Izsludynoj literaturys konkursu “Latgolys prozys skaitejumi 2025”
Kab veicynuotu literarū procesu Latgolā i latgaliski raksteitūs tekstu radeišonu Latvejā, jau sastū reizi latgalīšu kulturys kusteiba “Volūda” izsludynoj konkursu i aicynoj Latgolys kulturtelpai pīdareigūs prozys autorus pīsadaleit “Latgolys prozys skaitejumūs 2025”. Da ituo konkurss veicynuojs jaunu raksteituoju pasaruodeišonu latgaliskuos literaturys telpā, deļtuo konkursa reikuotuoji aicynoj jū izmontuot kai platformu ari debejis dorbu publiciešonai.
Literaturys konkursa “Latgolys prozys skaitejumi 2025” moto itūreiz ir vaicuojums “Kai tev dzelys?”. Tys sasasauc ar storptautyskuo festivala “Prozas lasījumi” ituo goda aicynuojumu aizdūt itū vaicuojumu pošim sev i atbiļdi puorvērst stuostā. Autori aicynuoti īsyuteit pošu radeitus i da tuo napublicātus tekstus latgalīšu rokstu volūdā voi latvīšu literarajā volūdā. Dorbi tiks vārtāti, vysu vaira izceļūt literaruo teksta kvalitati i pīdareibu Latgolys kulturtelpai, tai atkluojūt regiona sovpateibu i paruodūt latgaliskumu juo plotuokajuos nūzeimēs.
Konkursa kuratore Kristīne Pokratniece par ituo gods konkursa temu soka: “Tys ir svareigs vaicuojums, kurū aizdūt naviņ sovam tyvuokajam vokorā pi čaja, bet ari sev pošam. Kai tu eistyn jiutīs itymā pasaulī? Voi esi ari gotovs patīsai atbiļdēt i nu sirds izklauseit? Var izaruodeit, ka atbiļdē pasaglobuojs vasals stuosts – pylns ilgu, cereibu, sapynu. Bet varbyut tev ir drūsme pavaicuot itū vaicuojumu najaušam garumguojiejam, ar kurū pieški sasagribiejs vīnkuorši parunuot. Tys var byut suokums nūpītnai sarunai i interesei par sūpluok asūšū, bet vēļ nazynomū i piļneigi nagaideitū. Aicynojam puorvērst ituos sarunys ar sevi voi ūtru literarūs dorbūs!”
Pīsadaleit konkursā “Latgolys prozys skaitejumi 2025” var, īsnādzūt dorbus – esejis, stuostus, romanu fragmentus (7000–12 000 zeimu apmārā) – da ituo gods 24. oktobra, syutūt tūs latgalīšu kulturys kusteibai “Volūda” iz e-postu [email protected] ar nūruodi “Latgolys prozys skaitejumi 2025″. Pīsacejumā juobyut teksta elektroniskajai versejai, ziņom par sevi (vuords, pavuorde, dzimšonys gods, nūsadorbuošona, eisa rodūšuo biografeja (3–4 teikumi)) i kontaktinformaceja (telepona numers, e-posts). Ar pylnu konkursa nūlykumu var īpasazeit ITE.
“Latgolys prozys skaitejumi 2025” nūslāguma pasuokums byus ituo gods 4. decembrī kluotīnē Lūznovys muižā. Lobuokūs tekstu autori pīsadaleis nūtikšonā ar sovu dorbu skaitejumim, sovpus uzvarātuojam ar sova dorba skaitejumu byus pīduovuota vareiba pīsadaleit ari festivala “Prozas lasījumi 2025” nūtikšonuos.
Konkursā īsnāgtūs dorbus vērtēs žureja Latvejis literaturys procesūs īsaisteitu cylvāku sastuovā – literate, literaturzynuotneica, latgalīšu kulturys kusteiba “Volūda” puorstuove Ilze Sperga, žurnaliste Maruta Latkovska, tulkuotuoja Māra Poļakova, paguojušuo “Latgolys prozys skaitejumi” konkursa uzvarātuoja, literate i gruomotu blogere Inga Kaļva-Minina, volūdnīks i tulkuotuojs Snorre Karkonens-Svensons. Konkursā treis vysuvaira punktu sajāmušī autori sajims atleidzeibys par dorbu publiciešonu 350, 250 i 200 eiro apmārā. Taipat uzvarātuoju gaida vareiba 2026. godā izmontuot desmit dīnys garu raksteišonys rezidenci Lūznovys muižā (ar apmoksuotu uzaturiešonu rezidencē i stipendeju rodūšajam dorbam).
Latgalīšu kulturys kusteiba “Volūda” ir navaļstiska organizaceja, kas apvīnoj cylvākus, kam ir svareigi saglobuot i atteisteit Latgolys i latgaliskū kulturtelpu, latgalīšu volūdu. Bīdreiba vysod ir raudzejuse vysa pyrma atbaļsteit jaunūs latgalīšu autorus i izdūt kvalitativu literaturu, viereibu vaira dagrīžūt jaunīšu auditorejai. Konkursa nūtikšona niu palykuse par stabilu tradiceju latgalīšu literaturā, kas profesionalā veidā izceļ prozys raksteituojus, īpazeistynoj ar jim skaiteituojus, kai ari ir nūzeimeiga platforma jaunu autoru pasaruodeišonai literaturys telpā. Konkurss “Latgolys prozys skaitejumi” ir daļa nu latgalīšu kulturys kusteibys “Volūda” eistynuotuos literaruos jaunradis latgaliski veicynuošonys programys. Nūsavērt pārnejuo gods konkursa nūslāgumu i nūsaklauseit finalistu dorbus var ITE.
Festivals “Prozas lasījumi” nūteik nu 1995. gods, jū organizej Latvejis Rakstnīku savīneiba. Laika gaitā “Prozas lasījumi” nu nalela pasuocīņa izauguši vairuoku dīnu prozys festivalā, kura programā ar sovu jaunuokūs dorbu voi jūs fragmentu skaitejumim pīsadola vysaidu paaudžu Latvejis i cytu vaļstu rakstnīki.
Konkursa nūtikšonu atbolsta storptautyskais literaturys festivals “Prozas lasījumi 2025” (reikuotuojs Latvejis Rakstnīku savīneiba), Vaļsts kulturkapitala fonds, Rēzeknis nūvoda pošvaļdeiba i Lūznovys muiža, žurnals “Domuzīme”, apguods “Zvaigzne ABC” i latgalīšu kulturys ziņu portals lakuga.lv.