“Volūda” dasavīnoj Rēzeknis nūvoda NVO sadarbeibys teiklam
2026. gods 29. aprelī Rēzeknes nūvodā nūtyka nūzeimeigs nūtykums piļsūniskuos sabīdreibys atteisteibā – navaļstiskuos organizacejis vīnojuos kūpeigā sadarbeibys memorandā, īzeimejūt jauna sadarbeibys teikla izaveiduošonu regionā. Teiklam pīsavīnuoja ari latgalīšu kulturys kusteiba “Volūda”.
Pasuokums puļcēja vysaidu jūmu aktivistus – nu kulturys i jaunuotnis leidz medejim i kūpīnu atteisteibai. Naformalā, tok reizē mierktīceigā atmosferā organizacejis naviņ paraksteja sadarbeibys dokumentu, tok ari sasapazyna, dalejuos pīredzē i jau iz vītys aizsuoce jaunys sadarbeibys idejis.
Memorandu paraksteja 14 organizacejis: bīdreibys “Volūda”, “Nezināmā Rēzekne”, “Sociālās sadarbības Tilts”, BDR “Rēzeknes novada partnerība”, “Mediju radošā studija”, RPLSB “Sidrabrasa”, “Viļānu Mūzikas un mākslas skolas atbalsta biedrība”, “Nautrānu kultūrtelpai”, “Kinotriks”, “Esi Vasals”, “Viļānu BUJB “Saulstariņi””, “Dekšāru NVO” i “Latgales ūdensroze”.
Pasuokumu atkluoja Rēzeknes nūvoda pošvaļdeibys prīšksādātuojs Guntars Skudra i Rēzeknis nūvoda partnereibys vadeituoja Ineta Elksniņa, izsverūt, ka itei iniciativa nav tik simboliskys sūļs, tok reals pamats sadarbeibai iz prīšku. “Šudiņ mes naviņ parokstom dokumentu – mes suocam veiduot kusteibu. Pīrūbežā eipaši svareigi ir turētīs sūpluok, kam taišni sadarbeibā rūnās spāks, kas ļaun atsateisteit i nūturēt lobbyuteibu myusu kūpīnuos,” izsvēre G. Skudra.
Memorands ir breivpruoteiga vīnuošonuos, tok tuo nūzeime snādzās tuoļuok par formalu dokumentu – tys ir kūpeigs aplīcynuojums gribiešonai sasadarbuot, daleitīs i styprynuot vīnam ūtru. Eipaši pīrūbeža kontekstā šaida sadarbeiba palīk par byutisku prīšknūsacejumu kai sabīdreibys nūtureibai, tai ilgtspiejeigai atteisteibai. Organizatori izsver, ka itys ir viņ suokums – iz prīšku planavuots atteisteit kūpeigys iniciativys, taiseit regularu sadarbeibys platformu i padareit plotuoku īsaisteitūs organizaceju lūku.
____________________________
Latgalīšu kulturys kusteibys “Volūda” aktivitatis 2025. i 2026. godā finansiali pabolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.
