20 godu nu bīdreibys dybynuošonys
Itūgod Leiksna 19. i 20. julī otkon aicynoj iz festivalu “Muzykys Skrytuļs”. Juo laiks latgalīšu kulturys kusteibai “Volūda” vysod ir cīši lobu atmiņu pīpiļdeits, kam 14. julī dzimšonys dīnu svietej latgalīšu kulturys ziņu portals lakuga.lv, kura atkluošona beja 2017. gods festivalā, bet 16. juļs 2005. godā leidza ar pyrmū festivalu ir latgalīšu kulturys kusteibys “Volūda” dybynuošonys dīna.
Tūlaik organizaceja dybynuota kai “Latgales Studentu centrs”, piečuok puorsaukta “Latgoys Studentu centrs” i vīnkuorši “LgSC”, bet šudiņ asam “Volūda”. Pīduovojam pasakavēt atmiņuos i apsavērt bīdreibys dybynuošonys protokolu pyrma vasalu 20 godu. Taipat – ka kaidam nu dybynuotuoju voi tyvumā asūšūs varbyut ir tuo laika foto līceibys, cīši prīcuosimēs, ka pasadaleisit!
Kai intervejā “Volūdai” soka vīns nu dybynuotuoju i pyrmais organizacejis vadeituojs, niu Saeimys deputats Jurs Viļums, da tuo entuziasti turējuos kūpā naformali. Par motivaceju naformalū dorbuošonūs padareit formaluoku i dybynuot oficialu organizaceju, Jurs stuosta: “Izreiz juonūdola bīdreibys dorbuošonuos pyrma oficialuos nūsadybynuošonys i piec tuos. Jau nu 80. godu beigu latgalīšu studenti guoja kūpā i mekleja veidus, kai latgaliskumu izviļkt nu dziļajim koktim – lai nav tikai “parunuosim sātā, nu, varbyut ari bazneicā”. Taiseja aptaujis, paleidzēja reikuot nūmetni školuotuojim “Vosoruošona”, vēļ pyrma oficialuos 2005. gods nūsadybynuošonys pagivem īrunuot bazneicys puorstuovus i volūdnīkus atsasēst pi vīna golda i salikt gramatiku tai, kab varātu volūda aktivuok dzeivuot ari rokstūs. Papyldu nūtyka čyguonūs īšonys i cytys jaunīšu kūpā saīšonys, kas pīsadar jaunim ļaudim. Tok vysys ituos darbeibys beja ar puortraukumim, da nuokamajam entuziastam, kurs uzajēme kū naviņ sareikuot i tod varēja byut ilguoks klusums. Tai suoktuos “vacuo” bīdreibys turpynuoja sovys tradicejis, tok jaunu iniciativu praktiski nabeja. Deļ tam 2005. godā kūpā ar Arvi Soldānu Daugovpilī izdūmuojom, ka vajag vystik izveiduot oficialu bīdreibu, kab byutu regulara darbeiba, koč kaids sistematiskums i, kū tī slēpt, ari kaidys īspiejis pretendēt iz projektu konkursu finansejumu. Paļdis juosoka Ilzei Mežinīcei (ilggadejai “Vosoruošonys” reikuotuojai), kas pasaceja: “Nikas tī jums nasaīs!” Deļ tam, ka da tuo “Latgolys Studentu centrs” (LgSC) beja eistyn taida naformala dūmubīdru kūpa, kas nūsaturēja iz sovstarpejuos uzaticiešonys placu i iz plyka entuziasma. Ilzis saceitais laikam dzili īknībe i gribiejuos pīruodeit, ka saīs gon!”
Kai līcynoj tuo poša Jura raksteitais, svietejūt bīdreibys pīcu godu jubileju, vēļ 2004. gods rudinī da gola nabeja puorlīceibys, ka organizaceja eistyn juodybynoj. Tuo laika sasaraksteišonys pīzeimis var puorskaiteit ite: https://lpr.gov.lv/lv/2010/lgsc-dzimsonys-dina/
Lels paļdis bīdreibys dybynuotuojim par apjiemeibu organizaceju vystik dybynuot i par padareitū, lai i šudiņ varim turpynuot aizsuoktū!
____________________
Latgalīšu kulturys kusteibys “Volūda” aktivitatis 2025. i 2026. godā finansiali pabolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.
