Festivalā “Muzykys Skrytuļs” “Volūda” pīduovuos darbneicys i kaitys bārnim
Sastdiņ, 19. julī, i svātdiņ, 20. julī, Augšdaugovys nūvoda Leiksnā otkon skanēs muzykys festivals “Muzykys Skrytuļs”. Ari latgalīšu kulturys kusteiba “Volūda” byus kluotyn festivalā, nu 16 da 20 stuņžu pīduovojūt darbneicys i kaitys saimem i bārnim.
Festivala laikā bārni i jūs vacuoki varēs izspēlēt vairuokys leluo formata kaidys – zynuošonu, atjauteibys i ari veiksmis kaitu “Čipierkstneits”, latgaliskūs nūsaukumu kruosu domino i augu nūsaukumu atminis spēli. Bārni varēs pasadorbuot ar dzeivinīku kruosojamajom lopom, iz kurūs ir jūs latgaliskī nūsaukumi, voi pošim īsajust komiksa “Sunāns breiveibā” izkruosuotuoju lūmā. “Volūdai” leidza byus i jaunuokuos bārnu gruomotys latgaliski, pīduovojūt kotram grybātuojam vareibu koč kū latgaliski ari paskaiteit.
Nu 17 da 19 stuņžu “Volūdai” ar darbneicom pīsavīnuos latgalīšu komiksa bārnim “Sunāns breiveibā” ilustratore, muokslineica Vivianna Maria Stanislavska, ar kurū kūpā bārnim byus vareiba tikt pi sovu mozūs komiksu gruomateņu.
Festivalu “Muzykys Skrytuļs” sovulaik radeja i eistynuoja tuo laika “Latgolys Studentu centra” (niu “Volūdys”) aktivisti. Taipat taišni pyrmajā festivalā 2005. godā bīdreiba pyrma 20 godu tyka nūdybynuota ari juridiski.
Itūgod festivals, kas ir vīna nu nūzeimeiguokūs nūtikšonu myusu dīnu latgalīšu muzykys veicynuošonā, pīduovoj aktivitatis iz treis skotivem. Vaira par festivalu izzynuot i programu apsavērt var ite: https://www.facebook.com/muzykysskrytuls
____________________
Latgalīšu kulturys kusteibys “Volūda” aktivitatis 2025. i 2026. godā finansiali pabolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.
