“Volūda” sajāmuse atbolstu LAPAS catūrtajā projektu konkursā latgaliskuo seminara jaunīšim “Atzolys 2026” eistynuošonai
Nūsaslēdzs LAPAS (Latvijas Platforma attīstības sadarbībai) catūrtais projektu konkurss iniciativā “LAPAS savieno” i apstyprynuojumu projekta “Latgaliskais seminars jaunīšim “Atzolys 2026” eistynuošonai sajāmuse ari latgalīšu kulturys kusteiba “Volūda”. Atbaļsteituo projekta vierzīņs ir Latgolys jaunīšu izgleituošona i īsaiste regiona kulturys dzeivē, izmontojūt latgalīšu volūdu i identitati kai vierteibu i resursu.
LAPAS 4. konkursā atbaļsteitais “Volūdys” projekts ir vīns nu 18 projektu i sajiems 78,2 punktus. (Vaira ar projektu konkursu var izzynuot ITE). Projekta mierkis ir mazynuot jaunīšu aizpliušonu nu reģiona, stiprynojūt saikni ar Latgolu i motivejūt veiduot karjeru regionā. Projekta ideja sasajstejta ar ANO Ilgtspiejeigys atteisteibys mierkim (4. mierkis “Nūdrūsynuot īkļaunūšu i kvalitativu izgleiteibu i veicynuot myuža izgleiteibys īspiejis (seviški rodūt izpratni par kulturys daudzveideibu, kai i palelinojūt jaunīšu skaitu, kas sajam profesionaluos prasmis” i 11. mierkis “Padareit piļsātys i apdzeivuotys vītys īkļaunūšys, drūšys, pīsalāguot spiejeigys i ilgtspiejeigys (seviški nūstyprynojūt ceņtīņus aizsorguot i nūsorguot pasauļa kulturys montuojumu”), taipat jam vārā ANO Pymīdzeivuotuoju volūdu destmigadi, kai ari Latvīšu viesturyskūs zemu lykumu.
Bīdreibai “Volūda” ir vysā gara pīredze dorbā ar jaunīšim. Projekta golvonuo aktivitate ir latgaliskais seminars jaunīšim “Atzolys 2026”, kas tiks reikuots nu 3. da 7. augusta Kuorsovys vydsškolā, Ludzys nūvodā. Seminars “Atzolys” i piečuok paradzātuos aktivitatis nūdrūšynuos pylnu leidzdaleibys ciklu – dalinīki varēs palikt par breivpruoteigajim, projektu vadeituojim i organizatorim. Seminara laikā jaunīši kūpā ar mentorim struoduos pi jaunu latgalisku kaitu radeišonys, bet piec seminara turpynuos dorbu, lai kaidu nu ideju puorvārstu par eistynu produktu i piečuok prezentātu ari cytim. Taipat jaunīši varēs izzynuot par cytom īspiejom, kai var jau niu īsasaisteit latgaliskuos kulturvidis dorbūs.
Jaunīšu vydā strauji sasamazynoj latgalīšu volūdys lītuotuoju skaits, leidza ar tū tryukst latgaliski runuojūšūs jaunīšu dorba tiergā (kulturā, medejūs i c). Latgaliskajā seminarā “Atzolys 2026” golvonī aizdavumi ir motivēt jaunīšus vaira runuot latgaliski, snēgt jim latgalīšu rokstu volūdys pamata apvuiceibys, izpratni, kai atteisteit i ar marketinga paleidzeibu vierzeit sovys idejis. Seminarā jaunīšim byus vareiba īpasazeit ar vysaidim Latgolys cylvākim, bez kurūs īguļdejuma kulturys i piļsūniskajā dzeive nav īsadūmojama myusu dīnu Latgola.
“Atzolys 2026” atbaļsteis LAPAS (Latvejis Platforma atteisteibys sadarbeibai) projekts “GearUp!”, kū eistynoj ar Eiropys Savīneibys finansialu atbolstu. Seminara reikuotuojs – latgalīšu kulturys kusteiba “Volūda”.
Karteņā: jaunīšu seminars "Atzolys" 2024. godā Dagdā, foto Amanda Anusāne.
