Apreļs – nūtikšonom i sasatikšonom pīpiļdeits mieness
Apreļs "Volūdai" beja cīši kusteigs mieness – pasuokumi, sasatikšonys, raidejumi. Puorstuovēt bīdreibu taida veida nūtikšonys ir vīns nu organizacejis aizdavumu, kas paleidz nūdybynuot jaunus i svareigus kontaktus, byut radzamim, kai ari runuot par mums svareigom temom i meklēt rysynuojumus vysaidim problemvaicuojumim.
17. aprelī nūtyka Saeimys i navaļdeibys organizaceju kūpeigais forums "Kopīgas vērtības. Kopīga valsts", kurā deputati kūpā ar piļsūniskuos sabīdreibys puorstuovim vērtēje sovstarpejū sadarbeibu i sprīde par kūpeigim principim tuos styprynuošonā. Vaira nakai 60 dalinīku vydā kluotyn beja i pīsadaleja ari "Volūdys" vadeituoja Amanda Anusāne i kustynuotuoja, ari reizē Saeimys deputate Leila Rasima.
Foto: Ieva Ābele
Tok 20. aprelī Preiļu nūvoda jaunīšu centrs "Četri pakāpieni" reikuoja "Rodūšūs profeseju forumu" i taidu rodūšūs personeibu vydā kai Lauris Zalāns, Katrīna Griga, Daiņs Skutelis i Līva Vilcāne ar sovu stuostu jimā pīsadaleis ari "Volūdys" i Latgalīšu kulturys ziņu portala lakuga.lv vadeituoja Amanda Anusāne. Forumā pīsadaleja 126 jaunīši nu vysaidom Preiļu nūvoda školom. Pasuokuma mierkis - īdvesmuot i īpazeistynuot jaunīšus ar rodūšajom profesejom i karjerys īspiejom kulturys i muokslys nūzarēs.
Foto: Ilze Piskunova
22. aprelī latgalīšu kulturys kusteibys “Volūda” i bīdreibys “Nezināmā Rēzekne” puorstuovis sasatyka ar Nederlandis viestnīku Latvejā Karlu Persmanu (Carl Peersman) i viestnīceibys vacuokū politikys i sabīdryskuos diplomatejis specialisti Katrīnu Ošiņu.
Sasatikšonā puorrunuojom latgalīšu volūdys nūzeimi i izaicynuojumus, kai ari raudzejom atrast kūpeigū ar frīzu volūdu Nederlandē. Īpazeistynuojom ar organizaceju i Latgalīšu kulturys ziņu portala lakuga.lv dorbu, pastuostejom vaira ap Latgolu i juos viesturi. Taipat dasaskuorem ari drūseibys vaicuojumim pīrūbežā.
Foto: Nederlandis viestnīceiba
Taipat 26. aprelī “Volūda” puorstuovem beja vēļ vīna cīši svareiga sasatikšona ar Latvejis Piļsūniskū aliansi. Sasatikšonys mierkis beja izzynuot vaira par Latgolys bīdreibu aktivitatem i sadarbeibys īspiejom. “Volūda” jau vairuokus godus ir Latvejis Piļsūniskuos aliansis bīdre. Sokam jums sirsneigu paļdis par piļsūniskuos sabīdreibys styprynuošonu Latvejā i navaļdeibys organizaceju interešu puorstuovnīceibu!
Foto: Latvejis Piļsūniskuo alianse
27. aprelī, Latgolys kongresa dīnā, Rēzeknis nūvoda pošvaļdeibys telpuos nūtyka Navaļstiskūs organizaceju i Ministru kabineta sadarbeibys memorianda eistynuošonys padūmis izbraukuma sēde, piec kurys tyka organizātys ari tikšonuos ar nūvoda bīdreibom i nūdybynuojumim dorba grupuos. "Volūda" pīsadaleja diskusejā par latgalīšu volūdys i drūseibys vaicuojumim medeju politikā.
Foto: Gints Ivuskans, Valsts kanceleja
Taipat aprelī tykom aicynuoti iz vairuokom sarunom. Portala lakuga.lv redaktore Laura Melne LR1 raidejumā "Starpbrīdis" runuoja par tū, kū jai nūzeimoj latgaliskais i Latgolys kongresa dīna. Raidejumu var nūsaklauseit ITE. Tok portala i bīdreibys vadeituoja Amanda Anusāne kūpā ar cytim Latgolys patriotim Latgolys regionaluos televizejis raidejumā "Runoj Latgola" diskutēje par latgaliskū identitati, raidejums daīmams ITE.
Foto: Latgolys regionaluo televizeja
____________________________
Latgalīšu kulturys kusteibys “Volūda” aktivitatis 2025. i 2026. godā finansiali pabolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.
