Dorbuošonuos bīdreibā īvuica praktiskys lītys | Svietejam "Volūdys" jubileju!
Turpynojūt svieteit “Volūdys” svātkus, raugam vaira īpasazeit ar bīdreibys cylvākim i dorbim. Trešais stuosts ir par “Volūdys” kustynuotuoju Dagneju Dudarjonoku, kurei īt nu Preiļu pusis i bīdreibā suoce dorbuotīs, kod beja studente Rēzeknis Augstškolā. Dagneja bejuse kai bīdreibys vadeituoja, tai daudzu projektu i dorbu kustynuotuoja. 2023. godā "Volūda" izdeve Dagnejis debejis dzejis kruojumu "Ups, kūki i mes".
Dagneja "LgSC" suoce dorbuotīs, kod vuicejuos Rēzeknis Augstškolā. Piečuok aizguoja studēt iz Daugovpiļs Universitati i dorbuojuos bīdreibā tī. Pyrmuos reizis ar studentim sasatyka kojuos ci Varšovys īlys dzeivūklī, kur tūlaik Vita Briška beja biroja vadeituoja. Piečuok sasatikšonys reizis nūtyka kopejneicā “Sāta”, kas preteimā Daugovpiļs teatram beja iztaisejuši sovu telpu, kur nūtyka saīšonys, literari muzykali pasuokumi. Tod "LgSC" nūmuoja telpu Reigys īlā i tī sataisieja foršu vītu – Štabiku. Dagnejai ar "LgSC" īsasuoce izpratne par bīdreibys dorbim, piļsūniskuo aktivitate i apziņa, ka dūmubīdri bez naudys i pīredzis, bet ar jauneibys trokumu i degsmi var cīši daudzi padareit.
Nu kura laika dorbojīs bīdreibā i kū tu dori niu?
Nazynu, kurs tys beja gods. Ilona Ratinska vēļ beja Rēzeknis biroja vadeituoja. Leiksnā beja saīšona, ka vajag jumta organizaceju taiseit, piec tam es ari pīsavīnuoju. Bīdreibā dorbuojūs ari da itai šaļtei. Niu dzeivoju Preiļu nūvoda Vacvuorkovā, struodoju ar vysaidim projektim i rokstu dzeju latgaliski. "LgSC" dabuotuo pīredze i dorbi – vyss tai labi maņ aizguoja, ka niu jau sastū godu vodu bīdreibu “Jaunvide” i vysys zynuošonys maņ nūdar – Uzjāmumu registrys, Vaļsts ījāmumu dīnasts, projekti, kontakti. Miļzeigs paļdis!
Karteņā: Dagneja i cyti bīdri festivalā "Muzykys skrytuļs" cylvākus izklaidej ar spēlem (2011. gods)
Kai dorbuošonuos bīdreibā ir ītekmiejuse tovu dzeivi?
Asūt organizacejā, es daudzi īsavuiceju, suocūt ar praktiskom lītom – Google diska lītuošonu, sātyslopys ziņu dalikšonu, protokolu raksteišu i tū, kai vispuor dorbojās bīdreiba. Beidzūt ar pasuokumu reikuošonu, organizeišonu i projektu vadeišonu.
Karteņā: bīdri 2015. gods kūpsapuļcē, kurā Kristīne Pokratniece beja vaļdis prīkšsādātuoja
Tovs meiluokais voi svareiguokais pīdzeivuojums, nūtikšona, bīdreibā dareitais...
Maņ ar "LgSC" vaira saistās cylvāki, nakai koč kaidi dorbi. Pruotā palykuši vysaidi tuseni – Tievanānu pavasars, Daugovpiļs pasuokumi, kur beja lela jautreiba. "LgSC" dzimšonys dīnys balleite Arta piertī Leiksnā. "LgSC" spieļu vokors munā dzeivūklī Rēzeknē. Tys, kai mes fiļmējom AR lip-dup i doncuojom flešmobu.
Karteņā: "LgSC" dzimšonys dīna piertī pi Arta Leiksnā (2012. gods)
Kai tev ruodīs – kū bīdreibys darbeiba ir mainejuse Latgolys kulturtelpā?
Es dūmoju, ka “Volūda” ir vīneiguo organizaceja, kas struodoj regulari i ar plotu vierīni. Dūmoju, ka cīši mainejuse.
Karteņā: bīdri kopejneicā "Sāta" pēc latgalīšu rokstu volūdys volūdys vuiceišonuos (2013. gods)
Kas nu “Volūdys” dareituo tev ruodīs vysusvareiguokais?
Ak jau latgalīšu kulturys ziņu portals lakuga.lv, seminars "Atzolys", daleiba vysaiduos sarunuos, “Volūdys” cylvāku runuošona publiski latgaliski. Vyss!
Karteņā: gruomotys "Kas bez iuzu – tys bez bādys" atkluošonys pasuokums (2019. gods)
Vieliejums “Volūdys” dorbim iz prīšku!
Saglobuot ciļvieceigumu, izbaudeit procesu i vaira kūpeigu tuseņu. Aiz kūku īraudzeit meža!
Kartenis nu Dagnejis personeiguo arhiva
-------------------------------
Latgalīšu kulturys kusteibys “Volūda” aktivitatis 2025. i 2026. godā finansiali pabolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.
