Dzīduotumi, ļustātumi. Dzīšmu albums
Digitalais dzīšmu albums “Dzīduotumi, ļustātumi”
Albumā “Dzīduotumi, ļustātumi” īkļautys desmit dzīsmis, kū sovulaik dzīduojuši Bierzpiļs apleicīnē dzymušī dzīduotuoji – Anna Bundža, Anna Stiernīks, Bronislava Romanovska, Cipirans Pokrotnīks (zynoms ari kai literats Augusts Egluojs) i Marta Šmidte. Vysys dzīsmis jimtys nu LU Literaturys, folklorys i muokslys instituta Latvīšu folklorys kruotivis digitalajā arhivā http://garamantas.lv atrūnamūs materialu. Albums īraksteits studejā “Lauska” Reigā pi skaņu režisora Kaspara Bārbala. Albums daīmams popularuokajuos muzykys straumiešonys vītnēs nūsaklauseišonai kai stereo, tai ari “Dolby Atmos” telpiskuos skanis tehnologejuos.
“Dzīduotumi, ļustātumi” īrokstā pīsadaleja “Ceidari”: Daina Blažēvica, Mairis Iesalnieks, Jolanta Keiša, Edeite Laime, Sonora Logina, Vizma Mičule, Kristīne Pokratniece, Aivars Rožāns, Ilze Rudlapa, Marta Sīle, Jūlija Tumanovska.
Dzīšmu vuordi, informaceja ap albumu i dzīduotuojim daīmama pdf bukletā ITE. Bukleta dizainu taisejuse muokslineica Dana Vasiļjeva, bet pi volūdys sakuortuošonys tolkā guojuse filologejis profesore Lideja Leikuma.
Albumu var nūsaklauseit ITE, bet mp3 versejis failus bezmoksys dabuot, davīnojūt grūzam i nūformejūt bezmoksys pierkumu voi zamynīluodejūt ITE.
Dzīšmu saroksts:
- Svātdiņ agri buorineite
- Īšu, skrīšu, te nabyušu
- Mane deļ tu, bierzeņ(i)
- Pavaicuoju mameņai (Nedelis dzīsme)
- Voi, Dīveņ(i), soldons ol(y)s
- Beja dāds ar sovu buobu
- Skaisti putneni dzīduoja
- Seņ(e) gaidieju, niu izdzierdu
- Oruojeni, acātuoji
- Dzīduotum(i), ļustātum(i)
Bierzpiļs dzīsmem veļteitū albumu “Dzīduotumi, ļustātumi” īrokstu finansiali pabaļstejuse Vaļsts kulturkapitala fonda mierkprograma „Latvīšu viesturiskūs zemu atteisteibys programa“, kurū administrej Latgolys Regiona atteisteibys agentura, i privatī zīduotuoji.
Apsavērt albuma īroksta procesu var ite (Elmāra Pēterāna video):