Izdūts Sarmītis Trūpys debejis stuosts "Melnais stārķis" par 20. godu symta Latgolu
Latgalīšu kulturys kusteiba “Volūda” izdavuse i 18. julī Viļānūs, kai ari 20. julī Reigā aicynoj iz Sarmītis Trūpys debejis gruomotys — stuosta “Melnais stārķis” – attaiseišonys nūtikšonom. “Melnais stārķis” darbeiba nūteik 20. godu symta Latgolā, īzeimejūt taidys temys kai regiona dzeive, kars i juo sakys, varmuoceiba i napīpiļdeiti sapyni. Gruomota pīraksteita obejuos latvīšu volūdys rokstu tradicejuos – latvīšu literarajā i latgalīšu volūdā.
Stuosts “Melnais stārķis” ir Sarmītis Trūpys debejis dorbs literaturā. Da ituo autore bejuse konkursa “Latgolys prozys skaitejumi” finaliste, publicējuse dorbus latgalīšu kulturys ziņu portalā lakuga.lv. Autore īt nu Viļānu, bet kasdīnā dzeivoj Vuocejā i struodoj Maincys Universitatē (Johannes Gutenberg-Universität Mainz), pasnādzūt latvīšu volūdu i cytus volūdnīceibys kursus, kai ari pietejūt latgalīšu volūdu.
Stuosta “Melnais stārķis” darbeiba nūteik 20. godu symta Latgolā, īzeimejūt taidys temys kai regions, kars i juo sakys, varmuoceiba, naeistynuoti sapyni – temys, kas ir svareigys ari myusu dīnuos. Gruomotys golvonuo tāla prototips ir autoris vactāvs, kurū jei gondreiž napazyna, vystik stuosts nav dokumentals voi biografiskys, jis skaitoms par literaru dorbu. Koč i stuostā raudzeits pīsaturēt pi konkretu geografisku i kulturviesturysku faktu, kai ari darbeiba nūteik na izdūmuotuos Latgolys vītuos, bet Viļānūs, Varakļuonūs i Rēzeknē, vystik itys nav ari viesturyskys voi zynuotniskys dorbs, i stuosts cytureiz īt pats sovu ceļu – kaida sāta varbyut nav atsaroduse Viļānūs voi kaids školuotuojs eistineibā nav struoduojs Varakļuonu gimnazejā.
Gruomotys attaiseišonys paradzātys 18. julī Viļānūs, Viļānu piļsātys bibliotekā (Kulturys laukumā 2), 16 stuņdēs i 20. julī Reigā, Raiņa i Aspazejis sātā (Bazneicys īlā 30). Prezentacejuos autorei pīsavīnuos ari muzykalī gostī — Viļānūs folklorys pietnīks, garmanists Aigars Lielbārdis, bet Reigā – dirigents i kontrabasists Juoņs Stafeckis.
Autore Sarmīte Trūpa, viestejūt par jaunū izdavumu, soka: “Pīraksteit stuostu “Melnais stārķis“ gribieju jau cīši seņ, bet vysa pyrma maņ pošai vajadzēja pīaugt i pīdzeivuot dzeivi. Koč i gruomota ir topuse, bolstūtīs iz eistynom nūtikšonom, jei vystik nav biografiska. Itys ir mane izdūmuots stuosts, muna verseja ap cylvāku, kurū napazynu, bet raudzeju saprast.”
Gruomota pīraksteita obejuos latvīšu volūdys rokstu formuos, kas sasavyn vīnā plyustūšā viestejumā. Gruomotu papyldynoj vuordineica īspiejami naskaidrūs vuordu lobuokai saprasšonai.
Stuosta redaktors, literats Valentins Lukaševičs par Sarmītis Trūpys debejis dorbu atzeimej: "Latgaliskais nav tikai komiskais i arhaiskais. Ir ari laikmateigi teksti, kuri viestej par myusu dīnu problemom, myusu laika suopem i prīcu. Raksteiti daudzvolūdeigi, pylni asociaceju, psihologejis i simbolu. Aiz īguodu tī ir atīsme, aiz styla — poša autore."
Stuosta “Melnais stārķis” izdeviejs ir latgalīšu kulturys kusteiba “Volūda”. Jaunuo izdavuma redaktors ir Valentins Lukaševičs, muokslineica-maketātuoja Daina Salmiņa, korektore Muora Mortuzāne-Muravska, bet izdūšonys projekta vadeituoja – Edeite Laime. Gruomotys tapšonu atbaļstejs Vaļsts kulturkapitala fonds. Izdavums byus daīmams gruomatneicuos i gruomotu veikalūs, kai jau niu jū var pasyuteit kusteibys “Volūda” veikalā-atbolsta platformā voluda.lv ITE.