobuot ari autoru latgalīšu rokstu volūdys prasmis. Portala lakuga.lv redaktore i komiksa bārnim latgaliski “Sunāns breiveibā” autore Laura Melne pīzeist, ka eipaši prīcojās par bārnu literaturys kategoreju, kam jamā dorbus vērtēt bejs vysa gryušuok – vysi ruodejušīs labi.
P. Jurciņa
pīmiņai veļteitū literatu konkursu reikuoja Rēzeknis nūvoda Nautrānu apvīneibys
puorvaļde, sasadorbojūt ar latgalīšu kulturys kusteibu “Volūda”. Konkurss ir
vīns nu latgalīšu literaturys jaunradis veicynuošonys programys nūtikšonu itamā
godā. Programu atbolsta Vaļsts kulturkapitala fonds. Par pārnejuo gods aktivitatem
programa sajēme Latgalīšu kulturys goda bolvu “Boņuks 2024”, bet ituo gods
nūtikšonu serejā 13. septembrī Rēzeknis nūvodā gaidomi diveji pasuokumi: Pleikšņūs
paradzātys literari muzykaluos reitiškys “Gulguošona”, bet Rogovkā – catūrtuo dzejis
autoru saceņseiba, latgaliskais dzejis slams “Rogovkys dzejis voga”. Sovpus
decembra suokumā – konkursa “Latgolys prozys skaitejumi 2025” nūslāgums, kas
itūgod byus Lūznovys muižā, nūslādzūt pyrmū Rēzeknis nūvoda, Lūznovys muižys i “Volūdys”
eistynuotuo latgalīšu volūdys, literaturys i pietnīceibys rezidenču godu.