"Volūda" pīsadola Eiropys Volūdu festivalā
19. septembrī Eiropys Komisejis puorstuovnīceiba Latvejā aicynuoja sasatikt “Eiropys Volūdu festivalā” Latvejis Nacionalajā bibliotekā. Festivalā pīsadaleja ari latgalīšu kulturys kusteiba “Volūda”.
Festivals nūtyka ūtrū reizi, bet “Volūda” ar sovu stendu, aicynojūt izzynuot vaira ap latgalīšu volūdu, pīsadaleja pyrmū reizi. Festivala nūtikšonuos vysys dīnys garumā kluotyn beja vaira nakai 2500 apmaklātuoju – eipaši tyka aicynuoti vysu vacumu školāni i volūdu školuotuoji.
Eiropys Volūdu dīnys mierkis ir veicynuot interesi par Eiropys volūdu daudzveideibu. Sovā stendā pīduovuojom lelformata spēlis i digitalūs testus, kai i eipaši aicynuojom īpazeit latgalīšu volūdys alfabeta burtu “y”, vuiceitīs jū pareizi skaiteit. Skotivis programā beja vareiba iz šaļteņu satikt Lauru Melni i komiksu “Sunāns breiveibā”, kai i īsajust kača i Sunāna lūmuos.
Dīnys laikā, sateikūt tik daudzi bārnu nu vysaidu Latvejis vītu, beja skaidrys, ka par Latgolu i latgalīšu volūdu nazkū zyna viņ rešais, bet reizē ar vaicuojumim par volūdu sajēmem cīši daudzi izsaucīņu: “Maņ mama/tāvs/baba nu Latgolys, beja tak juozyna!” Turim nūceju, ka itei dīna mudynuot izzynuot vaira par saknem.
Lels paļdis Eiropys Komisejis puorstuovnīceibai Latvejā par aicynuojumu pīsadaleit! Paļdis Agnesei, Edeitei, Inesei i Laurai, kurys Eiropys Volūdu festivalā beja kluotyn i viesteja latgalīšu volūdys stuostu!
____________________
Latgalīšu kulturys kusteibys “Volūda” aktivitatis 2025. i 2026. godā finansiali pabolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.
