Literaturys, volūdnīceibys i Latgolys pietnīceibys rezidenču programa byus ari 2026. godā
Decembra suokumā Vaļsts kulturkapitala fonds izsludynuoja 2026. gods mierkprogramys “Kultūras radošo rezidenču atbalsts” rezultatus, i atbolstu rezidencem literaturā, volūdnīceibā i Latgolys pietnīceibā 2026. godā sajims ari Lūznovys muiža, kura rezidenču programu eistynoj sadarbeibā ar latgalīšu kulturys kusteibu “Volūda”.
Rezidenču programa paradzāta latgaliski rokstūšim literatim, tulkuotuojim, žurnalistim, scenaristim, latgalīšu volūdys, literaturys i Latgolys kulturys pietnīkim, tymā vydā ari uorzemu literatim, kas roksta latgaliski, voi uorzemu literatim i pietnīkim, kas roksta ap Latgolu voi pietej Latgolys kulturu voi tulkoj nu/iz latgalīšu volūdu. Programys mierkis ir veicynuot latgalīšu volūdys, literaturys i latgalistikys atteisteibu i populariziešonu, nūdrūsynojūt platformu augstvierteigu daildorbu latgalīšu volūdā i Latgolai veļteitu pietejumu pīaugumam.
2025. godā rezidenču programys pīduovuojumu izmontuoja pīcys rodūšuos personeibys – literati Inga Kaļva-Minina, Dagneja, Silvestrs, tulkuotuojs Laurs Magazeiņs, kai i muzikis Ingars Gusāns (Sovvaļnīks). Daļa rezidencēs topušūs dorbu jau puorskaitomi voi tyvuokajā laikā byus daīmami latgalīšu kulturys ziņu portalā lakuga.lv, kai ari dreizumā paradzāta Sovvaļnīka jaunuo akustiskuo albuma “Cārtumi” izīšona – albuma tapšonai ari īdviesmi davuse rezidiešona Lūznovys muižā.
2026. godā rezidenču vareibu varēs izmontuot sešys rodūšuos personys – cyta gods suokumā tiks izsludynuots atkluotais konkurss interesentu dasacejumim. Rezidenču programu caur konkursu varēs izmontuot četri grybātuoji, bet diveji sovu pīsadaleišonu programā nūdrūsynoj ar uzvarom latgalīšu literaturys konkursūs. 2026. goda rezidencis tai varēs izmontuot latgaliskuos dzejis saceņseibys “Rogovkys dzejis voga” (reikuotuoji Rēzeknis nūvoda Nautrānu pogosts i “Volūda”) uzvarātuoja Valija Platace i konkursa “Latgolys prozys skaitejumi 2025” (sadarbeibā ar festivalu “Prozas lasījumi” reikoj “Volūda”) uzvarātuoja Ligija Purinaša.
2026. gods rezidenču programys jaunums byus uzaturiešonys garums Lūznovys muižā – ka 2025. godā tuos beja 10 dīnys, niu taida vareiba byus divejis nedelis (14 dīnu). Rezidentim teik sagtys uzaturiešonys izmoksys muižā (naktssāta, ādynuošona), kai ari moksuota rodūšuo stipendeja.
Prīcojūtīs par Vaļsts kulturkapitala fonda mierkprogramā sajimtū atbolstu rezidenču programai, decembra suokumā Rēzeknis nūvoda Maltys apvīneibys puorvaļdis, kas juridiski puorstuov Lūznovys muižu, vadeituojs Edgars Blinovs i latgalīšu kulturys kusteibys “Volūda” vadeituoja Amanda Anusāne, kluotyn asūt muižys puorstuovem Ingai Žirgulei i Ingai Stikutei, kai i vīnam nu ituo gods rezidentu – Silvestram, paraksteja sadarbeibys leigumu rezidenču literaturā, volūdnīceibā i Latgolys pietnīceibā 2026. godā eistynuošonai.
Karteņā: šaļteņa nu sadarbeibys leiguma paraksteišonys, publicitatis foto.