Pāriet uz galveno saturu
  • ATBAĻSTEIT
  • NŪPIERKT
  • NŪSACEJUMI
  • BYUT
  • PADAREIT
  • VIESTS
  • FOTO
  • KUSTYNUOT
  • PAĻDIS
  • SASAZYNUOT

  • Visi produkti
  • Pīduovuojums
  • Gruomotys
  • Kursi i konsultacejis
  • Cyti
  • Atbaļsteišona
  • VEIKALS
  • Gruomotys
  • Miglinīki laiku lūkūs
Miglinīki laiku lūkūs

Miglinīki laiku lūkūs

  €15,00
()
Zemākā cena 30 dienās:
Ielikt grozā
Anta Buša
Miglinīki laiku lūkūs

Cītī vuoki, 288 puslopys, 20,6 x 30,3 cm, volūda — LTG, atseviški aproksti LVS.

Izdūšonys gods: 2026

Viereibai – gruomotys pīguode nu 30. novembra!

[LTG]

Latgalīšu kulturys kusteiba “Volūda” sagatavejuse i 28. novembrī Rēzeknis nūvoda Rogovkā aicynoj iz Antys Bušys gruomotys “Miglinīki laiku lūkūs” atkluošonu. Gruomota ostoņuos nūdaļuos viestej par latgalīšu dzymtys – Miglinīku – liktiņstuostu daudzu paaudžu garumā, atkluojūt, kai dzymtu, kurai pīdareigs ir kai latgalīšu tīseibu aizstuovs Pīters Miglinīks, tai politiks Fraņcs Kemps i bazneickungs Nikodems Rancāns, lūcekļu dzeivis ītekmiejuši vysaidi Latgolys i Latvejis viesturis nūtykumi.

Izdavuma autore ir bejušuo žurnaliste, pietneica Anta Buša, kura, poša īdama nu ituos leluos dzymtys, stuostu aizsuoc ar Pītera Miglinīka seņču, kuri dzeivuojuši myusu dīnu Rēzeknis nūvoda Nautrānu pusē, pieteišonu, bet nūslādz ar stuostim ap Miglinīku dzymtys piectečim myusu dīnuos. Gruomota viestej par nu Miglinīku dzymtys guojušom talanteigom, na tik Latgolys, bet vysys Latvejis viesturē nūzeimeigom personeibom, itūs cylvāku davumu naatkareigys Latvejis izveiduošonā i piečuok latvyskuos identitatis saglobuošonā. Tymā pošā laikā gruomota dasadur ari Latvejis viesturis suopeigajim pavadīnim, izzynojūt cylvāku liktiņus Ūtruo pasauļa kara laikā, izsyutejumā, gryutajūs pieckara godūs i trymdā.

Gruomotu sūpluok pietneicys viestejumam papyldynoj pošu dzymtys lūcekļu atmiņu stuosti. Skaiteituojim byus vierteigi ari gruomotā īkļautī nūvodpietneicys Andrys Zubko-Meļnis veiduotī dzymtys kūki i aproksti par jim. Gruomotys golvonais teksts ir latgalīšu rokstu volūdā ar saglobuotom atseviškom Nautrānu izlūksnis sovpateibom, bet dzymtys kūku aproksti – latvīšu literarajā volūdā.

“Ar itū gruomotu cīnā pasaklonu tim, kas Nautrānu pogosta Miglinīkūs dzeivuojuši pyrma myusu naskaitomuos paaudzēs. Personeigi es ar itū gruomotu atsagrīžu pi sovys dzymtys sakņu zvīdru i pūļu laikūs, kod viesturis olūtūs atrodu naleluos Miglinīku sādžys nūsaukumu. Ar patīsu prīcu izzynuoju, kai muni seņči izveiduoja vidi sev apleik, kai radeja sovu eipašū kūpīnu ar nūsaceitu styngru dzeivisveidu i ar vysušmukuokū latgalīšu volūdu,” par gruomotu soka juos autore Anta Buša.

Gruomotys redaktore – volūdneica Anna Stafecka, korektore – literate, latgalīšu volūdys specialiste i portala lakuga.lv redaktore Laura Melne, gruomotys izdūšonys projekta vadeituoja – Vineta Vilcāne-Toca, bet maketātuoja – Daina Salmiņa.

Miglinīku dzymtai veļteituo izdavuma “Miglinīki laiku lūkūs” atkluošona nūtiks sastdiņ, 28. novembrī, 12 stuņdēs Rēzeknis nūvoda Nautrānu pogosta bibliotekā ("Vālodzīte”, Rogovka). Atkluošonā byus vareiba satikt kai gruomotys autori i izdūšonā īsaisteitū komandu, tai i Miglinīku dzymtys puorstuovus.

Izdavums “Miglinīki laiku lūkūs” ir ūtruo gruomota, kas izīt ari Centralaustrumu Eiropys literaturai veļteitajā gruomotu serejā “Mūsu Eiropa”. Serejā, kurā varēs īpazeit tulkuojumus nu ukraiņu, boltkrīvu, leitovīšu i cytu regiona volūdu, kai i literarūs dorbus latgaliski, apsavīnuojušys vairuokys Latvejis izdevnīceibys. Pyrmuo serejis gruomota izguoja izdevnīceibā “Latvijas Mediji” 2026. gods vosorā – boltkrīvu rakstneicys i žurnalistis Evys Vežnavecys romans “Kam nāci tu, vilks?” Mārys Poļakovys tulkuojumā.

Kai, dūmojūt par īsakļaušonu serejā “Mūsu Eiropa”, atzeimoj “Volūda”, verūtīs Latvejis sarežgeitū viesturi, Latgola viesturyski vēļ na cik seņ beja vīna daļa nu Eiropys katuoliskuo regiona, kurā var runuot par Leitovu, Pūleju, Boltkrīveju i Ukrainu. Itūšaļt latgalīšu literatura ir Latvejis literaturys daļa, vystik ari myusu dīnuos var redzēt, ka atsaškir skaiteituoju auditorejis, autoru apraksteituos problemys, procesi i ari latvīšu literaturys viesturis pietnīceibā īrosts latgalīšu literaturu apsavērt atseviški. Koč i serejā “Mūsu Eiropa” pamatā ir tulkuojumi, tok Latgolys literaturys īsakļaušona jamā ir vareiba skaiteituojim izalaseit dorbus ari originalvolūdā, kam nav vajadzeigs tulkuojums – skaiteit latgaliski. Itys caur vīnu dzymtu izstuosteitais stuosts gruomotā “Miglinīki laiku lūkūs” ir naviņ Latgolys, bet i Latvejis viesturis stuosts, kurā eipašu vītu ījam šaļts, kod Latgola apsavīnuoja ar cytim niulinejuos Latvejis nūvodim, puormejūt atteistebys vierzīni nu Centralaustrumeiropys regiona iz pīdariešonu Zīmeļeiropai.

Gruomotu “Miglinīki laiku lūkūs” sagatavejuse latgalīšu kulturys kusteiba “Volūda”, bet juos izīšonu atbaļstejs Vaļsts kulturkapitala fonds, Latgolys kulturys programa, kurū organizej Latgolys regiona atteisteibys agentura ar Vaļsts kulturkapitala fonda mierkprogramys “Latvīšu viesturyskūs zemu atteisteibys programa” atbolstu, i mecenats Pīters Aloizs Ragaušs.

Leidzeigi produkti

Atmiņuos Latgolā/Latgalian memories
Atmiņuos Latgolā/Latgalian memories
Vaira nav

Pirkumu grozs

Pirkumu grozs ir tukšs.


Atbolsti myusu kusteibu ar vīnys reizis voi kotra mieneša zīduojumu lītuotnē "Mobilly".