“Latgolys prozys skaitejumūs 2025” ar fragmentim nu tūpūšuo romana uzvar literate Ligija Purinaša
Decembra suokuos Rēzeknis nūvoda Lūznovys muižā i škārsteikla tīšraidē nūtyka literaruo konkursa “Latgolys prozys skaitejumi 2025” nūslāguma pasuokums, kas beja vīns nu literaturys festivala “Prozas lasījumi” nūtikšonom regionūs. Ituo gods konkursa finalā tyka sešu raksteituoju dorbi, bet žurejis viertejumā par lobuokū tyka pīzeiti literatis Ligijis Purinašys tūpūšuo romana “Sieviete” fragmenti.
Latgalīšu kulturys kusteiba “Volūda”, sasadorbojūt ar festivalu “Prozas lasījumi”, sastū reizi izsludynuoja konkursu “Latgolys prozys skaitejumi”, kura mierkis ir veicynuot literarū procesu Latgolā i jaunu, Latgolys kulturtelpai pīdareigu dorbu tapšonu. Itūgod par uzvarātuoju 15 raksteituoju konkurencē kai lobuokais dorbs tyka pīzeits literatis Ligijis Purinašys tūpūšuo romana “Sieviete” fragmenti. Ūtrū vītu sajēme Laurys Strodis dorbs “Lubuona valns”, bet trešuo vīta — Annelis Slišānis dorbam “Kuo tev īt”. Taipat konkursa žurejis atzineibys dabuoja Lilijis Limanis, Ivo Giluča i Valijis Platacis literarī dorbi. Konkursa nūslāgumā, kas nūtyka 4. decembra vokorā Lūznovys muižā i kurū vadeja pasuokumu producente Daira Lāce, beja vareiba dzierdēt pīcu lobuokūs dorbu skaitejumus. Jūs papyldynuoja muziķu Danys Vasiļjevys i Mārča Lipska uzastuošona, spielejūt skaņdorbus ar latgalīšu literatu Annelis Slišānis, Māreitis Slišānis, Ligijis Purinašys i Ilzis Spergys dzeju.
Ligija Purinaša ir literate i publiciste, vairuoku dzejis kruojumu, kai ari itūgod izdūtuo dzejprozys kruojuma “Magnificat” (izdeviejs “Volūdu sāta”) autore. Konkursam “Latgolys prozys skaitejumi 2025” autore īsnīdze fragmentus nu tūpūšuo romana “Sievete”, kas teik radeits ar Vaļsts kulturkapitala fonda i Storptautyskuos Ventspiļs rakstnīku i tulkuotuoju sātys atbolstu. Kai piec konkursa komentēja Purinaša, juos dorba īsniegšona beja eksperiments, kam da ituo pamatā rakstejuse dzeju, nazynuojuse, kas nu tuo saīs i voi byus kaids rezultats. “Par rezultatu asu šokā, nagaideju! Pi tūpūšuo romana struodoju jau divejus godus, i itei ir pyrmuo raudzeišona saprast, kas ar jū nūteik i kai kompetenti ļauds jū viertej,” soka konkursa uzvarātuoja. Ligijis Purinašys dorbs izskanēja kai Lūznovys muižā, konkursa nūslāgumā, tai i Reigā – festivala “Prozas lasījumi” nūslāguma pasuokumā teatrī-klubā “Hamlets”. Konkursa uzvarātuoja kai bolvu sajēme ari vareibu palikt par vīnu nu literaturys, volūdnīceibys i Latgolys pietnīceibys rezidenču programys dalinīku Lūznovys muižā 2026. godā.
Konkursā “Latgolys prozys skaitejumi 2025” beja aicynuoti pīsadaleit vysa vacuma Latgolys kulturtelpai pīdareigi autori, kuri roksta prozu. Konkursā sajimti 15 vysaidu autoru dorbi kai latvīšu literatajā, tai latgalīšu rokstu volūdā. Dorbus īsyuteja Latgolys kulturtelpā jau zynomi autori i debitanti. Īsnātūs dorbus vērtēja žureja, kurā vydā beja literate i literaturzynuotneica Ilze Sperga, žurnaliste i redaktore Maruta Latkovska, žurnaliste i gruomotu blogere Inga Kaļva-Minina, tulkuotuojs i gruomotizdeviejs Snorre Karkonens-Svensons i tulkuotuoja Māra Poļakova. Konkursa žureja, viertejūs Ligijis Purinašys tūpūšuo romana fragmentus, komentej: “Piec lobuokūs pasauļa paraugu tūpūšs dorbs gaumeigi latgaliskā koloritā, koč i lobuokī paraugi drupeit par daudzi speid cauri. Lobs materials tuoļuokam dorbam i naapšaubama talanta kluotyn byušona. Loba latgalīšu volūda, kurā īsaskaņ jaunekleigys notys. Atmiņā palīk truopeigī saleidzynuojumi par dzeivi, byušonu sīvītei. Fragmenti īinteresej i roda gribiešonu skaiteit tuoļuok.” Konkursā “Latgolys prozys skaitejumi 2025” uzvariejušū dorbu var puorskaitei i video formatā nūsavērt ite: https://saite.lv/LigijaProza.
Konkursu “Latgolys prozys skaitejumi 2025” organizej
latgalīšu kulturys kusteiba “Volūda”, jū atbolsta literaturys festivals “Prozas
lasījumi” (Latvejis Rakstnīku savīneiba), Vaļsts kulturkapitala fonds,
latgalīšu kulturys ziņu portals lakuga.lv, žurnas “Domuzīme”, apguods “Zvaigzne
ABC” i Rēzeknis nūvoda Lūznovys muiža.
“Latgolys prozys skaitejumi 2025” konkursa nūslāguma pasuokuma video:
Karteņuos kadri nu konkursa nūslāguma pasuokuma, foto Amanda Anusāne (latgalīšu kulturys ziņu portals lakuga.lv).