Kas tei taida “Latgalīšu volūdai draudzeiga vīta”?
Latgalīšu kulturys kusteiba “Volūda” i latgalīšu kulturys ziņu portals lakuga.lv 2020. godā aizsuoce akceju “Latgalīšu volūdai draudzeiga vīta”, kurys mierkis ir veicynuot latgalīšu rokstu volūdys lītuošonu publiskajā telpā Latgolā i cytur Latvejā i pasaulī. Kūpā akcejai niu atsasaukuši 150 dalinīki – uzjiemieji, navaļstiskuos organizacejis, pošvaļdeibu i vaļstis īstuodis. Itaida veida aktivitatis – aicynuot kasdīnā i sadzeivē vaira lītuot kaida regiona dzeivuotuoju dzymtū volūdu ar eipašu vizualūs zeimu paleidzeibu – ir ari cytur pasaulī. Itymā rokstā variesi izzynuot, kas da šam sadareits i kai vari īsasaisteit akcejā.
Kas tei par akceju?
Akcejis i eipašys atzeimis, kab rūsynuotu sabīdreibu lītuot sovu dzymtū voi kaidam regionam eipašū volūdu pasaulī ir īrosta prakse. Eipašys uzleimis, kab atzeimātu latgalīšu volūdai draudzeiguos vītys, tykušys radeitys jau pyrma laika, bet kai sabīdreibys īsaistis kampaņa “Latgalīšu volūdai draudzeiga vīta” aizsuokta 2020. godā. Itūšaļt akcejā “Latgalīšu volūdai draudzeiga vīta” jau īsasaistejuši 150 dalinīki – uzjiemieji, navaļstiskuos organizacejis, pošvaļdeibu i vaļstis īstuodis kai Latgolā, tai cytur Latvejā i pasaulī. Karti ar vysom vītom vari apsavērt ITE.
Kas padareits i plānuots?
Akcejis populariziešonys aktivitatēs izveiduots interaktivs maršruts pa latgalīšu volūdai draudzeigom vītom Rēzeknē, sataiseiti vairuoki socialūs teiklu īroksti video formatā i organizāti vysaidi pasuokumi, kab rūsynuotu leluoku latgalīšu volūdys lītuošonu kasdīnā i veicynuotu sabīdreibys izpratni par latgalīšu volūdys vierteibu i pozitivu attīksmi pret jū.
Akceja i juos daleibnīki teik popularizāti caur socialūs teiklu īrokstim video formātā – kūpā sataiseiti 27 eisī video (jūs vari nūsavērt ITE). Teik uzklauseiti ari cylvāku īrūsynuojumi, kai vaira aicynuot lītuot latgalīšu volūdu caur itū akceju, daži nu jūs jau ir eistynuoti. Par pīmāru, “Zeļču sola” īsaceja sataiseit ceļuojumu maršrutus pa kaidom vītom, kas atsarūn sūpluok. Itei ideja 2023. godā tyka eistynuota – sagataveits interaktivs maršruts-spēle pa latgalīšu volūdai draudzeigom vītom Rēzeknis piļsātā “Latgalīšu volūdai draudzeiga vīta – ite Rēzekne”, jū var izīt ITE. Paraleli spēlis akcejai 2023. godā tyka reikuoti vysaidi pasuokumi Rēzeknē, kurūs vēļ vaira varēja izzynuot latgaliskū Rēzeknē voi pošu latgalīšu volūdu. Kūpā ar bīdreibu “Nezināmā Rēzekne” īts puorguojīnī pa latgaliskom vītom Rēzeknē, izzeimuots muraļs “latgaliski” kūpā ar grafiti muokslinīku i “Ausmeņa Records” dalinīku Valteru Murānu, kūpā ar kusteibu “Loesje” sagataveiti plakati ap volūdu i cytom temom latgaliski, dalīkūt ari latgalīšu volūdu storptautyskajā plakatu saimē, plakati daīmami storptautyskajā “Loesje” arhivā ITE, taipat kūpā ar piļsātys dzeivuotuojim, akcejis dalinīkim i sabīdreibā zynomim cylvākim atkluots i izīts maršruts-spēle “Latgalīšu volūdai draudzeiga vīta – ite Rēzekne”, kai i sataiseits sezonys nūslāguma koncerts.
Itūgod akcejis mierkis ir aicynuot jamā īsasaisteit jaunus dalinīkus, aktivizēt jau asūšūs i rūsynuot ari leluoku sabīdreibys pīsadaleišonu, kai ari organizēt vysaidus pasuokumus, kab popularizātu akceju i latgalīšu volūdu.
Ka tu, tova vīta voi piļsāta/nūvods asat gotovi vaira īsasaisteit akcejā i jums ir idejis, kai tū izdareit, drūsai rokstit iz [email protected]. Varbyut kūpā varim sagataveit izzynojūšu maršrutu, nūvadeit kaidu aktivitati voi nūdarbeibu, lai tova vīta palyktu vēļ draudzeiguoka latgalīšu volūdai!
Kai var pīsadaleit akcejā?
Kab pīsadaleitu akcejā, interesenti aicynuoti aizpiļdeit dasacejuma anketu, kas atrūdama akcejis lopā lakuga.lv/ltg-vita. Tī var izzynuot vaira ari par pošu akceju, juos dalinīkim i īspiejom. Ar akcejis dalinīkim sasazynuos “Volūdys” puorstuovs, i kotrys akcejis dalinīks sajims ari uzleimi “Latgalīšu volūdai draudzeiga vīta”, kurū varēs izmontuot kai vītys atpazeišonys zeimi i īdrūsynuojumu sabīdreibai ite runuot latgaliski. Taipat uzleimi var lītuot ari digitalā formatā, kai ari izdrukuot i izmontuot piec sovu īskotu, ka tī nav pretrunā ar akcejis ideju. Uzleimi nadreikst puordūt, ari tod, ka persona tuos izgataveišonā investiejuse sovus leidzekļus. Uzleime zamynīluodiešonai daīmama ITE.
Kū var dūt i sajimt preteimā?
Vysa pyrma, vītai eistyn juobyut draudzeigai latgalīšu volūdai! Tys var izapaust kai īspieja ar klientim sasarunuot latgaliski, latgaliskys produkcejis, suveniru, pakolpuojumu pīduovuošona, eipašys akcejis klientim, kurī sasazynoj latgaliski, latgalisku pasuokumu reikuošona, saziņa sovā vydā latgaliski, raksteišona latgaliski publicitatis materialūs i teiklūs i cyti veidi, kas akcejis dalinīkam var īīt pruotā. Pīsadaleišona akcejā ir breivpruoteiga, i ar jū kotrys dalinīks pauž atbolstu latgalīšu volūdai, bet reizē jei naizlīk nikaidus aizdavumus i saisteibys.
Akcejis reikuotuoji dalinīkim pīduovoj kluotyn publicitatis īspiejis – īkļaušonu akcejis kartē (ar aprokstu i biļdem), publicitati latgalīšu kulturys kusteibys “Volūda” i portala lakuga.lv socialajūs teiklūs (Facebook, Instagram, TikTok), stuostūt sabīdreibai par vītom, kuruos var dzierdēt, redzēt voi kai cytaiž pīdzeivuot latgalīšu volūdu, kai ari īspieju pīsadaleit akcejis eipašajuos aktivitatēs. Taipat “Volūdys” aktivisti i portala lakuga.lv redakceja vysod gotovi nūdrūsynuot atbolstu latgalīšu pareizraksteibys vaicuojumūs (da 1000 rokstzeimu bez moksys). Sasazynuot i aizdūt vaicuojumus, lyugt paleidzeibu teksta puorsavieršonā var, rokstūt [email protected]. Sarežgeituoku aizdavumu voi leluoku tekstu puorlikšonā voi korigiešonā aicynojam izmontuot Vaļsts volūdys centra latgalīšu volūdys lingvista paleidzeibu, zvonūt konsultantam pa telefonu 67334627 ci nūsyutūt pīprasejumu iz e-posta adresi [email protected] voi [email protected].
____________________
Latgalīšu kulturys kusteibys “Volūda” aktivitatis 2025. i 2026. godā finansiali pabolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.
