Kristīne i juos pyrmuos reizis bīdreibā | Svietejam "Volūdys" jubileju!
Novembra suokumā byus taišni 20 godu kai Latvejis Republikys Uzjāmumu registrā pasaruodeja īroksts par “Latgolys Studentu centra” voi niu latgalīšu kulturys kusteibys “Volūda” oficialū dybynuošonu. Gaidūt svātkus, pīduovuosim vaira īpasazeit ar bīdreibys cylvākim i dorbim, deļtuo niu stuosts par “Volūdys” kustynuotuoju Kristīni Pokratnieci, kurei bīdreibā dorbojās jau gondreiž 15 godu.
Kristīne bīdreibā dorbojās nu 2011. gods decembra i sovulaik vysu vaira dorbuojās “Latgolys Studentu centra” Reigys birojā (tautā sauktā – Tonis birojs), beja juo vadeituoja. “Tys ari beja muns pyrmais dorbs i īsaiste bīdreibā. Tod pa reizei pabeju ari vaļdē. Niu dzeivis celi vad nu Reigys caur Kūcānim iz Bierzpili, i lelu daļu bīdreibys dorbu jau var sadareit tī, kur ir dators, elektreiba, internets,” stuosta Kristīne. Itūšaļt jei ir ari konkursa “Latgolys prozys skaitejumi” bolsts – žurejis i daleibnīku koordinatore i konkursa nūtikšonys vierzeituoja i latgalīšu kulturys ziņu portala lakuga.lv rokstu autore. Vaira par Kristīni – ite vaicuojumu i atbiļžu stuostā.
Kū tu dori kasdīnā?
Kasdīnā struodoju ar latvīšu i latgalīšu volūdu vysaiduos izpausmēs – pīsaverūt cytu raksteitū, rokstūt pošai, taisūt volūdys resursus. Bet, ka dorbs byutu vysa dzeive, tys byutu cīši biedeigi, deļtuo dareišona maņ ir ari lauku sāta, nūvodpietnīceiba, doba, ceļuošona i vysys cytys obligatuos dzeivis napīcīšameibys lobai jusšonai.”
Karteņā: Kristīne vodūt lekceju latgalīšu volūdys i kulturys kursūs "Vosoruošona 2025"
Kai dorbuošonuos bīdreibā ir ītekmiejuse tovu dzeivi?
Bīdreiba ir bejuse maņ platforma daudzim “pyrmū reizi” – pyrmū reizi vadeit biroju, pyrmū reizi raksteit projektu, pyrmū reizi organizēt nūmetnis i seminarus i vēļ daudz kū cytu. Taipat ari davuse drūsmi nasabeit koč kū dareit bez leidzekļu, dareit breivpruoteigi i cytu reizi – pat nazynūt, kaids byus rezultats. Puori vysim dorbim – tī ir padsmit munys dzeivis godi, kas pavadeiti breineigā kompanejā, nu kurys vairuokus cylvākus es varu saukt par sovim lobuokajim draugim. Nazynu, voi cytā veidā es byutu īpazynuse tik daudz cylvāku nu vysaidu Latgolys pušu.
Karteņā: Kristīne gruomotu goldā Kīpsolā i nūtikšonā "Tievanānu pavasars"
Tovs meiluokais voi svareiguokais pīdzeivuojums, nūtikšona, bīdreibā dareitais...
Pruotā vaira palīk pīdzeivuojumi – nakšņuošonys sīna škiunī Tievanānūs, septembra orientiešonuos pīdzeivuojumi jaunajim studentim Reigā. Bīdreibys izveiduotuos folklorys kūpys “Ceidari” padareitais maņ ir cīši svareigs i meils. Atguodoju ari gruomotu golda suokumu – tierguošonūs pa vysu Latveju, izstuodis, cylvāku uzklauseišonu – beidzūt jū tyka pi izdavumu, kurus godim beja vaicuojuši, bet tymā laikā vēļ nabeja ni “Omnivu”, ni tik populara gruomotu izplateiba internetā. Taipat ari mes pajēmem idejis, kaidus izdavumus cylvākim vajag – tryuka bārnu gruomotu latgaliski. Tys beja taids breineigs izzinis veids par latgaliskū i kai tū uztver apleicejī. Natryuka ari syudzeibu i nagativuo, bet ari tys pīdar pi lītys.
Karteņā: folklorys kūpa "Ceidari" 2015. gods festivala "Baltica 2015" īskanis koncertā
Kai tev ruodīs – kū bīdreibys darbeiba ir mainejuse Latgolys kulturtelpā?
Bīdreiba ar sovim dorbim i cylvākim, kas ir jimā, paruodejuse, ka latgaliskais ir normala latvyskuo daļa, iznasuse tū plotuokai sabīdreibai uorpus Latgolys. Dūmoju, ka daudzys lītys – gruomotu izdūšona, seminari, nūmetnis i cyti projekti ir pacalti jaunā gaismā, lobā kvalitatē i ir lateņa cytim, kas dorbojās latgaliskajā. Taipat ari skaitu, ka ar sovim dorbim, jei ir iznasuse latgaliskū. Vysusvareiguokuo līta, kū “Volūda” dora, maņ ruodīs ir dorbs ar jaunīšim, latgaliskuo styprynuošona jimūs, volūdys populariziešona i apvuiceiba (pīm., caur literaturys konkursim, volūdys seminarim) i breineigu gruomotu i cytu materialu izdūšona latgaliski.
Vieliejums “Volūdys” dorbim iz prīšku!
Saknis ir spāks, tok vajag ari spieceigys atzolys! Vieleju turpynuojumu bīdreibai dorbūs, nūtikšonuos i pīdzeivuojumūs!
Kartenis – Amanda Anusāne i nu personeiguo arhiva.
-------------------------------
Latgalīšu kulturys kusteibys “Volūda” aktivitatis 2025. i 2026. godā finansiali pabolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.
