Deveitajā diktatā latgalīšu rokstu volūdā aicynojam izgaršuot Latgolys maizis stuostu
Oktobra vydā teik svieteita Vaļsts volūdys dīna i, turpynojūt tradiceju, ari itūgod kotrys gribātuojs diktatā teik aicynuots puorbaudeit sovys zynuošonys i prasšonu latgalīšu rokstu volūdā. Deveitais diktats latgaliski skanēs Latvejis Radejis 1 eterā latgaliskajā raidejumā “Kolnasāta” sastdīnis, 18. oktobra, vokorā 18.15 stuņdēs, kai i video formatā byus nūsaverams Latvejis Sabīdryskuo medeja portalā LSM.lv i latgalīšu kulturys ziņu portalā lakuga.lv. Ituo gods diktatā Daugovpiļs teatra aktrise Kristīne Veinšteina skaiteis speciali diktatam topušū Evijis Piebalgys miniaturu par maizi. Diktatu organizej Latvejis Radejis Latgolys multimedeju studeja, latgalīšu kulturys kusteiba “Volūda” i portals lakuga.lv.
Svietejūt Vaļsts volūdys dīnu, kas nu 2021. gods teik atzeimāta 15. oktobrī, jau vairuokus godus par tradiceju beja palykuse pasauļa diktata latvīšu volūdā raksteišona. Koč i itūgod diktats latvīšu literarajā volūdā, kai beja īrosts da ituo, nateik reikuots, turpynuosīs diktata latgalīšu rokstu volūdā raksteišona i, izsverūt latvīšu volūdys byušonu vysaidai, kotrys grybātuojs sevkur pasaulī ari itūgod teik aicynuots paraudzeit spākus raksteit latgaliski, kas ir ūtrei normātuo latvīšu volūdys rokstu tradiceja.
Deveitais diktats latgalīšu rokstu volūdā skanēs sastdīnis, 18. oktobra, vokorā 18.15 stuņdēs latgaliskajā raidejumā “Kolnasāta” Latvejis Radejis 1 eterā, kai i video formatā byus nūsaverams Latvejis Sabīdryskuo medeja portalā LSM.lv i latgalīšu kulturys ziņu portalā lakuga.lv, taipat Latvejis Radejis Latgolys studejis, latgalīšu kulturys kusteibys “Volūda” i portala lakuga.lv socialūs teiklu profilūs.
Diktata tekstu skaiteis Daugovpiļs teatara aktrise Kristīne Veinšteina, bet tekstu “Maize” speciali diktatam pīrakstejuse literarūs miniaturu i fotomuokslys Latgolys sajiutu karteņu “Brīnumdārzs / Breinumu duorzs” autore Evija Piebalga. Raksturojūt ituo gods diktata tekstu, Evija Piebalga soka: “Koč i par maizi ruodīs, ka vyss jau ir pasaceits, tai vysod nu jauna var aplīcynuot uzticeibu. Voi tys byutu rudzu maizis kukuleits, cegleņš voi žagareni – kotram ir sovs raksturs i vīta kai iz kasdīnys, tai svātku golda. Maize vīnoj. Juos garša i smuords atguodynoj sātu i šaļts, kod vysi sēd pi vīna golda – cylvākus, kas myus audzynuojuši, i tū, kas mums eistyn itūšaļt svareigs. Dūmojūt ap diktata tekstu, dūmuoju naviņ par volūdu, bet ari par vierteibu, kū “izgaismuot” ar volūdys paleidzeibu.”
Miniaturys teksts latgalīšu rokstu volūdā radeits, īvārojūt 2007. godā apstyprynuotūs nūsacejumus. Piec diktata nūslāguma teksts puorbaudei byus daīmams portalūs lakuga.lv i LSM.lv.
Latgalīšu volūdys diktata raksteit grybātuojim teik pīduovuota vareiba tekstu raksteit tīšsaistis formā, kai i, ka ir gribiešona, īsnēgt jū klaidu puorbaudeišonai. Tū var izdareit ite: ej.uz/LTGdiktats2025. Taipat itūgod “Volūda” diktata raksteišonai, popularizejūt latgalīšu volūdu, eipaši aicynoj pīsavīnuot Latgolys bibliotekys, da 18. decembra reikojūt publiskas diktata raksteišonys nūtikšonys. Plotuoka informaceja i pīsasaceišonys anketa ite: https://ej.uz/bibliotekom.
Diktatu
latgalīšu rokstu volūdā organizej latgalīšu kulturys kusteiba “Volūda”,
latgalīšu kulturys ziņu portals lakuga.lv i Latvejis Radejis Latgolys
multimedeju studeja, bet atbolsta Sabīdreibys integracejis fonds nu Latvejis
Republikys Kulturys ministrejis daškiertūs Latvejis vaļsts budžeta leidzekļu i
Vaļsts kulturkapitala fonds.
