Vareiba īpazeit cytu vaļstu “latgalīšus” | Svietejam "Volūdys" jubileju!
Gaidūt “Volūdys” svātkus, turpynojam vaira īpasazeit ar bīdreibys cylvākim i dorbim. Ūtrais stuosts ir par “Volūdys” kustynuotuoju Vinetu Vilcāni-Tocu, kurei myusu bīdru vydā ir taišni 15 godu.
Vineta stuosta, ka byudama vydsškoļneica pīsadaleja bīdreibys organizātajā jaunīšu seminarā "Atzolys". "Seminars maņ cīši palics atmiņā kai vīns nu lobuokūs pīdzeivuojumu pusaudžu godūs. Studejūt Reigā, guoju iz bīdreibys reikuotajim pasuokumim, bet par bīdri palyku tik piec kaida laika – 2010. gods golā. I ruodīs natycamai, ka paguojušs jau 15 godu!" tai Vineta. Jei divejis reizis bejuse bīdreibys vadeituoja, aktiva projektu i ari portala lakuga.lv vadeituoja. Itūšaļt, koč i kasdīnys dorbs saisteits ar storptautisku tehnologeju uzjāmumu, jei "Volūdā" kustynoj Miglinīku dzymtai veļteita izdavuma sagataveišonys dorbus. Vaira par Vinetu vaicuojumu i atbiļžu stuostā.
Kai tev ruodīs – kū “Volūdys” darbeiba ir mainejuse Latgolys kulturtelpā?
Maņ gribīs itū vaicuojumu paplašynuot i runuot par bīdreibys dorba nūzeimeigumu Latvejis kulturtelpys kontekstā, kam latgaliskais ir naviņ Latgolā, bet sevkurā vītā, kur dzeivoj latgalīši, voi kaids, kuram latgaliskais ir meils i svareigs naatkareigi nu tuo, kur ir juo saknis.
“Volūda” beja vīna nu pyrmūs navaļstiskūs organizaceju, kas suoce normalizēt latgaliskū. Pasasokūt bīdreibys dorbam, ir byutiski mazynuojusēs latgalīšu volūdys stigmatizaceja, i latgalīšu volūda arviņ vaira teik iztvarta kai daļa nu latvīšu volūdys. Latgalīšu volūda ir palykuse daudz pošsaprūtamuoka kasdīnys sastuovdaļa nakai tys beja pyrms 20 godu.
Karteņā: bīdreibys vaļde 2015.–2016. godā
Kai dorbuošonuos “Volūdā” ir ītekmiejuse tovu dzeivi?
Asu vīns nu nadaudzūs cylvāku, kam latgaliskais ir bejs kasdīnys dorbs – es vadeju bīdreibys medeju “Latgalīšu kulturys ziņu portals lakuga.lv” i eistynuoju cytus projektus. Tys beja breineigs pīdzeivuojums vairuoku godu garumā, kod varieju dareit tū, kas maņ ir personeigi svareigs, bet reizē ari atbiļdeigs i drupeit satraucūšs, kam pošai beja juoroksta projektu dasacejumi i juopīsaista finansiejums. Maņ beja prīca, ka tū dorūt varieju byut Latgolā. Niu vys otkon dzeivis celi mani ir aizvaduši iz “latgalīšu golvyspiļsātu” Reigu.
Kai portala vadeišona, tai projektu eistynuošona ļuove atteisteit vysaidys prasmis, kas vāluok paleidzēja karjerā, kuru jau veiduoju uorpus latgaliskuo.
Karteņā: kaidā nu bīdreibys kūpsapuļču
Kas nu “Volūdys” dareituo tev ruodīs vysusvareiguokais?
Bīdreiba ar sovu dorbuošonūs rauga sasnēgt vysaidys auditorejis, bet iz vysa svareiguok ir tys, ka ir arviņ vaira aktivitašu, kas paradzātys deļ bārnu. Zeimeiguokais nūteikti ir “Vuškenis” projekts – kai gruomota, tai dzīsmis mozajim. Mes varim eistynuot vysaidus latgaliskus projektus, bet, ka nabyus nivīna, kas aiz myusu tū turpynuos, šudiņdīnys dorbam gaist jāga. Partū mums pošim, asūšajim i tūpūšajim vacuokim, ir juoruoda pīmārs, ka latgaliskais ir pošsaprūtams. Vysupareizuokais ceļš, kai tū izdareit, ir runuot ar sovim bārnim latgaliski. Tys ir taišni tik vīnkuorši!
Karteņuos: latgalīšu volūdys seminars "Roksti!" i tierguošonuos ar latgalīšu gruomotom, biļdis nu privatuo arhiva
Tovs meiluokais voi svareiguokais pīdzeivuojums, nūtikšona, bīdreibā dareitais ir...
Dorbuošonuos “Volūdā” ir davuse īspieju īpazeit cytu vaļstu “latgalīšus” i jūs volūdu situacejis i pasavērt iz latgaliskū pasauļa kontekstā. Bīdreiba tyka paaicynuota byut par partneri storptautiskā projektā “Mozuoklītuotuos volūdys, leluos īspiejis. Sadarbeiba pietnīceibā, kūpīnu īsaisteišona i inovativi vuiceišonuos reiki – COLING”, kas deva vareibu bīdrim, tymā vydā ari maņ, nūbraukt iz cytom vaļstim i īpazeit tīnis regionalūs i mozuoklītuotūs volūdu situaceju. Dažom kūpīnom situaceju ir lobuoka nakai latgalīšim, ir gon institucejis, kas struodoj pi konkretuos volūdys pietnīceibys, populariziešonys, prestiža ceļšonas, ir atvālāts tam finansiejums nu vaļsts pusis, i kūpumā volūda ir normalizāta i ir stabils lītuotuoju skaits. Bet tymā pošā laikā ir volūdys, kur burtiski myužeibā aizīt pādejī cylvāki, kurim tei bejuse dzymtuo. Storp cytu, itaids stuosts ir ari mums tepat Latgolā. Vēļ na tik seņ mums beja lucu (lutsu) aba Ludzys igauņu volūda, bet niu vaira nav nivīna, kuram tei byutu dzymtuo – volūda ir myruse.
Vieliejums “Volūdys” dorbim iz prīšku!
“Volūda” ir cylvāki aba dareituoji, i es nūvieleju, lai reizi nu reizis myusu komandai pīsavīnoj jauni, energiski, rodūši i dareit gribūšu jaunīši!
Kartenis – Amanda Anusāne i nu personeiguo arhiva.
-------------------------------
Latgalīšu kulturys kusteibys “Volūda” aktivitatis 2025. i 2026. godā finansiali pabolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.
