Atbolstu rezidencis
2025. godā sadarbeibā ar Rēzeknis nūvoda Lūznovys muižu aizsuocem rezidenču programu latgalīšu literaturā, volūdnīceibā i Latgolys pietnīceibā. Pyrmajā rezidenču godā vareibu izmontuoja pīci rezidenti (vaira par rezidentu dareitū i rezultatim ITE). 2026. gods rezidenču programa dabuoja Vaļsts kulturkapitala fonda atbolstu uzaturiešonai, bet Rēzeknis nūvods i “Volūda” atbolsta ar rezidentu stipendejom rodūšajam dorbam. Ituo gods programai sajēmem 15 dasacejumu ar breineigom idejom, kas ir daudzi, daudzi vaira nakai četrys vītys, kuruos varim atsaļaut publiskajā dasasaceišonā (divejis rezervātys literarūs konkursu uzvarātuojim), deļtuo prīcuotūs ar sabīdreibys atbolstu dūt rezidenču vareibu vēļ kaidai rodūšajai personeibai. Taišni laiks natraucātam dorbam ir vīns nu aspektu, kū sovuos motivacejuos nūruoda potencialī rezidenti.
Rezidencis izmoksys ir 50 eiro dīnā (īskaitūt uzaturiešonu, ādynuošonu i stipendeju), vīna rezidencis programa – četrpadsmit dīnu (kūpejuos izmoksys 700 eiro). Ar sovu atbolstu (sevkurā lelumā) jius paleidzit pīpiļdeit rezidenču programys mierki.
Rezidenču programa dūmuota latgaliski rokstūšim literatim tulkuotuojim, žurnalistim, scenaristim, latgalīšu volūdys, literaturys i Latgolys kulturys pietnīkim, jūs vydā ari uorzemu literatim, kas roksta latgaliski, voi uorzemu literatim i pietnīkim, kas roksta ap Latgolu, pietej Latgolys kulturu voi tulkoj nu/iz latgalīšu volūdu, kai i cytom rodūšajom personeibom, kas dorbojās latgaliskajā kulturtelpā. Programys mierkis ir veicynuot latgalīšu volūdys, literaturys i latgalistikys atteisteibu i populariziešonu, nūdrūsynojūt platformu augstvierteigu daildorbu latgalīšu volūdā i Latgolai veļteitu pietejumu pīaugumam. Rezidenču programa ir ari Latgalīšu kulturys goda bolvys “Boņuks 2025” nominants.
Pusgoda laikā piec rezidencis laika, rezidenti ir aicynuoti pasadaleit ar jaunradeitū dorbu voi juo daļu latgalīšu kulturys ziņu portalā lakuga.lv i dorbs ir daīmams īpasazeišonai plotuokai sabīdreibai. Rezidentim ir vareiba reikuot ari rodūšūs vokorus voi cytys aktivitatis ar vītejū kūpīnu.
Latgalīšu kulturys kusteibai “Volūda” (juridiski – bīdreibai “Volūda”) ir sabīdryskuo lobuma organizacejis statuss. Platformā voluda.lv padareitais atbolsts teik registrāts kai zīduojums, leidza ar tū ir vareiba sajimt ari nūdūkļu atlaidis.