Rodūšuos rezidencis Lūznovys muižā itūgod pīdzeivuos Dagneja, Laurs Magazeiņs i Sovvaļnīks
Ituo gods pavasarī Rēzeknis nūvoda Lūznovys muiža, sasadorbojūt ar Rēzeknis nūvoda Kulturys i turysma puorvaļdi i latgalīšu kulturys kusteibu “Volūda”, izsludynuoja rodūšūs rezidenču literaturā, volūdnīceibā i Latgolys pietnīceibā programu. Rezidenču vareibu jau izmontuoja latgalīšu literaturai veļteitūs konkursu uzvarātuoji Silvestrs Solovjevs i Inga Kaļva-Minina, bet niu zynoms, ka programā itūgod pīsadaleis ari literate Dagneja, tulkuotuojs Laurs Magazeiņs i muzikis Sovvaļnīks.
Jaunuo rezideņču programa paradzāta latgaliski rokstūšim literatim, tulkuotuojim, žurnalistim, scenaristim, latgalīšu volūdys, literaturys i Latgolys kulturys pietnīkim, tymā vydā ari uorzemu literatim, kas roksta latgaliski, voi uorzemu literatim i pietnīkim, kas roksta ap Latgolu voi pietej Latgolys kulturu, voi tulkoj nu/iz latgalīšu volūdu. Programys mierkis ir veicynuot latgalīšu volūdys, literaturys i latgalistikys atteisteibu i populariziešonu, nūdrūsynojūt platformu augstvierteigu daildorbu latgalīšu volūdā i Latgolai veļteitu pietejumu pīaugumam.
Beja dūmuots, ka kalendarajā godā programu varēs izmontuot četri daleibnīki – literati, žurnalisti, scenaristi, pietnīki voi tulkuotuoji. Diveji daleibnīki ir īprīškejuo gods publiskūs latgalīšu literaturai veļteitūs konkursu “Latgolys prozys skaitejumi” i latgaliskais dzejis slams “Rogovkys dzejis voga” uzvarātuoji, kas ituo gods programā ir Inga Kaļva-Minina i Silvestrs Solovjevs, bet divejus daleibnīkus izalaseitu rezidenču programys konkursā. Rezidenču programys pyrmajā godā tyka sajimti treis interesentu dasacejumi, leidza ar kū izlamts dūt vareibu rodūši atsateisteit vysim grybātuojim – literatei Dagnejai, tulkuotuojam Lauram Magazeiņam i muzikim Sovvaļnīkam.
Dagneja, izmontojūt redzidencis vareibu, īceriejuse struoduot pi sova jaunuo dzejis kruojuma, kas sauksīs “Mīleibys volūdā” i byus veļteits mīleibai nu vysaidu redzīņu. Tulkuotuojs Laurs Magazeiņs struoduos pi myusu dīnu ukraiņu autora Artema Čeha (1985) stuostu kruojuma “D rajons” fragmentu tulkuojuma latgaliski, bet Sovvaļnīks (eistajā vuordā Ingars Gusāns) rezidencē raudzeis raksteit jaunys dzīsmis, kas byutu daļa nu ituo gods golā izdūšonai paradzātuo albuma “Cārtumi”.
Pavasarī sovu rezidencis laiku Lūznovys muižā, struodojūt pi debejis dzejūļu kruojuma, jau izmontuoja latgaliskuo dzejis slama “Rogovkys dzejis voga” 2024. gods nūtikšonys uzvarātuojs Silvestrs Solovjevs. Jis par itaidu vareibu soka: “Par kū es dūmuoju pārnejā vosorā, kod, siežūt pi golda sovā ustobā, pīraksteju kaidu dzejūli, kas īguoja pruotā? Tys eistyn nabeja par tū, ka piec goda, sokūt paļdis jam, siediešu iz balkona Marejis rezidencē Lūznovys muižā i struoduošu pi sova pyrmuo dzejis kruojuma izdūšonys. Itei beja unikala pīredze – lobi apstuokli, breineigs muižys personals, i viesturyskuo atmosfera radeja maksimali ārtu i rodūšu vidi. Raudzeju vysu izlaist caur sevi i ļaut īt uorā jaunūs dorbūs, kas veļteiti Rēzeknei i Latgolai. Šaļtim, izbaudūt rodūšū procesu, daguoja apstastuot i sev apzynuotai īskaidruot tū, kas nūteik, kur atsarūnu, kū doru, kam situaceja ruodejuos par daudzi natycama i vysa pīredze kūpā eistyn naaizmierstoma.”
Ar rezidenču programys daleibnīku dorbim laika gaitā varēs īpasazeit kotrys grybātuojs – jūs fragmentus atkareibā nu autora sagataveituos publikacejis varēs puorskaiteit latgalīšu kulturys ziņu portalā lakuga.lv. Programys eistynuotuoji paradz, ka rezidenču programa byus ilgtermeņa nūtikšona, deļtuo interesenti cyta gods suokuos byus aicynuoti pīsasaceit 2026. gods rezidenču programai. Taipat, jamūt vārā ituo gods pīredzi i daleibnīku profesionalū darbeibu, programys mierki i vierzīni varātu palikt vēļ plotuoki.
Rezidenču programu finansiali atbolsta Vaļsts kulturkapitala fonds, Rēzeknis nūvoda pošvaļdeiba i latgalīšu kulturys kusteiba “Volūda”.