Vyss suocēs ar praksi | Svietejam "Volūdys" jubileju!
Volūdys jubilejis godā turpynojam vaira īpasazeit ar bīdreibys cylvākim i dorbim. Itys stuosts byus par tagadejū "Volūdys" i portala lakuga.lv vadeituoju Amandu Anusāni, kurei sovu ceļu bīdreibā īsuoce ar praksi 2021. godā.
Amanda īt nu Preiļu nūvoda Kaupieru, tok niu jau puora godu nūsabāziejuse Rēzeknē. Amanda bīdreibā suoce dorbuotīs kai praktikante nu LKA Latvejis Kulturys koledžys. "Muna specializaceja beja pasuokumu produciešona, bet tys beja pandemejis laiks, kurā daudzi pasuokumu nanūtyka, bet školu nazkai pabeigt vajadzēja. Bīdreibā organizējom tīšsaistis "Latgolys prozys skaitejumu" konkursa nūslāguma pasuokumu – saguoja i pasuokums, i diploms," stuosta Amanda. Nu praktikantis Amanda ir palykuse par pylna laika kustynuotuoju bīdreibā, i juos aizdavumūs ir kai latgaliskūs aktivitašu organiziešona, tai ari latgalīšu kulturys ziņu portala lakuga.lv vadeišona. Nu 2025. gods Amanda ir ari "Volūdys" vaļdis prīšksādātuoja. Vaira par Amandu vaicuojumu i atbiļžu stuostā
Kai tev ruodīs, kū “Volūdys” darbeiba ir mainejuse Latgolys kulturtelpā?
Daudzi kū! Kūpumā mes veicynojam pozitivuoku attīksmi pret latgalīšu volūdu i latgaliskū. Asam kluotyn Latgolys kulturys procesūs, viestejam par jim i poši aktivi īsasaistom, kai ari raugom leidza paraut cytus.
Karteņuos: Amanda ar Laurom nu lakuga.lv i prezidentu
Kai dorbuošonuos “Volūdā” ir ītekmiejuse tovu dzeivi?
Attīksme pret latgaliskū kai vierteibu maņ bejuse jau saimē, tys maņ nav nikas jauns. Ari pyrma īsasaisteišonys "Volūdā" dareju i runuoju latgaliski. Vīneigi niu doru tū apzynuotuok. Taipat pasamainejuse ari izpratne par vysaidim latgaliskajim procesim, kurim pyrma tuo tik cīši nasekuoju leidza. Daudzus kolegus i kustynuotuojus eistyn dreižuok sauktu par draugim, kam tik daudzi kam itymūs puora godūs īts cauri i dareits, ka tys vyss ir cīši satyvynuojs.
Karteņā: nu lobuos Amanda, Edeite i Kristīne COLING projektā Pūlejā
Kas nu “Volūdys” dareituo tev ruodīs vysusvareiguokais?
Nav taidys vīnys konkretys lītys, tys ir mierkis. Maņ pat tū gryuši saukt par mierki, vaira grybātu tū saukt par vizeju. Vizeju, kai latgaliskajam byut pošsaprūtamam. Vizeju, kai pīpiļdeit gruomotu plauktus ar literaturu latgaliski. Vizeju, kai nasabeit nu latgalīšu rokstu volūdys. Vizeju, kai izdareit, kab viests latgaliski teik raksteitys i skaiteitys kotrā medejā. Vizeju, kai myzykai latgaliski radejā skanēt vaira. Vizeju, kai ari piec 100 i vaira godu runuot latgaliski. Tai varātu turpynuot i turpynuot iz prīšku. I vēļ svareigi ir tys, ka par tū vizeju mes na tikai stuostam voi sepinejam, bet ari īmam iz tū ar relim dorbim, kai ari īdvesmojam cytus īt juos vierzīnī. Reizem ari ir drupeit suopeigi apsazynuot, ka itys vyss nazkod ir bejs, tok niu juosuoc gondreiž nu suokuma, bet lobuo viests, ka vēļ nav par vālai. I pa itim godim daudzi kas ir izdareits. I tys nūteikti nav tikai myusu organizacejis dorbs.
Karteņa nu kaidys "Volūdys" darbneicys Daugovpilī
Tovs meiluokais voi svareiguokais pīdzeivuojums, nūtikšona, bīdreibā dareitais ir...
Dorbu, nūtikšonu i pīdzeivuojumu bejs daudzi, tok vysvaira atmiņā paliks nūtikšona, ar kuru i aizasuoce muna dorbuošonuos "Volūdā" (tymā laikā vēļ "LgSC"). Tys ir "Latgolys prozys skaitejumu" konkurss i nūslāguma pasuokums, kurū pyrmū reizi kai students organizieju kai sovu kvalifikacejis dorbu LKA Latvejis Kulturys koledžā. Piec tuo Edeite, kas tūreiz beja bīdreibys vadeituoja, laikam manī pamaneja potencialu i īruove vydā vysaidūs cytūs projektūs.
Vieliejums “Volūdys” dorbim iz prīšku!
Vieleju jaunus kustynuot grybātuojus, lai asūšajim naapseikst spāki, lai daudzi jaunu i rodūšu ideju, kai turpynuot īkustynuotūs 20 i vaira godu dorbus!
Kartenis nu Amandys privatuo i bīdreibys arhiva.
-------------------------------
Latgalīšu kulturys kusteibys “Volūda” aktivitatis 2025. i 2026. godā finansiali pabolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.
