"Volūda" iz juridiskūs 20 godu jubileju roda eipašū kopeju!
Sastdiņ, 11. oktobrī, "Volūdys" kustynuotuoji sasatyka iz kopeja meistarklasi "KUUP COFFEE" grauzdātovā Rēzeknē, lai radeitu eipašū bīdreibys juridiskūs 20 godu jubileja kopeju. Meistarklasē bīdri izzynuoja vaira par "KUUP COFFEE" saiminīku ceļu kopeja pasaulī, kai ari poši pīsadaleja kopeja grauzdiešonys procesā – nu zaļu pupeņu da īpakuojuma nūformiešonys.
Kopejs, kas grauzdāts, sūpluok sepinejūt, guodojūt, runojūt, dzīžūt latgaliski. Dzymtuos volūdys skanis ir kai guņs dzierksts, kas kotrai kopeja pupeņai davušys dzeiveibu i atmūdynuojušys jamā zemis spāku. Kai Latgolys muols, kas, izkarsāts gunī, palics par vazaunīku voi svečturi. Kai sirsneigī Latgolys cylvāki, kas i sadzīduos, i paklusēs leidza. Itei garša stuosta par dzymtū sātu i sovom saknem, kas sasylda taipat kai lobs vuords i kopeja kruškeņa nu reita. Pīsasyukuse ar dzymtuos volūdys syltumu i Latgolys bolsim. Jei sevī nas spāka vuordus. Niu ari tu vari vysu!
2. novembrī byus taišni 20 godu nu šaļts, kod Uzjāmumu registrā pasaruodeja īroksts par bīdreibu “Latgales Studentu centrs”. Koč i piečuokuo “Latgolys Studentu centra”, vīnkuorši “LgSC” voi kai niu – “Volūdys”, – stuosts ir garuoks par itim 20 godim, bet jī vystik ir gona svareiga šaļts, lai svieteitu i prīcuotūs par padareitū.
Oktobrī ar vysaidom aktivitatem "Volūda" īsuoc svieteit itū lelū nūtikšonu. Vīna nu aktivitašu 11. oktobrī beja "KUUP COFFEE" meistarklase bīdrim, kurā tyka grauzdāts pošim sovs jubileja kopejs.
Meistarklase nūtyka "KUUP COFFEE" grauzdātovā Rēzeknē, kur latgaliskā gaisūtnē sasalaseja aktivuokī bīdri. Īsuokumā saiminīki izstuosteja sovu kopeja stuostu, kas jūs nu Reigys atvede atpakaļ iz Latgolu, īpazeistynuoja ar teoretiskū informaceju par kopeju, kai ari deve praktiskus padūmus, kai lobuok pagataveit voi izalaseit kopeju sovai gaumei. Vāluok nūtyka kopeja grauzdiešonys i pakuošonys process. Vysu pyrma tyka sagataveiti īpakuojumi ar eipašū "Volūdys" dizainu, tod kopejs tyka svārts, samolts i aizzvalcāts cīt.
Tai nu zalis pupenis, sūpluok sepinejūt, guodojūt, runojūt i dzīžūt latgaliski, tyka pagataveits "Volūdys" kopejs, kas kotrā kruškeņā atguodynuos par dzymtuos volūdys spāku.
Eipašais kopejs, kas "Volūdai", sasadorbojūt ar "KUUP COFFEE", grauzdāts iz bīdreibys juridiskūs 20 godu jubileju daīmams ITE. Pārkūt itū kopeju, tu sveicynoj myus dzimšonys dīnā, styprynoj i atboļsti myusu dorbu. Paļdis!
______
Latgalīšu kulturys kusteibys “Volūda” aktivitatis 2025. i 2026. godā finansiali pabolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.
