Pāriet uz galveno saturu
  • ATBAĻSTEIT
  • NŪPIERKT
  • BYUT
  • PADAREIT
  • VIESTS
  • SASAZYNUOT
  • NŪSACEJUMI
  • PAĻDIS

Julī Rogovkā byus latgalīšu volūdys i kulturys kursi “Vosoruošona”

5. jūnijs, 2025 pl. 10:42, Nav komentāru

Vosoruosona_3_dina_Rogovka_foto_Amanda_Anusane-108.jpg

Nu 27. da 31. juļa Rēzeknis nūvoda Rogovkā byus latgalīšu volūdys i kulturys vosorys kursi “Vosoruošona 2025”. Kursūs aicynuoti dasasaceit školuotuoji nu vysys Latvejis, kuri školuos jau vuica voi tyvuokajā laikā plānoj vuiceit latgalīšu rokstu volūdu, taipat var dasasaceit pedagogejis studenti i cyti latgalīšu volūdys i kulturys interesenti, kurim latgalīšu volūdys zynuošonys varātu nūderēt profesionalajā darbeibā.


Latgalīšu volūdys i kulturys vosorys kursūs “Vosoruošona 2025”, kas suoksīs svātdīnis, 27. juļa, piecpušdīnē i byus da catūrtdīnis, 31. juļa, prīškpušdīnis, byus vareiba nūstyprynuot zynuošonys latgalīšu rokstu volūdā, jaunumim latgalīšu volūdys atteisteibā, izzynuot vaira par metodem, resursim i leidzeklim, kas byutu nūdareigi vuiceibu prīškmata “Latgalīšu rokstu volūda” vuiceišonā školā, padzilinuot zynuošonys par latgalīšu literaturu, Latgolys kulturviesturi i myusu dīnu latgaliskuos kulturys procesim. Taipat kursu daleibnīkim byus vareiba pīsadaleit rodūšajuos nūdarbeibuos, pasadaleit ar sovu i izzynuot cytu školuotuoju pīredzi, sasatikt ar latgaliskuos kulturvidis personeibom, kai i kursu vokoru pasuokumūs dabuot īdviesmi i prīškstotu par latgalīšu kulturys aktualitatem.

Latgalīšu volūdys, literaturys i kulturviesturis školuotuoju asociaceja, kas ir vīna nu vosorys kursu reikuotuoju, regulari reikoj školuotuoju apvuiceibys i kursus, kab styprynuotu latgalīšu volūdys školuotuoju zynuošonys, bet “Vosoruošona” īrosts ir vareiba intensivu kursu veidā dabuot jaunuokū informaceju ap latgalīšu volūdu i, izmontuot volūdys specialistu i latgalīšu kulturys ekspertu kluotyn byušonu, kab vuiceitūs i izzynuotu volūdu, sajimtu metodiskū atbolstu i pasadaleitu ar sovu pīredzi.

Kursūs “Vosoruošona” aicynuoti dasasaceit školuotuoji nu vysys Latvejis, kuri školuos jau vuica voi tyvuokajā laikā plānoj vuiceit latgalīšu rokstu volūdu, taipat var dasasaceit pedagogejis studenti i cyti latgalīšu volūdys i kulturys interesenti, par pīmāru, žurnalisti, kulturys darbinīki i cyti, kurim latgalīšu volūda iz prīšku varātu nūderēt profesionalajā darbeibā, styprynojūt volūdys zynuošonys i lūmu sabīdreibā.

Vosorys kursim “Vosoruošona” var dasasaceit da 20. juņa, aizpyldūt tīšsaistis anketu ITE. Vītu skaits kursūs īrūbežuots. Vaira dasacejumu gadīnī prīškrūka byus latgalīšu rokstu volūdys školuotuojim, kuri jau vuica volūdu školā voi plānoj tū dareit tyvuokajā laikā. Ar precizu kursu programu byus vareiba īpasazeit tyvuok nūtikšonai. Piec kursu nūslāguma tūs daleibnīki sajims 36 stuņžu aplīceibu. Kursu leidzmoksuojums nu daleibnīka itūgod ir 30,00 eiro. Kursūs teik nūdrūsynuota nakšņuošona, ādynuošona (treis reizis dīnā), kai i intensiva vuiceibu, rodūšūs darbneicu i nūtikšonu programa.

Vosorys kursi “Vosoruošona” pyrmū reizi nūtyka 2000. godā, itūgod byus jau 15. “Vosoruošonys” sasatikšona. Latgalīšu volūdys i kulturys kursus “Vosoruošona 2025” reikoj Latgalīšu volūdys, literaturys i kulturviesturis školuotuoju asociaceja (LVLKŠA), latgalīšu kulturys kusteiba “Volūda” i Nautrānu vydsškola. Nūtikšonu atbolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu, Latvīšu volūdys agentura, Rēzeknis nūvoda pošvaļdeiba i Nautrānu apvīneibys puorvaļde.

Apsavērt, kai guoja īprīškejuos reizis kursūs (2023. godā) var latgalīšu kulturys ziņu portala lakuga.lv rokstā ITE.


____________________

Latgalīšu kulturys kusteibys “Volūda” aktivitatis 2025. i 2026. godā finansiali pabolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.

SIF_NVOfonds-1536x384.png

Nav komentāru

Komentēt







Jaunākie ieraksti

  • Kas tei taida “Latgalīšu volūdai draudzeiga vīta”?
    27. aug. 2025
  • Dzejis dīnu tradiceja Rogovkā – dzejnīku sasaceņsšona i literarī pyrmatskaņuojumi muzykā
    15. aug. 2025
  • Latgalīšu volūdys i kulturys kursi “Vosoruošona” svieteis 25 godu jubileju
    23. jūl. 2025
  • Festivalā “Muzykys Skrytuļs” “Volūda” pīduovuos darbneicys i kaitys bārnim
    16. jūl. 2025
  • 20 godu nu bīdreibys dybynuošonys
    16. jūl. 2025
  • Izdūts Sarmītis Trūpys debejis stuosts "Melnais stārķis" par 20. godu symta Latgolu
    8. jūl. 2025
  • Jurciņa pīmiņai veļteitajā literatu konkursā uzvar Rasma Svikle, Elizabete i Aija Mikele
    2. jūl. 2025

Vacuos viests

Vysys bīdreibys īprīškejuos viests var puorskaiteit lgsc.lv

Pirkumu grozs

Pirkumu grozs ir tukšs.

Log in

Incorrect password.




Forgot password?
Create an account
Login to existing account
My orders
My reviews
My details
Log out

Atbolsti myusu kusteibu ar vīnys reizis voi kotra mieneša zīduojumu aplikacejā "Mobilly".