Ari Špogu jaunīši pīrakstejuši diktatu latgaliski
14. oktobrī “Volūdys” kustynuotuojis Amanda i Agnese kūpā ar aktrisi Kristīni Veinšteinu gasteja Špogu vydsškolā, kur 10. i 11. klašu školānim snēdze vareibu pīraksteit deveitū diktatu latgalīšu rokstu volūdā. Koč i itamā školā latgalīšu volūdu vuica tik suokumškolā, vacuokūs klašu bārnim tei beja vīnreizeiga pīredze – paraudzeit, kai ir raksteit latgaliski. Nu 27 školānu tikai puora kasdīnā runoj latgaliski, deļtam diktata raksteišona beja lels izaicynuojums, bet prīca par jaunīšu ceņteibu i nasabeišonu paraudzeit kuo jauna!
Svietejūt Vaļsts volūdys dīnu, kas nu 2021. gods teik atzeimāta 15. oktobrī, jau vairuokus godus par tradiceju beja palykuse pasauļa diktata latvīšu volūdā raksteišona. Koč i itūgod diktats latvīšu literarajā volūdā, kai beja īrosts da ituo, nateik reikuots, turpynuojuos diktata latgalīšu rokstu volūdā raksteišona i, izsverūt latvīšu volūdys byušonu vysaidai, kotrys grybātuojs sevkur pasaulī ari itūgod tyka aicynuots paraudzeit spākus raksteit latgaliski, kas ir ūtrei normātuo latvīšu volūdys rokstu tradiceja. Ka tu vēļ napīraksteji diktatu, tod tū var izdareit ITE.
Diktata tekstu itūgod skaiteja Daugovpiļs teatara aktrise Kristīne Veinšteina, bet tekstu “Maize” speciali diktatam pīrakstejuse literarūs miniaturu i fotomuokslys Latgolys sajiutu karteņu “Brīnumdārzs / Breinumu duorzs” autore Evija Piebalga.
Jau par tradiceju palykuse ari gasteišona školuos, snādzūt vareibu vacuokūs klašu školānim pīraksteit diktatu latgaliski. Da šam "Volūda" nūpā ar Latvejis Radejis Latgolys studeju bejuse Rēzeknis Vaļsts 1. gimnazejā, Austrumlatvejis Tehnologeju vydsškolā, Rēzeknis Vaļsts pūļu gimnazejā i niu ari Špogu vydsškolā.
"Prīca, ka jaunīši na tik sasavasolaj latgaliski, bet ari rauga raksteit! Lobojūt diktatu, pamaneju, ka nasaverut iz tū, ka mes jim napastuostejom voi naatguodynuojam latgalīšu rokstu volūdys lykumus, daudzi jau intuitivi zynuoja, ka vuordā juobyut burtam Y voi divskaņam UO. Vieleju, lai jaunīši ari turpmuokajā kasdīnys ritmā sasavasoloj, roksta i runoj latgaliski, kai ari naaizmierst itu duorgū vierteibu," tai "Volūdys" kustynuotuoja Agnese Skangale.
"Sasatikšona ar aktrisi beja eipaši nūzeimeiga, kam Kristīne sovulaik struoduoja školā par latvīšu volūdys školuotuoju – tei beja juos pyrmuo dorba vīta. Aktrise školānim diktēja puordūmom boguotu i sirsneigu Evijis Piebalgys tekstu par maizi – kasdīnišku, bet dzili simbolisku vierteibu sevkura cylvāka dzeivē," tai Špogu vydsškolys bibliotekare i latgalīšu rokstu volūdys puļceņa vadeituoja Ingrīda Kolosovska.
"Volūda" soka lelu paļdis školys direktorei i eipaši Ingrīdai Kolosovskai par atsauceibu!
______
