Vasali!


Mes asam latgalīšu kulturys kusteiba "Volūda", kurū da ituo zynuoji (bet varbyut i nazynuoji) kai bīdreibu "LgSC" voi "Latgolys Studentu centru". Mums pateik i saīt dareit (tys, kas jau padareits, apsaverams ite), kab latvīšu volūda teik boguotuoka i tū raugam dareit caur ūtrū latvīšu volūdys rokstu tradiceju – latgalīšu volūdu. Kusteibā aiz breiva pruota asam apsavīnuojuši tī, kurim svareigi, kab itaida dažaideiba latvīšu volūdā ar tuos viesturiskū paveidu latgalīšu volūdu byutu, jo leluokai daļai nu myusu tei ir dzymtuo volūda voi bejuse kluotyn saimē jau nu bārnu dīnu. 

Mums ir sapynu, ideju i dorbu pylnys kuldys (kārmani, kabatys – kai kuram pateik saceit), bet kab tū izdareitu pi vysa, kas mums jau ir (komanda, pīredze, sadarbeibys, gribiešona dareit), byutu breineigi vēļ kaids atbolsts nu molys leluokai dorbu īkustynuošonai. Kotrys itaids atbolsts byus ari stabiluoks sūļs preteimā organizacejis ilgtspiejai i myusu komandys drūseibys sajiutai, ka aizsuoktū īsadūs izdareit. Tik ar kotru paleigu mes varim kustynuot lītys tuoļuok i aizkustynuot da arviņ vaira cylvāku na tik Latgolā, nu cytur Latvejā i pasaulī!  

Ka gribi paleidzēt īkustynuot i izdareit, izavielej kaidu ideju voi projektu, kurs ruodīs tev tyvuokais, i mes apsajimsim i byusim prīceigi tū padareit! Voi var nūpierkt prīcu? Mums ruodīs, ka var, jo itei byus kotra atbaļsteituoja i myusu pošu prīca par tū, ka kūpā saīt padareit vaira.

IZDEVNĪCEIBA

Šaļtim volūdu gribīs aptausteit i kotram burtam dasadūrt ar pierstu golim. Gruomota ir vīns nu veidu, kai volūda dzeivoj i palīk cytim laikim, partū ituo laika literaturu, izzynūšus i ari sovu reizi izklaidejūšus izdavumus latgaliski raugam padareit taustomus. Itūšaļt jau aizsuokts dorbs pi vēļ sešu jaunu izdavumu, deļtuo atbolsts kotrai puslopai byus sūļs tyvuok iz padareišonu.

LITERATURYS SKANIEŠONA

Kai tev pateik, ka radejā izskaņ latgalīšu romana īstudiejums? Mums pateik. Deļtuo kūpā ar draugim Latvejis Radejis Latgolys studejā raugam radejis īstudiejumu/lasejumu formatūs pīduovuot latgalīšu literaturys dorbus. Skanēja Ilzis Spergys "Dzeiveiba", skanēja Alda Bukša "Bruoli" i gribīs, lai skaņ vēļ. Lai tys īsadūtu, aicynojam tolkā!

LAKUGA.LV DARBEIBA

Byut vīneiguo piļneibā latgaliski rokstūšuo portala pasaulī saiminīkim i veiduotuojim ir cīši lela atbiļdeiba. Kab kotru dīnu jums byutu, kū skaiteit, kab byutu, kas par tū pīroksta. Mums ir stypra i profesionala komanda i vēļ vaira ideju i veidu, kai uzlobuot portala saturu i dorbu. Kulturys medeja "kluotyn efekts" vysod ir naziņa par reitdīnu, bet kotrys atbolsts var itū naziņu gaisynuot. 

"CEIDARU" DZĪSMIS

Folklorys kūpa "Ceidari" pyrma desmit godu suocēs nu vīnkuoršys gribiešonys sasatikt i dzīduot latgaliski ari Reigā. Tei prīca nav puorguojuse. Padareits dorbs pi Bierzpiļs dzīšmu īraksteišonys albumā "Dzīduotumi, ļustātumi", tok ir vēļ daudzi cytu dzīšmu, kurys byutu peļnejušys vuiceišonūs mieginuojumūs, skaniešonu koncertūs i īrokstus studejuos.

RAKSTEIBA

Es rokstu, tu roksti, mes rokstam, jī i juos roksta latgaliski. Tys byutu eistyn breineigi! Nu cikom vēļ tai nav, deļtuo ar aizdavumim socialajūs teiklūs, volūdys nūdarbeibom, volūdys materialim i stuostim raugam dareit tū, kū cytur cikom navar – īsavuiceit poši i īvuiceit cytim raksteit latgaliski. 

AUGŠONA

Vīnu vosorā latgaliskajā seminarā "Atzolys" jaunīši drūsmeigi dzīduoja: "Mums byus zalta nuokūtne jiusu sudobra vītā!" I mes eistyn tam ticim! Tik gribīs, kab tymā laikā iz prīšku byutu i skanātu ari koč kas latgaliski. Deļtuo jaunīšu seminari, izaugsmis programys, gruomotys, aizdavumi, digitaluos lītys, video i dzīsmis bārnim i vacuokim ir veids, kai īkustynuot ari tuoļuok leluokim i mozuokim sajiutu, ka i jim tū gribīs. 

Pirkumu grozs

Pirkumu grozs ir tukšs.